मत्ति 28
28
इसु सिकासो सिन्हुका
(मरकुस १६:१-११; लुका २४:१-१२; युहन्ना २०:१-१८)
1माइसाका दिनाको जुम्निदिना देउबार एअ् र्हिमाङ मरियम मग्दलिनि रो भेनेङ मरियम इसुहेङ ताअ्का तोम खाङलि लोहि। 2इङको पहर एकासि बारका भुइचाल हानिहि, हाइपानु परमप्रभुको एलोङ स्वरगदुत स्वरगसो लेता खुअ्हि रो लोतेङ उन्ठुइ लाअ्पातेङ इङकोङर्हुता योम्हि। 3वाको रुप बिजुलिभाइपाङ चोलका रो धाबा हिउँभाइपाङ जेका हिघाहि। 4वासेहेङ थितेङ इङको र्हुमकालाइ फिरहि रो सिका द्याङभाइपाङ जेङहि।
5कालाउबुङ स्वरगदुत इङको बेबालाइहेङ दोअ्हि, “माथिसु, हाइदोनु का गिखा, नेलाइ कुरुसता टाइगाइन्हाका इसुहेङ भोदोङसुखेना। 6वा इता मान्थु, हाइपानु वाको दोअ्का भाइपा वा सिन्हुतेङ ल्होका हि। लोसु, वासेहेङ ताअ्का थामे खाङसु। 7कालाउ मारफा हानितेङ वाको चात्यागेलाइहेङ बानाल पिसु, ‘प्रभु ते सिकासो सिन्हुतेङ ल्होका हि रो वा नेलाइखान्तेङ लाम्फा गालिलता हानिदोङखे। नेलाइ वासेहेङ इन्ता तिङस्वाना।’ हिङसु, का नेलाइहेङ इदोइ खिनिङ दोअ्लि लोघा।”
8इङकोभाअ्सिङ इङको बेबालाइ थिहि बुङ रो हेन्जा लेङचाहि बुङ। एम्बालाइ ओदोङघरि तोमसो ओल्हिहि रो वाको चात्यागेलाइहेङ बानाल पिलि धाअ्हि।
9एकासि इसु एम्बालाइहेङ दुसुतेङ दोअ्हि, “नेलाइहेङ सान्ति ज्याको!” एम्बालाइ भेरपा लोतेङ वाको खोकोइ साइतेङ वासेहेङ सेउपाहि। 10कालाउ इसु एम्बालाइहेङ दोअ्हि, “माथिसु, हानितेङ काङको ओनेगेलाइहेङ गालिलता हानिलि दोअ्पिसु। इन्ता दोङ एम्बालाइ कासेहेङ तिनावा।”
सिपाल्हाइको चुमाका बानाल
11इङको बेबालाइ हानिकान्हुअ्सो तोम र्हुमका आधिमि सिपाल्हाइ बुङ पुरभारि हानिहि रो तोमता हिका गोताङ काथागेलाइ मुल धामिगेलाइहेङ हिङपाहि। 12जेलाउ मुल धामिगेलाइ आगुवागेलाइदोफा जोम्तेङ साल्हा पाहि कालाउ एम्बालाइ सिपाल्हाइहेङ हेन्जा टाका पितेङ दोअ्हि, 13“नेलाइ एसा दोअ्सु, ‘न्हिसिङता केलाइ निन्धाका पहरता इसुको चात्यागेलाइ लोतेङ वाको सिका जिउ खुतेङ चुमपुहि।’ 14हिसोङ रोमि बाराहाकिमको न्हातोङता इदोइ काथा थुकानु, केलाइ वाकोदोफा काथा मिलिपातेङ नेलाइहेङ जोगाइप्याङ।” 15कालाउ सिपाल्हाइ इङको टाका र्हुहि रो धिरपाकाभाइपाङ पाहि। इदोइ काथा यहुदिगेलाइको माझाता एलाथिकापा बुङ चारचाराइ दोङखे।
प्रभुको पिका हुकुम
(मरकुस १६:१४-१८; लुका २४:३६-४९; युहन्ना २०:१९-२३; साल्तेङ दिङगिल्का १:६-८)
16इङको तेएअ्मि चात्यागेलाइ गालिलको इङको आरदाङता हानिहि, जेता इसु एम्बालाइहेङ हानिलि हुकुम पिका हिघाहि।#मत्ति २६:३२; मरकुस १४:२८ 17एम्बालाइ वासेहेङ तिङतेङसाङ वाको आगाता तिर्हो थोतेङ सेउपाहि, कालाउबुङ एम्बालाइता आधिमिचाहिँ साङखा पाहि। 18कालाउ इसु भेरपा लोतेङ एम्बालाइहेङ दोअ्हि, “खाङसु, स्वरग रो सुमिङता गोताङ खाबारा कासेहेङ पिका हि। 19इदोइभाअ्सिङ नेलाइ हानितेङ गोताङ मुलुकको द्याङगेलाइहेङ चात्या बान्हाइसु। आबा, चान रो पुनित हाङसाको मिङता एम्बालाइहेङ चिभुअ्लि पिसु।#साल्तेङ दिङगिल्का १:८ 20का नेलाइहेङ हुकुम पिका गोताङ काथा मानिलि एम्बालाइहेङ धिरपासु। खाङसु, का सुमिङको न्हुअ्थिकापा दिनाङ नेलाइदोसाङ ह्याङका।”
Voafantina amin'izao fotoana izao:
मत्ति 28: DHIM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2025 by Nepal Bible Society and Wycliffe Bible Translators, Inc.
