प्रेरित.कामी 17
17
थिससलुनीके सहर रे
1हुंकू अम्फिपुलिस तेकर आपोलोनिया सहर के परोम केते, थिसलुनिके सहर सोदोर नेनाकु, होनाःड़े जाहुदीकु आला मियांड बिनती ओड़ाअ ताही नेना। 2पौलुस अपन चाईल रअः मोताबिक, होना बिनती ओड़ाअ रे सेन नेनाय, तेकर पे सथाअ हिला जगुत होनाःड़े रिनकु होड़ लोः पबितर धरम पुथी तरअः उदूः-उदूः हुंकू लोः बात-बिचार लःअय। 3ख्रीस्त के दुख उ-उठाव तेकर गोएःग उनकु तरअः जिवीःड-बिरिडोः दरकार ताही नेना, तेकर “निई ईसु जेकर ईङ आपे तलारे परचारीईङ ख्रीस्त हेके मेन केते, होना रेनअः माने खोलाव-खोलाव समझाव कु केनाय आउर साबित लःअय।” 4हुंकू मेसे रे थोड़ेक होड़ बिसवास लअकु तेकर हुंकू पौलुस तेकर सिलास लोः गतिः नाकु। ढेर परमेसर आलकु भक्त युनानीकु तेकर ढेर नामी आउराईतकु होः मनाव नेनाकु।
5बकिर थोड़ेक जाहुदीकु हिसंगा ते लोयोअ केनाकु, तेकर हुंकू बजार रिनकु थोड़ेक खपतानकु आला सहाड़ा रे तुन्दरा होड़ जवार लिकुआकु, तेकर सहर रे गुल-गबाड़ चिअ दिकुआकु। हुंकू पौलुस तेकर सिलास के सहर रेनअः सभा रे हाजीर किनाबु मेन केते, यासोन ओड़ाअ रे हीःग सोदोर नाकु। 6हुंकिन के होनाःड़े काकु नाम लिकुआ दो, हुंकू यासोन तेकर थोड़ेक बोकोकु के सहर रिनकु हाकिमकु दुबाःड़े ओर ईदी लिकुआकु, आउर नोकान गुल यआते, “नुकिन होड़ पुरा दुनिया रे असानती फैलाव चुकाव केदाकिन, तेकर नहाअः दो नोड़े होः हीःग तनाकिन, 7हुंकिन कैसर आला हुकूम रअः बिरोधे-आकिन। नुकू जामा कैसर तरअः आउर मियांड राजा एदानिया जेकर नुमू ईसु हेके मेन गेआकु, यासोन हुंकिन के अपन दुबाःड़े डेरा एमा तडकिनाय।” 8जब नोःआँ आयुम केते तुन्दरा आउर सहर रिनकु हाकिमकु बाऊखलाव नाकु। 9हिना लःअय हाकिमकु यासोन तेकर बिसवासी होड़ तरअः जमानत ईदी केते, हुंकू के बाई लिकुआकु।
बिरिया रे पौलुस आउर सिलास
10बोकोकु अंधारोः तोरन पौलुस तेकर सिलास के बिरिया कुलगोःड लिकनाकु। हुंकिन होनाःड़े सोदोर केते, जाहुदीकु आला बिनती ओड़ाअ सेन नेनाकिन। 11नुकू होड़ दो थिसलुनिके रिनकु जाहुदीकु तरअः खुला मन रिनकु ताही नेनाकु, तेकर मन लगाव केते बचन आयुमे केनाकु, तेकर नोःआँ रेनअः सचाई के ज-जाचाँव लःअय रोज दिन धारम-पुथी तरअः पौलुस नोकान कंहड़ी तदाय, होना बात नेकान गीआ ची कोवान सेके नाम एकाय केनाकु 12हिना लःअय हुंकू मेसे रे ढेर होड़ तेकर युनानी नामी आउराईतकु मेसे आउर हेरेलकु मेसे रे होः ढेर होड़ बिसवास लअकु। 13बकिर जब थिसलुनिके रिनकु जाहुदीकु के पता चलाव ना ची, पौलुस बिरिया रे परमेसर आला बचन रअः परचार दाय दो, हुंकू होः होनाःड़े होड़कु के भभाड़काव, गुल-गबाड़ ची लःअय हीःग नेनाकु। 14हिना लःअय बोकोकु पौलुस के तुरते समुदर दौंड़ी सेनोः लःअय विदा लियाकु, बकिर सिलास आउर तिमुथियुस हिनाःड़े ताहिः नाकिन। 15पौलुस लोः सेनोः तानाकु हुंकू एथेंस जगुत हुनी लोः सेन नेनाकु, तब पौलुस हुंकू के हुकूम एमा लिकुआय ची, जेतना जल्दी हुयाव सकाअ सिलास तेकर तिमुथियुस के ईङ दुबाःड़े हिजोअ लःअय कंहड़ी ओकिनपे तब हुंकिन बिरिया रूवाड़ हिजोअ लःअय उडुंग नाकिन।
एथेंस रे पौलुस आला धरम परचार
16जब पौलुस एथेंस रे तिमुथियुस आउर सिलास के आसरा नेल किन केनाय दो, सहर रे मुरती कु के पेरेःग उनकु नेल केते, हुनी आला जीव रे मुरुक खीस आउर दुख आदा लिया। 17हिना लःअय हुनी बिनती ओड़ाअ रे जाहुदीकु तेकर परमेसर आलकु युनानी भक्तकु लोः बाते केनाय, आउर चौक रे जे होड़ हुनी लोः भेटाअः केनाकु, हुंकू लोः रोज दिन बात बिचारे केनाय। 18होनाःड़े थोड़ेक इपिकुरीयस के गुरू मनाअ इपिकुरीकु#17:18 इपिकुरीकु इपिकुरीकु मनाअ केनाकु ची दुनिया धुड़ी तरअः होः छोटे-छोटे जिनीस तरअः बनाव लआ एदनाअ। आउर नोःआँ दुनिया रे मियांड ठुका बेस एदनाअ होना हेके रिझ-रंग आउर खुस तहिनोः। आउर जीनो के गुरू मनाअ वाला सतोईकी बुधीमनकु#17:18 सतोईकी बुधीमनकु सतोईकी कु मनाअ केनाकु ची होड़कु के सुख दुख रेनअः बंधन तरअः छुटकारा नानाम चाही आउर बेगार सिकाईत रे जरूरी लःअय अपन के जिम्मा एमोअ चाही। लोः होः बात-बिचार हुयाव नेना। आधा होड़ कंहड़ी केनाकु, नुई बकवासी आबु लोः एतान क-कंहड़ी नाम तनाय? आधाकु कंहड़ी केनाकु नुई विदेसी देवताकु आला परचारेआय, हुंकू नोकान कंहड़ी याकु, एता लःअय ची पौलुस ईसु रआ बारे रे आउर जिवीःड-बिरिडोः रेनअः बारे रे परचारे केनाय। 19हिना लःअय हुंकू पौलुस के आथेंस रेनअः बड़े सहर रआ सभा रे सःब केते ईदी लियाकु, होना पंचाईत रआ नुमू अरियुपगुस थिना। आउर हुंकू, “एतान आले ओका गोसया नावाँ गुन एमा कुआम सेके पाड़ी सकायाले? मेन केते बेता लियाकु। 20आम आले के ताजुक बात सुनायाम होना रेनअः एतान माने हेके, सेके आले पापाड़ी नामाले।” 21जामा एथेंस रे ताहिनोःकु तेकर विदेसी कु जे होनाःड़े हिजोअ केनाकु नावाँ-नावाँ बात क-कंहड़ी आउर आ-आयुम रेगी अपन जामा बेरा बिताय केनाकु।
एथेंस रे पौलुस आला भासन
22एथेंस रअः बड़े पंचाईत ताला रे तिंगु केते, “ए एथेंस रिनकु होड़कु ईङ नेलेईङ, ची आपे जामा बात रे देवताकु के मुरुक मा-मनाव वाला एदान पेआ,” मेन केते पौलुस बेता लिकुआय। 23“एता लःअय ची ईङ दांड़ा-दांड़ा आपे आला पुपुजा रअः जिनीस के जिवाईन नेले किनिङ दो ईङ मियांड बिदी तेङ रे नेल लाईङ ची, अनजान परमेसर लःअय लिखा ताही नेना। हाँ, आपे बेगार पाड़ी ते जे परमेसर के पुजाई-यापे, ईङ हुनी परमेसर रअः बारे परचार दिंग मेन केते बेता लिकुआय। 24#1 राजा 8:27; जसा 42:5; प्रे.कामी 7:48जे परमेसर, दुनिया रे एदनाअ जामा जिनीस के बनाव लःअय, जे सिरमा तेकर धरती रिनी परभु हेके, हुनी तीः रेनअः बनाव लआ बड़े बिनती ओड़ाअ रे काय ताहिनोआँ। 25हुनी के एतान जिनीस रआ घटकमी कनोआँ परमेसर के होड़ आला तीः तरअः सेवा-सुसार रआ दरकार कनोआँ, एता लःअय ची हुनी खुदे जामेकु के जिनगी तेकर साँस आउर जामा कुछ एमेआय। 26हुनी मियांड ठुका मनवा तरअः हुनी जामा जाईतकु के गोटे धरती रे ताहीनोः लःअय बनाव लिकुआय, हुनी हुंकू आला बेरा के ठहराव तदाय तेकर हुंकू आला पहटा रेनअः सिमान के तोल तदाय। 27ची मनवा परमेसर के नामीकु, हुयाव सकअ हुनी जगुत सोदोर केते तुनुम नाम गोअ-ताईकु, सेरे होः हुनी आबु तरअः लंका कनियाँ 28जाहें मिहोंड़ कंहड़ी तदाय ची,”
“‘हिनी रिगी आबु जिवीःड ताहिनोआबु तेकर दांड़ा बड़ानाबु, तेकर हिनी रिगी टिकाव ताहिनोआबु।’”
जे लकान आपे आलकु थोड़ेक कवि कु होः,
“‘आले होः हिनी आलकु बंसवाईर हेके कंहड़ी तदाकु।’”
29“जदि आबु परमेसर आलकु बंसवाईर हेके दो, कहियो नोकान सोंसोचाव कोवान चाही ची, परमेसर सोंचाव केते मनवा आला करीगार, सोना चाँदी चाहे, टुकू तरअः गढ़ाव लिनी मुरती लकान एदानिया, 30पहिल जुग रे मनवा परमेसर के काकु पाड़ी केना सेरे होः परमेसर धेयान काय एमा कु केना हिना लःअय, बकिर नहाअः जामा ठाँव रे जामा होड़कु के मन रूवाड़ लःअय हुकूम एमा कुआय। 31एता लःअय ची हुनी मुसिङ दिन ठहराव तदाय, जे हिला मियांड होड़ तरअः जेके हुनी चुनाव तदियाय, हुनी धरम तरअः गोटा दुनिया रेनअः नेयाय केआय। तेकर परमेसर होड़ के गोएःग उनकु मेसे हुनी के जिवीःड केते, नोःआँ बात के जामे होड़ रे साबित तदाय।”
32हुंकू गोएःग उनकु के जिवीःड-बिरिडोः बात के आयुम लअकु दो, थोड़ेक होड़कु ठठ्ठा केते कंहड़ीः दाकु, बकिर एटाअकु “आले नोःआँ बारे रे फिन कहियो आम तरअः आयुमेआले कंहड़ी लअकु।” 33तेकर पौलुस बड़े पंचाईत के बाईःग तु केते सेनोः नाय। 34सेरे होः थोड़ेक होड़कु हुनी लोः गाती नेनाकु, तेकर बिसवासी पाड़ीः नाकु, हुंकू रे बड़े पंचाईत रिनी सदस्य दियोनिसियुस तेकर दमरिस नुमू रिनी मियांड आउराईत ताही नेनाय, हुंकू लोः आउरो होड़ होः ताही नेनाकु।
Voafantina amin'izao fotoana izao:
प्रेरित.कामी 17: ASR
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023 NLCI CC BY-NC-ND 4.0