मत्ती 28
28
ईसु को जी उठनो
(मरकुस 16:1–10; लूका 24:1–12; यहून्ना 20:1–10)
1आराम कन्नै बारे दिन के बाद इतवार की सुबेरेई मरियम मगदलनी और दूसरी मरियम कबर कै देखनै आँई। 2अचानक भारी हालोचालो भओ, परभु को एक दूत सुरग सै उतरो, कबर के धौंरे आओ और पत्थर अगल लुढ़काकै उसमै बैठ गओ। 3उसको रूप आसमान की बिजली की हाँई चमचमा रओ हो और बाके लत्ता बरप के जैसे सपेद चिट्ठा हे। 4दूत कै देक्कै पैहरेदार थर थर काँपल लगे और ऐंसे हो गए जैसे मर गए हौं। 5सुरगदूतौं नै उन बईयरौं सै कैई, “डरौ मत, मैं जानौ हौं कै तुम ईसु कै जो कुरूस मै चढ़ाओ गओ हो ढूंड़ रई हौ। 6बौ हिंया ना है, जैसो कै बानै कैओ हो, अपने बचन के अनुसार जी उठो है, आऔ, बौ जघै देख लो, जहाँ बौ रक्खो गओ हो। 7और जल्दी जाकै बाके चेलौ सै कैऔ, कै बौ मरे भएऔं मै सै जी उठो है और अब बौ तुमसै पैले गलील कै जा रओ है, तुम उसकै बहीं देखौगे जो मैंनै तुमसै कैई ही, बाकै याद रक्खौ।”
8और बे बईयरैं डर और बड़ी खुसी के संग कबर सै जल्दी लौहटकै उसके चेलौ कै जौ खबर सुनानै दौड़ीं। 9अचानक ईसु उनसै मिलो और बोलो, “तुमकै सान्ति मिलै!” बे उसके धौंरे आँई, उनौनै बाके चरन पकड़ लए और उसकै डन्डौत करो। 10तब ईसु नै उनसै कैई, “डरौ मत, मेरे भईयौ के धौंरे जाऔ, और उनसै जाकै कैऔ, कै गलील कै चले जाऔ, बहीं बे मैंकै देखंगे।”
पैहरेदारौ दुआरा यहूदी नेताऔं कै घटना की खबर
11अबी बे बईयरैं रस्ता मैई हीं, कै कुछ पैहरेदार सैहर मै गए और जो कुछ भओ हो, उस सबकी खबर मुक्ख पुजारिऔं कै जा सुनाई। 12और मुक्ख पुजारिऔं और यहूदी नेताऔं नै मिलकै एक सला बनाई। और सिपाईऔं कै मोटी रकम देकै 13कैई कै बे लोगौ सै कैंऐ कै ईसु के चेला रात मै आए और जब हम सो रए हे बाकी लाहस चुरा कै ले गए। 14अगर तुमरी जौ बात राजपाल तक पौंचै है तौ हम बाकै समजा लंगे और तुमरे ऊपर कोई आँच ना आन दंगे। 15पैहरेदारौ नै रुपिया लेकै बैसोई करो जैसो उनकै बताओ गओ हो। और जौ बात यहूदिऔं मै आज तक इसई रूप मै फैली भई है।
चेलौ सै ईसु की बातचीत
(मरकुस 16:14–18; लूका 24:36–49; यहून्ना 20:19–23; चेलौ के काम 1:6–8)
16 #
मत्ती 26:32; मरकु 14:28 तब गियारै चेला गलील के उस पहाड़ के धौंरे गए, जहाँ ईसु नै बे बुलाए हे। 17और उनौनै ईसु को दरसन पाकै बाकै परनाम करो, पर किसी किसी कै मन मै सक भओ। 18फिर ईसु नै उनके धौंरे जाकै कैई, “सुरग और धरती को सैरो अधकार मैंकै देओ गओ है। 19#चेलौ 1:8इसताँई तुम जाकै सब जातिऔं के लोगौ कै चेला बनाऔ और उनकै अब्बा और पुत्तर और पबित्तर आत्मा के नाम सै जल संस्कार दो। 20और जिन बातौं की आगियाँ मैंनै तुमकै दई है, उनकै उनमै चलनो सिकाऔ, और देखौ, मैं दुनिया के अन्त तक हमेसा तुमरे संग रैहंगो।”
Voafantina amin'izao fotoana izao:
मत्ती 28: TKB
Asongadina
Hizara
Mampitaha
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
New Life Compute Institute [NLCI] - CC BY-NC-ND 4.0
