MATIUS 9

Yesus Kiperbor Numom Sengoi Lumpoh

(Mrk 2:1-12; Luk 5:17-26)

1Yesus Kitebot nanek perahu ru Kilintas nu englag tasek, lalu Kilei nu pekan tempat Iginei.#9:1 Pekan tempat Iginei: Pekan Kapernaum. Neng Mat 4:13. 2Memerip urag keral naien nu Kek numom keral lumpoh de kidak ku kemil ceruk. Bile Yesus Kineng iman enai ihad entoi, Kek Kiurok nu sengoi lumpoh ajeh, “Agok risau, bei! Dosa hek ya biampon.”

3Memerip guru Hukom Taurat de mong ku pajeh naiserakngik Yesus Kihina ha Jenang.

4Yesus Kipanei ma de naiserngik lalu Kiurok, “Yama engkeserngik pekare de jehat ajeh? 5Eng buleh Ngurok nu sengoi adeh, ‘Dosa hek ya biampon.’ Eng juga buleh Ngurok nu kek, ‘Kosloh ru ciploh.’ Kek belok nanek antare nar bengwal ajeh de engkerasa senang Ngurok? 6Tapi Nghod engkepanei hal adeh: Eng Kenon Manusia bekuasa Ngampon dosa ku bumi adeh.” Lalu, Yesus pen Kiurok nu sengoi lumpoh ajeh, “Kosloh, kot ceruk hek ru jogloh.”

7Sengoi lumpoh ajeh pen kikos lalu kijog nu imadeg. 8Bile mai jengoi naineng hal ajeh, enai ihad naisengoh ru naipateh ha Jenang de Kiog Ikuasa de begei ajeh nu manusia.

Yesus Kicereg Matius

(Mrk 2:13-17; Luk 5:27-32)

9Telas Yesus Kiet ju kenjeh Kek Kibakek numom sengoi imuh Matius tengah kigei ku tempat kenutep cukei. Yesus Kiurok nu kek, “Beiloh joi Eng.” Matius pen teros kikos ru kijoi Yesus.

10Mase Yesus tengah Kicakcak ku deg Matius, hol jeoi pengutep cukei de kilek ru mai-mai bedosa. Enai naicakcak besama Yesus ru Ipengikot-pengikot. 11Memerip urag mai Farisi de naineng hal ajeh naitanya nu pengikot-pengikot Yesus, “Yama guru engkek Kicak besama ru pengutep cukei ru mai bedosa?”

12Yesus Kicerngai ha tenanya enai ajeh lalu Kiberlag, “Sengoi sihat pek kiperlu ha dokte, had sengoi de nyik taleh. 13Belajarloh ma ireti engrok Alkitab adeh: ‘Eng nghod engkeperneng neyayak, apeka engkeog pesembahan korban binatag.’ Belajarloh ju engrok ajeh kerana Eng pek Nghol Ngha-cereg ha sengoi de naianggap diri liknai ajeh mai de benar tapi Ngha-cereg ha sengoi de naiaku liknai ajeh mai bedosa.”#Hos 6:6

Tenanya tentang Hal Puase

(Mrk 2:18-22; Luk 5:33-39)

14Telas ajeh pengikot-pengikot Yohanes Pembaptis naihol nu Yesus ru naitanya, “Jik ru mai Farisi jibepuase tapi yama pengikot-pengikot Jen pek naibepuase?”

15Yesus Kiberlag ya perumpamaan adeh: “Bulehka tengloh naibesedeh ku arik jekneg selagi penganten keral lekat mong besama ru enai? Tentuloh tok! Tapi doh lei imase penganten keral ajeh birampas ju enai. Ku mase ajehloh doh naibepuase.

16Tenateg de mong ku abat manah pek buleh hitampal ru abat pai kerana tenampal pai ajeh doh kikecot ru kiteg abat de manah lalu itenateg ajeh kigu-entoi. 17Begei ajeh juga, teu wain pai pek buleh bikoh nu kateh bekas getek manah. Amen hibeh begei ajeh, bekas getek ajeh doh kitateg lei teu wain ajeh kisaruk ru bekas ajeh kirusak. Teu wain pai hodloh bikoh nu kateh bekas getek de pai supaye rimnar ajeh lekat bor.”

Kenon Kerdor Pemimpen Deg Sembahyang ru Kerdor de Kinyik Jekjot

(Mrk 5:21-43; Luk 8:40-56)

18Tengah Yesus Kibelwal ru pengikot-pengikot Yohanes Pembaptis, numom pemimpen deg sembahyang kihol ru kibelutot ku ngar Yesus ru kiurok, “Kenon kerdor eng pai kidat. Tapi, holloh nu madeg eng ru dekloh teg Jen ku kek supaye kisui nij.”

19Lalu Yesus Kikos ru Kijoi sengoi ajeh. Pengikot-pengikot Yesus pen naijoi sama. 20Ku pajeh mong numom kerdor de ya 12 tahut kitanggong jekjot behip de pek behenti-henti de bepunca ju kibebehip. Kek kiperek nu celod Yesus ru kipep mol jubah Yesus. 21Kerdor ajeh kiserakngik, “Ngpep Ijubah taleh pen ya tentu eng doh ngbor.”

22Yesus Kiceleg ru Kibakek kerdor ajeh ru Kiurok, “Agokloh sengoh, bong! Kerana hapecaya nu Eng, hek ya habor!” Ku sarik jijeh juga kerdor ajeh kibor.

23Bile Yesus ya Kilei nu deg pemimpen deg sembahyang ajeh, Kek Kineng pemaen muzik pekabongan ru dikdij sengoi ku pajeh ya naijadi kecoh. 24Kek Kiurok, “Etloh ju kendeh dikdij liengkek! Sanget adeh pek kidat. Kek kibukbet taleh!” Tapi dikdij mai nailog ha Yesus. 25Telas naiet ju kenjeh, Yesus Kimuj nu bilek sanget kerdor ajeh lalu Kicap iteg. Sanget ajeh pen kikos. 26Gah ajeh cep nu jap-jap daerah ajeh.

Yesus Kiperbor Nar Mom Sengoi Buta

27Ku mase Yesus Kiet ju kenjeh, mong nar mom mai buta baijoi Kek. Baicereg, “Kenon-cenok Raja Daud, yayakloh jar.”

28Bile Yesus Kimuj nu kateh deg, ubai perek nu Kek. Yesus Kitanya nu ubai, “Jerkepecayaka Eng dapat Ngperbor jerkek?”

“Hooh, Tuhan!” ubai berlag.

29Lalu Yesus Kipep mat ubai ru Kiurok, “Kerana jerkepecaya, tejadiloh ma de jerkehod!” 30Lalu ubai ya dapat bainengneng. Yesus tegas Kiog bengsat nu ubai, “Wes agok pasal hal adeh nu bok-bok pen.”

31Tapi ubai et ru baipasal gah tentang Yesus nu jap-jap daerah ajeh.

Yesus Kiperbor Numom Sengoi Bisu

32Bile ubai ajeh ya baiet, numom sengoi bisu de bisangrog ya nyanik bien nu Yesus. 33Telas nyanik ajeh biperet ya Yesus, sengoi bisu ajeh ya dapat kibelwal. Mai jengoi cengang empag enai naineng hal ajeh ru naiurok, “Pek pernah jineng hal de begei adeh ku Israel!”

34Tapi mai Farisi naiurok, “Kek Kiperet nyanik-nyanik ya kuasa raknak nyanik-nyanik.”

Yesus Kiyayak Mai Jengoi

35Telas ajeh Yesus Kiet nu jap-jap pekan ru kampug. Kek Kibeajar ku deg-deg sembahyang ru Kiperlei Gah Bor tentang begeiharok Jenang Kimemerintah sebegei Raja. Kek juga Kiperbor jeoi mai ju dikdij nyaknik. 36Bile Kek Kineng mai jengoi ajeh, Kek Kiyayak ha enai kerana naileteh ru pek naibedaye, enai begei ha dombe de pek begembale. 37Jadi, Yesus Kiurok nu Ipengikot-pengikot, “Kiknej ihad jeoi tapi mai kerakjak nek gek. 38Kerana ajeh, semanjloh nu Tuan selai ajeh supaye Kingeng gulebeh nij mai kerakjak ha kiknej ajeh.”

Voafantina amin'izao fotoana izao:

MATIUS 9: AEH

Asongadina

Dika mitovy

Mampitaha

Hizara