Matayo 15
15
Emikiirokiiro gyʼaBayudaaya
(Mak 7:1-13)
1Awo aBafarisaayo nʼabeegesya bʼamateeka ni bazwa e Yerusaalemu ni baiza awali oYesu, ni bamubuulya bati, 2“Lwaki abeegesebwa baamu tibafa ku mikiirokiiro gyʼabazeiza baiswe? Nibabba bakwaba okulya emere, tibanaaba mu ngalo, nkʼemikiirokiiro nigiragira?” 3OYesu nʼabairamu ati, “Lwaki naanywe muyenda ekiragiro kya Kanca olwa mikiirokiiro gyanywe? 4Kubba oKanca yakobere ati, ‘OIteewo nʼomaawo obatangamu ekitiinisya,’#Kuz 20:12 era nti, ‘Eyazumanga oite waamwe oba nyina, ateekwa okwitibwa.’#Kuz 21:17; Lev 20:9 5Baitu nywe mukoba nti, ‘Buli akoba oite waamwe oba onyina nti kyenaakukuwaire okukujuna kiweereibweyo egiri oKanca,’ 6abba tacaawambiriziibwe kujuna ite waamwe. Nimwo mwadubirye mutyo ekiragiro kya Kanca olwa mikiirokiiro gyanywe. 7Bagobya nywe, oIsaaya omulangi bye yababazireku bikiire, ni yakobere ati,
8‘Abantu bani bantaamu ekitiinisya mu bigambo bugambo,
baitu emitima gyabwe, gineenagire muno.
9Engeri gyebandamyamu ya kwemalamala;
ebigambo byʼabantu obuntu,
nibyo beegesya nkʼamateeka ga Kanca.’#Isa 29:13”
Ebisiisa engeso za muntu
(Mak 7:14-23)
10Awo oYesu nʼayeta ekibiina kyʼabantu, ni baiza waali, nʼabakoba ati, “Muwiliirye era mweteje. 11Ebyo omuntu byʼalya ti nibyo bisiisa engeso zaamwe, okutoolaku ebyo byabaza nibyo bizisiisa.”
12Awo abeegesebwa baamwe ni baiza waali, ni bamukoba bati, “Omaite ngʼaBafarisaayo baagongeire nibaawuliire ekigambo ekyo?”
13OYesu nʼairamu ati, “Buli kimera ekitaasimbiibwe Ite waange owa mwiguru, kiritidulibwa. 14Mubaleke abo, abeebemberi abaigali ba maiso. Omwigali wa Maiso niyeebembera omwigali wa maiso omwira waamwe, bakali babiri bagwa omu kiina.”
15Awo oPeetero nʼamwiramu ati, “Tukobere amakulu ga lufumo olwo.”
16OYesu nʼabakoba ati, “Naanywe timwetejerye? 17Timukubona nti buli kintu ekiriibwa kyaba mu nda, era nimwo kizwa ni kiwuluka? 18Baitu ebibazibwa bizwa mu mutima, era ebyo nibyo bisiisa engeso za muntu. 19Kubba omu mutima nimwo muzwa ebirowoozo ebibbi, obwiti, obusiiyani, obubbi, okuwangiirya, okubaza obubbi oku bandi, 20Bini nibyo bisiisa engeso za muntu. Baitu omuntu okulya nga tanaabire mu ngalo nkʼemikiirokiiro ni giragira, tikizisiisa.”
Omukali eyaalina okwikiriza
(Mak 7:24-30)
21OYesu niyazwire omu kifo ekyo, nʼayaba omu kitundu ekiri ampi nʼebibuga bya Tiiro nʼoSidoni. 22Omukali oMukanani, omwikali wa mu kitundu ekyo, nʼaiza gyali, nʼakokooma ati, “Nkwatirwa ekisa, sebo, oMwizukulu wa Dawudi! Omwara wange aliku omuzumu gumubonaabonesya!”
23Baitu oYesu nʼatamwiramu kigambo. Abeegesebwa baamwe ni baiza waali ni bamweseengeerya bati, “Mupeke, kubba akwiza atukokoomeera!”
24OYesu nʼairamu ati, “Tinatumiibwe egiri abantu abandi boona boona okwiyaku egiri abantu ba Isirairi abaabuure.”
25Awo omukali nʼaiza nʼakubba amajwi omu maiso ga Yesu nʼakoba ati, “Sebo, njuna!” 26OYesu nʼairamu ati, “Tikisai okurola emere yʼabaana nʼoginagira obubbwene.”
27Omukali nʼakoba ati, “Nimwo sebo, baitu nʼobubbwene, bulya oku butundutundu obuzwa oku meeza yʼabakama baabwo.”
28OYesu nʼairamu ati, “Mukali waitu! Olina okwikiriza kukooto! Kikukoorwe nka nokwendya.” Omwara nʼatambwa omu bwire obwombe.
OYesu akutamba abantu baingi
29OYesu niyazwire mu kifo ekyo, nʼaiza oku lukeeto lwa nyanja ya Galiraaya, nʼatemba oku lusozi nʼaikala. 30Abantu baingi muno ni baiza waali nga baleetere abalema, abaigali ba maiso, enzingo, abakibbubbu nʼabalwaire abandi baingi. Ni babata ampi nʼamagulu gaamwe nʼabatamba. 31Abantu ni bawuniikiira nibaaboine abakibbubbu nibakubaza, ababbaire bazingaime nga boomi, abalema nibakutambula, nʼabaigali ba maiso nibakubona. Ni bawaisya oKanca wa Isirairi.
OYesu akwikutisya abantu enkumi einai
(Mak 8:1-10)
32Awo oYesu nʼayeta abeegesebwa baamwe, ni baiza waali, nʼabakoba ati, “Abantu bani nkubakwatirwa ekisa, kubba babbaire nanje ebiro bisatu biraambiira, baitu tibacaalina kyebakulya. Tinkwendya kubalaga ngʼenzala ekubaluma, andaake bakabire omu nzira.” 33Abeegesebwa baamwe ni bamukoba bati, “Omwirungu twaiya ayi emere okwikutisya abantu abaingi batyo?”
34OYesu nʼababuulya ati, “Mulinawo emigaati gingai?” Ni bairamu bati, “Musanju nʼobucwi ndoowo we bukwenkana.”
35Awo nʼalagira abantu baikale ansi. 36Nʼatoola emigaati omusanju nʼencwi ni yeebalya oKanca, nʼabiyendayendamu nʼabikwatisya abeegesebwa baamwe, abeegesebwa ni babigabira abantu. 37Boona boona ni balya ni baikuta. Abeegesebwa ni bakumbaania obutundutundu obwalemeirewo, ni baizulya ebiibbo musanju. 38Abo abaaliire, baali abasaiza enkumi inai, awatali kubala bakali nʼabaana.
39Awo oYesu nʼalaga abantu, nʼasaabala omu bwato, nʼayaba mu kitundu kya Magadani.
Voafantina amin'izao fotoana izao:
Matayo 15: RUULI-NYALA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
