मत्ती 14
14
यहून्ना जल संस्कार दैनै बारे को कतल
(मरकुस 6:14–29; लूका 9:7–9)
1उस टैम राजा हेरोदेस नै ईसु की चरचा सुनी 2और अपने दरबारिऔं सै कैई, “जौ यहून्ना जल संस्कार दैनै बारो है, जो मरे भए मै सै जी उठो है, इसताँई बौ महान चमत्कार दिखा रओ है।” 3#लूका 3:19,20कैसेकै हेरोदेस नै अपने भईया फिलिप्पुस की बईयर हेरोदियास के बजै सै यहून्ना गिरप्तार करो और बांधकै जेलखाने मै डार दओ हो। 4कैसेकै यहून्ना नै बासै कैई ही कै, “इसकै रखनो तेरे ताँई ठीक ना है।” 5हेरोदेस यहून्ना कै मार डान्नो चाँहै हो, पर जनता सै डरै हो, कैसेकै बे उसकै नबी मानै हे। 6पर जब हेरोदेस को जलम दिन आओ, तौ हेरोदियास की लौंड़िया नै पौंहनेऔ के सामने नाच दिखाकै हेरोदेस खुस कर दओ। 7इसताँई उसनै कसम खाकै बचन दओ, कै जो कुछ तू माँगैगी, मैं तेकै दंगो। 8अपनी अईया के सिकाने मै आकै बानै कैई, “मैंकै इसई टैम थार मै यहून्ना जल संस्कार दैनै बारे की खोपड़ी मंगवा दे।” 9राजा हेरोदेस कै धक्का लगो, पर अपनी कसम और पौंहनेऔ के कारन बानै उसकी माँग पूरी कन्नै को आदेस दे दओ। 10और जेलखाने मै जल्लादौ कै भेजकै यहून्ना की खोपड़ी कटबा दई। 11और बाकी खोपड़ी थार मै लाई गई, और लौंड़िया कै दे दई गई, और बौ उसकै अपनी अईया के धौंरे ले गई। 12यहून्ना के चेला आकै उसकी लाहस ले गए, और दफना दई, और जाकै ईसु कै इसकी खबर दई।
पाँच हजार सै जादा लोगौं कै रोटी खबानो
(मरकुस 6:30–44; लूका 9:10–17; यहून्ना 6:1–14)
13जब ईसु नै जौ सुनो, तौ किसती मै चढ़कै बहाँ सै किसी सुनसान जघै मै चलो गओ, जब लोगौ कै इसको पतो चलो तौ बे सैहरौं सै लिकरकै पैदरई बाके पीछे हो लए। 14किसती सै उतरकै ईसु नै एक बड़ी भीड़ देखी, और उसकै उन लोगौ मै तरस आओ, और बानै उनके बेमारौं कै ठीक करो।
15जब साँज भई, तौ बाके चेलौ नै बाके धौंरे आकै कैई, “जौ तौ सुनसान जघै है और दिन छप गओ है, लोगौ कै बिदा करो जाय कै बे बस्तिऔं मै जाकै अपने ताँई खानो मोल ले लैं।” 16ईसु नै उनसै कैई, “उनको जानो ठीक ना है! तुमई उनकै खानै कै देओ।” 17उनौनै उस्सै कैई, “हिंया हमरे धौंरे पाँच रोटी और दो मच्छिऔं के सिबा कुछ ना है।” 18बानै कैई, “उनकै मेरे धौंरे लिआऔ।” 19तब ईसु नै लोगौ कै घाँस मै बैठनै को आदेस दे दओ, और बे पाँच रोटी और दो मच्छी लंई, और सुरग की ओर आँख उठाकै आसीस की पिराथना करी और रोटी तोड़-तोड़कै चेलौ कै दंई, और चेलौ नै लोगौ कै। 20सबनै खाँई और खाकै छक गए, और बचे भए टुकड़ौ सै बारैह पल्ला भरे गए। 21बईयरौं और बालकौ कै छोड़कै लगभग पाँच हजार मरदई मरद हे।
ईसु को पानी मै चलनो
(मरकुस 6:45–52; यहून्ना 6:15–21)
22इसके तुरन्त बाद ईसु नै अपने चेला मजबूर करे कै बे किसती मै चढ़कै उस्सै पैले पल्ली पार चले जाँय, इतने मै बौ लोगौ कै बिदा कर देगो। 23लोगौ कै बिदा करकै बौ इकले मै पिराथना कन्नै के ताँई पहाड़ मै चलो गओ, दिन छिपे तक बौ बहाँ इकलो हो। 24उस टैम किसती झील के बीच लहरौं सै डगमगा रई ही, कैसेकै हवा सामने की ही। 25सुबे के तीन सै छै बजे के बीच ईसु पानी के ऊपर चलते भए उनके धौंरे आओ। 26चेला उसकै पानी मै चलते भए देखकै घबरा गए! और कैललगे, “बौ भूत है,” और डर के मारे चिल्ला उठे। 27ईसु नै तुरन्त उनसै बात करी, और कैई, “हिम्मत रक्खौ, मैं हौं, डरौ मत।” 28पतरस नै जबाब दओ, “परभु अगर तूई है, तौ मैंकै अपने धौंरे पानी मै चलनै की आगियाँ दे।” 29उसनै कैई, “चलो आ।” पतरस किसती सै उतरो और पानी मै चलते भए ईसु की ओर बढ़ो। 30पर बौ तेज हवा कै देखकै डर गओ, और जब डूबल लगो तौ चिल्ला उठो, “हे परभु, मैंकै बचा।”
31ईसु नै तुरन्त हात बढ़ाकै बौ थाम लओ, और उस्सै कैई, “हे अल्प बिसवासी, तैनै काए सक करो?”
32जब बे किसती मै चढ़ गए, तौ हवा थम गई। 33जो किसती मै हे, उनौनै जौ कैते भए ईसु कै डन्डौत करकै कैई, सचमुच तू परमेसर को लौंड़ा है।
ईसु को भौस्से बेमारौं कै ठीक कन्नो
(मरकुस 6:53–56)
34बे पार उतरकै गन्नेसरत मुलक पौंचे। 35बहाँ के लोगौ नै ईसु पैचान लओ और आस पास के सब गामौ मै इसकी खबर फैला दई, और सब बेमारौं कै बाके धौंरे लाए। 36और उस्सै बिनती करल लगे, कै बौ उनकै अपने लत्ता को धोरोई छून दे, और जितनौ नै बौ छुँओ, बे सबके सब अच्छे हो गए।
Voafantina amin'izao fotoana izao:
मत्ती 14: TKB
Asongadina
Hizara
Mampitaha
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
New Life Compute Institute [NLCI] - CC BY-NC-ND 4.0
