Matayo 20
20
Abakoli aba mu ndumiro ya mizabbibbu
1OYesu ni yeeyongera nʼakoba ati, “Obukama bwa mwiguru bwisanisibwa nʼomukama wa ndumiro ya mizabbibbu, eyakeire omu kibbambya okutoolya abakoli abaakola omu ndumiro yaamwe eya mizabbibbu. 2Niyamaare okuragaana nabo okubasasula edinaari emwei ekiro, nʼabasindika okukola omu ndumiro yaamwe eya mizabbibbu. 3Era nʼaira nʼawuluka oku saawa nkʼeisatu nʼabona abandi nibeemereire awo omu katale, nitibalina kyebakukola. 4Nʼabakoba ati, ‘Naanywe mwabe omu ndumiro yange eya mizabbibbu mukole, nʼabasasula ekibaloomere.’ 5Ni baaba. Nʼawulukate oku saawa nkʼomukaaga, nʼoku saawa nkʼomwendai, nʼakola ekintu nikyo kimwei 6Era nʼoku saawa nkʼeikumi nʼemwei nʼawuluka, nʼasanga abandi nibeemereire, nʼababuulya ati, ‘Lwaki mwemereire ani ekiro kyona nimutalina kyemukola?’
7“Ni bamwiramu bati, ‘Kubba ndowo yakatuwaire mulumu.’ Nʼabakoba ati, ‘Naanywe mwabe mukole omu ndumiro yange eya mizabbibbu.’
8“Obwire nibwaswekere, omukama wa ndumiro ya mizabbibbu nʼakoba omusaiza waamwe aroleera abakoli nti ‘Yeta abakoli, obasasule empeera yaabwe, nʼokutandikira oku baasembereyo okwiza okukola, omaare oku beekereire oku mulumu.’
9“Abo abaatandikire okukola oku saawa eikumi nʼemwei ni baiza, ni basasulwa edinaari emwei buli omwei 10Abeekereire oku mulumu ni baiza okusasulwa, ni balowooza nti baafuna kikooto okusinga oku kya badi kyebatungire. Baitu boona ni batunga edinaari emwei buli omwei. 11Nibaazifunire, ni bagongoizokera omukama wa ndumiro, 12ni bamukoba bati, ‘Bani abaizire oluzwannyuma bakoleire esaawa emwei yonkai, yonkai, baitu nʼobasasula nikyo kimwei nka iswe abaakoore omulumu ekiro kyona, nga nʼeisana rikutwoca?’
13“Baitu ye nʼairamu omwei oku bo ati, ‘Mwira wange, tinkugoberye. Titwaragaine nanje edinaari emwei? 14Twala eyaamu, oyabe. Ntakire okuweerya oni eyaizire oluzwannyuma nka nimpaire we. 15Tinyikirizibwa kukolesya byange nka ninyendya? Oba okwatiibwe obwiya kubba ndi mwenda?’”
16Awo oYesu namaliirya ati, “Nimwo kiribba aba luzwannyuma, balibba bakwekeera, nʼabakwekeera balibba baluzwannyuma.”
OYesu akubaza omulundi ogwakasatu oku kufa kwamwe
(Mak 10:32-34; Luk 18:31-34)
17OYesu niyaali nakutembatemba e Yerusaalemu, nʼairya oku ntando abeegesebwa eikumi nʼababiri, nʼabakoba ati, 18“Bona tukutemba e Yerusaalemu, era eyo oMwana wa Muntu akwiza kuweebwayo egiri abakabona abakulu, nʼomu beegesya bʼamateeka. Bakwiza kumusaara ogwa kufa, 19era bamuweeryeyo omu banyamanga okumusekeera, nʼokumukubbisya ekisuunyu ekiriku amabira agayaaka, nʼoku mubamba oku musaalaba. Baitu oku kiro ekyakasatu aliyimbooka.”
Okusaba kwa nyina wa Yakobo nʼoYokaana
(Mak 10:35-45)
20Awo onyina wʼabataani ba Zebbedaayo nʼaiza nʼabataani baamwe egiri oYesu, nʼakubba amajwi nʼabbaaku kyakumusaba. 21OYesu nʼamubuulya ati, “Okwendya ki?” Nʼamwiramu ati, “Suubiza nti omu bukama bwamu, abataani bange bani bakali babiri, baliikala nibakwerereire, omwei oku rubaju olwa gulyo, nʼowondi oku lwa gumoso.”
22OYesu nʼabairamu ati, “Kyemukusaba timukukyeteja. Mukusobola okunywa oku kikopo ekya kubonaabona kyenkwaba okunywaku?” Ni bamwiramu bati, “Tukusobola.” 23OYesu nʼakoba ati, “Dala ekikopo kyange ekya kubonaabona mulikinywaku. Baitu ekya kwikala nimunyerereire oku rubaju olwa gulyo oba olwa gumoso, ti ninje nkigaba, okwiyaku kiweebwa abo bekyateekaniriziibwe oIte wange.” 24Abeegesebwa abandi eikumi nibaakiwuliire, ni bagongereera abaluganda bakali babiri. 25Awo oYesu nʼabeeta boona boona amwei, ni baiza waali. Nʼabakoba ati, “Mumaite ngʼabafugi ba banyamanga bendya kubafugira kimwei, era na bwandi. 26Baitu omu nywe, ti nimwo kiteekwa okubba; buli akwendya okubba omwebemberi omu nywe, ateekwa okubba omuweereza wa baira baamwe. 27Era buli akwendya okubba akwekeera omu nywe, ateekwa kubba mwiru wa boona boona, 28nkʼoMwana wa Muntu, ataizire kuweerezebwa, baitu okuweereza, amwei nʼokuweeryayo obwomi bwamwe nkʼomutango, okucungura abaingi.”
OYesu akutamba abaigali ba maiso
(Mak 10:46-52; Luk 18:35-43)
29OYesu nʼabeegesebwa baamwe ni baali bakuzwa e Yeriko ekibiina kyʼabantu ekikooto ni kimusengeerya. 30Abaigali ba maiso babiri abaali baikaire oku muwanda, nibaawuliire nti oYesu akwakalawo, ni batandika okukokooma bati, “Sebo, oMwizukulu wa Dawudi, tukwatirwe ekisa!” 31Abantu ni bababoigoora basirike. Baitu bo ni beeyongerambe okukokooma bati, “Sebo, oMwizukulu wa Dawudi, tukwatirwe ekisa!”
32Awo oYesu nʼayemeera nʼabeeta, nʼababuulya ati, “Mukwendya mbakoore ki?”
33Ni bamwiramu bati, “Mukama twigule amaiso tubonie.”
34OYesu nʼabakwatirwa ekisa, nʼakwata oku maiso gaabwe. Amangu ago ni basobola okubonia, ni bamusengeerya.
Voafantina amin'izao fotoana izao:
Matayo 20: RUULI-NYALA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
