Jeremià 41
41
1Kanjo tamin’ny volana fahafiton’io taona io ihany dia tonga tany amin’i Gedalià tao Mitsepà, niaraka tamin’ny olona folo lahy i Jismahela, zanakalahin’i Netanià sy zafikelin’i Elisamà; fianakavian’ny mpanjaka io Jismahela io sady anisan’ny manamboninahiny. Koa raha mbola teo am-pihinanana niaraka tamin’i Gedalià iny indrindra, 2dia nitsangana i Jismahela sy ireo folo lahy niaraka taminy, ka namely an’i Gedalià tamin’ny sabatra ary nahafaty azy; kanefa izy no voatendrin’ny mpanjakan’i Babilôna hitondra ny tany. 3Avy eo dia novonoin’i Jismahela ho faty koa ireo Jodeanina rehetra hitany tao Mitsepà niaraka tamin’i Gedalià, mbamin’ireo miaramila babilônianina izay tao.
Novonoin’i Jismahela ho faty ireo mpivavaka nanao fivahiniana masina
4Roa andro taorian’ny namonoana an’i Gedalià ho faty, dia tsy mbola nisy olona nahalala izany ihany. 5Koa nisy olona valopolo lahy avy any Sekema sy Silao ary Samaria, samy voaharatra ny volombavany sady voatriatra ny fitafiany ary voatetitetika ny tenany#41.5 Notetitetehina ny tena mba ho mariky ny fisaonana (Jer 48.37) na koa mba hanetsika ny fangorahan’ny andriamanitra (1 Mp 18.28). Ny volombava voaharatra sy fitafiana voatriatra dia mariky ny fisaonana na alahelo koa (Jereo 1.20; Hezrà 9.3).. Nitondra koba sy vovo-javamanitra mba hatao fanatitra ao an-tranon’ny TOMPO izy. 6Dia nivoaka hitsena azy avy tao Mitsepà i Jismahela sady nitomany teny am-pandehanana. Nony tonga teo aminy izy, dia nanao taminy hoe:
–Mandrosoa ao amin’i Gedalià zanakalahin’i Ahikama ianareo.
7Kanjo raha vao tonga tao afovoan’ny tanàna ireo, dia naringan’i Jismahela sy ny olony, ary natsipiny tao an-dava-drano ny fatiny. 8Nisy folo lahy tamin’ireo anefa niteny tamin’i Jismahela hoe:
–Aza vonoina izahay fa manana tahirin-tsakafo miafina any an-tsaha, dia varim-bazaha sy ôrza ary diloilo sy tantely.
Koa tsy nampamonoin’i Jismahela niaraka tamin’ireo namany izy folo lahy. 9Ny lava-drano izay nasain’i Jismahela nanipazana ny fatin’ireo olona novonoiny dia lava-drano lehibe izay nasain’i Asà mpanjaka noloahana fony izy niady tamin’i Bahasà#41.9 Asà, Bahasà: jereo 1 Mp 15.9-24. –lava-drano lehibe: araka ny dkt grika tranainy. mpanjakan’i Israely. Nofenoin’i Jismahela faty izany.
10Avy eo dia nentin’i Jismahela ho babo ny sisa tamin’ny mponina tao Mitsepà mbamin’ireo zanakavavin’ny mpanjaka, izany hoe ny olona rehetra napetrak’i Nebozaradàna lehiben’ny mpiambina tamin’i Gedalià; ka nitondra ireo babo ireo i Jismahela no lasa nankany amin’ny Hamônita.
Voaavotra ireo olona babon’i Jismahela
11Ary ren’i Johanàna, zanakalahin’i Karea mbamin’ireo lehiben’ny andia-miaramila niaraka taminy ny ratsy rehetra efa nataon’i Jismahela. 12Koa nanangona ny miaramilany rehetra izy ary niainga hanafika an’i Jismahela, ka nahatratra azy teo akaikin’ny farihin’i Gibehôna. 13Nony nahita an’i Jôhanàna sy ireo lehiben’ny andia-miaramila niaraka taminy ny olona rehetra teo amin’i Jismahela, dia faly. 14Ary ny olona rehetra izay nentin’i Jismahela ho babo avy tao Mitsepà dia niverina ilalana ka nanatona an’i Jôhanàna. 15Fa i Jismahela niaraka tamin’olona valo lahy kosa dia nandositra teo anatrehan’i Jôhanàna ka nankany amin’ny Hamônita.
16Taorian’izany i Jôhanàna sy ireo lehiben’ny andia-miaramila niaraka taminy dia niandraikitra ny olona sisa rehetra izay nentin’i Jismahela ho babo avy tao Mitsepà taorian’ny namonoany ho faty an’i Gedalià zanakalahin’i Ahikama; ireo olona sisa rehetra ireo dia ny lehilahy mpiady sy ny zaza amam-behivavy ary ny tandapa, izay nentina niverina avy tany Gibehôna. 17Ary nandeha izy rehetra ka nijanona nitoby tao Kimehàma akaikin’i Betlehema. Fa nikasa hankany Ejipta izy, 18satria natahotra ny Babilônianina hatramin’ny namonoan’i Jismahela an’i Gedalià izay notendren’ny mpanjakan’i Babilôna hitondra ny tany.
Voafantina amin'izao fotoana izao:
Jeremià 41: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.