ಮತ್ತಾಯ 18
18
ಕ್ಹುದಾನಿ ರಾಜ್ಯಮಾ ಮ್ಹೊಟು ಕುನ್ನ ವ್ಹೈ?
(ಮಾರ್ಕ 9:33-37; ಲುಕ 9:46-48)
1ತೆ ಟೈಮಮಾ ಶಿಷ್ಯಾ ಯೆಸುಕನ ಐನ, ಪರಲೊಕ ರಾಜ್ಯಮಾ ಕುನ್ನ ಮ್ಹೊಟು ವ್ಹೈ? ಕೈನ ಪುಚ್ಯಾ. 2ಯೆಸು ನ್ಹಾನಾ ಬಚ್ಚಾ಼ನೆ ಕ್ಹಾಮೊ ಬಲೈನ ತ್ಯುನಾ ವಚ್ಮಾ ಹುಬ್ರಾಡಿನ, 3ತ್ಯುನೊನೆ ತುಮಾರು ಮನಸ್ಸ ಬದಲಾವಣೆ ಥೈನ ನ್ಹಾನಾ ಬಚ್ಚಾ಼ ನಿಂಗತ ನೈ ಥಯುಮ ತುಮೆ ಪರಲೊಕ ರಾಜ್ಯಮಾ ಆತಾ ನೈ ಕೈನ ತುಮೊನೆ ಕ್ಹರಿಜ ಕೌಸ. 4ಅಮ್ಮ ರ್ಹತಾಮಾ ಕುನ್ನ ಆಂ ನ್ಹಾನಾ ಬಚ್ಚಾ಼ ನಿಂಗತ ತಿನೆ ತೆಜ಼ ತಗ್ಗಿಸಿಲಿವಸ ತೆಜ಼ ಪರಲೊಕ ರಾಜ್ಯಮಾ ಮ್ಹೊಟೊ ವ್ಹೈ. 5ತೆನೈಸೊ ಕುನಬಿ ಮಾರಾ ನಾಮಮಾ ಹವಾ ನ್ಹಾನಾ ಬಚ್ಚಾ಼ನೆ ಮಳೈಲಿವಸತೊ ತೆ ಮನೆಜ಼ ಮಳೈಲಿವಾಲೊ ಥಯೊಸ.
6ತೆನೈಸೊ ಮಾರಾಮಾ ಭರೊಕ್ಹೊ ಮ್ಹೆಲಾಲಾ ಆಂ ನ್ಹಾನಾವೊಮಾ ಯಕ್ಲಾನೆ ಕುನಬಿ ಅಡ್ಡಿ ಕರ್ಯಾಮ ತ್ಯವಾನಿ ಗರ್ದನ ಮ್ಹೊಟಾ ದಗ್ಡಾನೆ ಭಾಂದಿನ ತಿನೆ ಸಮಂದರಮಾ ಡುಬಾಡಿ ಪಡಾನು ತಿನೆ ಚೊ಼ಕು ವ್ಹೈ. 7ಮನಕ್ಹೊನೆ ಪಾಪನೆ ಚ಼ಲಾವಾನಾ ಸಂಗತಿಯೊನಾಹುತಿ ಮಿ ಆಂ ಲೊಕನಾ ವಿಷಯಮಾ ದುಖ ಪಡ್ದುಸ. ತೆ ಕೆಳಾಮಾಬಿ ರ್ಹವಸ. ತೆನೈಸೊ ತಿನೆ ಕಾರಣ ಥಾವಾನಾ ಮನಕ್ಹನೆ ಘನ್ನು ತ್ರಾಸ ಥಾವಸ. 8ತಾರೊ ಹತ್ತ ರ್ಹವಾದೆ ತಾರೊ ಪಗ್ಗ ರ್ಹವಾದೆ ತುನೆ ಪಾಪಮಾ ಕ್ಹಾಪ್ಡಾವರಕ್ಹು ರ್ಹಯಾಮ ತಿನೆ ಕತ್ರಿನ ಭಿರಕೈ ಪಡ. ಭಂಬೆ ಹತೊ, ಬೆ ಪಗೊವಾಲೊ ರ್ಹಯಲವಾಲೊ ನಿತ್ಯ ಆಗಮಾ ಘಾಲಾತಿ ಅಂಗವಿಕಲ ಥಯಲ ನೈತೊ ಲಂಗ್ಡೊ ಥಯಲ ಜಿವನಾಮಾ ಸೆರಾನು ತುನೆ ಚೊ಼ಕು ವ್ಹೈ.
9ತಾರಾ ಡೊಳಾ ತುನೆ ಪಾಪಮಾ ಕ್ಹಾಪ್ಡಾಯಾರೆ ತಿನೆ ಕಿತ್ತಿನ ಭಿರಕೈ ಪಡ. ಬೆ ಡೊಳಾ ರ್ಹಯಲವಾಲೊ ಆಗನಾ ನರಕಮಾ ಪಡಾತಿ ಯಕ್ಕಜ಼ ಡೊಳಾವಾಲೊ ಥೈನ ಜಿವನಮಾ ಸೆರಾನು ತುನೆ ಚೊ಼ಕು ವ್ಹೈ. 10ಆಂ ನ್ಹಾನಾವೊಮಾ ಯಕ್ಲೊಬಿ ತಪ್ಪ ಕರೆವಾಚಿ ದೆಕಿಲಿವೊ. ಕಾಕದ್ಯಾಮ ಪರೊಲೊಕಮಾ ರ್ಹವಾನಾ ದುತೊ ಮಾರಾ ಸ್ವರ್ಗನಾ ಬಾನಾ ಮ್ಹೊಡಾನೆ ದೆಕ್ತಾ ರ್ಹವಸತೊ ಕೈನ ತುಮೊನೆ ಕೌಸ. 11ಮನಕ್ಹನೊ ದಿಕ್ರೊ ಕೆಟ್ಟಿನ ಗಯಲವಾಲಾವೊನೆ ಹುಡ್ಕಿನ ರಕ್ಷಾ ಕರಾನಾಹುತಿ ಆಯೊಸ.
ಜ಼ವೈ ಗಯಲ ಬಕ್ರಾನು ಸಾಮ್ಯ
12ತುಮಾರಾಮಾ ಯಕ್ಲಾ ಮನಕ್ಹನೆ ಕ್ಹೊ ಬಕ್ರಾ ರ್ಹಯಾಮ ತ್ಯುನಾಮಾ ಯಕ್ಕ ಬಕ್ರು ತಪ್ಸಿಲಿನ ಗಯುಸ ಕೈನ ಮ್ಹೆಲ್ಲಿವೊ. ತೆಳಾಮಾ ತುಮೊನೆ ಸು ಲಾಗಸ? ತೆ ಉಗ್ರಲ ನೌವದಪರನೌ ಬಕ್ರಾವೊನೆ ಡೊಂಗರಪರ ಛೊಡಿನ ತಪ್ಸಿಲಿನ ಗಯಲ ತೆ ಯಕ್ಕ ಬಕ್ರಾನೆ ಹುಡ್ಕಿಲಿನ ನೈ ಜಾ಼ತಾ ಸು? 13ತೆ ತಿನೆ ಮಳ್ಯಾರೆ, ನೈ ತಪ್ಸಿಲಿನ ರ್ಹವಾನಾ ನೌವದಪರ ನೌ ಬಕ್ರಾತಿಬಿ ತೆ ಯಕ್ಕ ಬಕ್ರಾನಾಹುತಿ ಘನ್ನೊ ಖುಷಿ ಥಾವಸ ಕೈನ ತುಮೊನೆ ಕ್ಹರಿಜ಼ ಕೌಸ. 14ತಿಮ್ಮಜ಼ ಆಂ ನ್ಹಾನಾವೊಮಾ ಯಕ್ಲೊಬಿ ನಾಶ ಥೈನ ಜಾ಼ವಾನು ಪರಲೊಕಮಾ ರ್ಹವಾನಾ ತುಮಾರಾ ಬಾನೂ ಚಿತ್ತ ನವೈ.
ತಪ್ಪ ಕರಲ ಭೈನೆ ಸಿದಾ ಕರಲ
15ತಾರೊ ಭೈ ತಾರಾ ವಿರುದ್ದ ತಪ್ಪ ಕರ್ಯಾರೆ, ಗೈನ ತು ತೆ ಯಕ್ಲೊಜ಼ ರ್ಹತಾಮಾ ತಿನೊ ತಿನೆ ಅರು ಥೌ ಕೈನ ತಿಳಸಾ. ತೆ ತಾರಾ ವಾತನೆ ಐಕ್ಯಾಮ ತಾರಾ ಭೈನೆ ತು ಕಮೈಲೆಶಿ. 16ಪಾಚಾ಼ತೊ ತೆ ತಾರಿ ವಾತ ನೈ ಐಕ್ಯಾಮ ಬೆ ತನ್ನ ಸಾಕ್ಷಿಯೊನಾ ಮ್ಹೊಡಾಕ್ಹು ಹರಿಯಕ್ಕ ವಾತ ಸ್ಥಿರ ಪಡಸಾನಾಹುತಿ ಯಕ್ಲಾನೆ ನೈತೊ ಬೆಜ಼ನಾವೊನೆ ತಾರಾ ಕ್ಹಾತೆ ಬಲೈಲಿನ ಜಾ಼. 17ತೆ ತ್ಯುನಿ ವಾತ ನೈ ಐಕ್ಯಾಮ ತೆ ವಾತನೆ ಸಭೆಮಾ ಕೆ. ತೆ ಸಭೆನಾ ವಾತೊನೆ ನೈ ಐಕ್ಯಾಮ ತೆ ತುನೆ ಅನ್ಯ ನಿಂಗತಬಿ ಸುಂಕವಾಲಾ ನಿಂಗತಬಿ ರ್ಹವಾದೆ.
18ಭುಲೊಕಮಾ ತುಮೆ ಸುಸು ಭಾಂದೊಶಿ ತೆ ಪರಲೊಕಮಾಬಿ ಭಾಂದಲ ರ್ಹವಸ. ವರಿ ಭುಲೊಕಮಾ ಸುಸು ಕ್ಹೊಲೊಶಿ ತೆ ಪರಲೊಕಮಾ ಕ್ಹುಲಸ ಕೈನ ತುಮೊನೆ ಕ್ಹರಿಜ಼ ಕೌಸ. 19ತೆನೈಸೊ ತುಮಾರಾಮಾ ಮಾಂಗಿಲಿವಾ ಅಕ್ಲು ಕಯುಬಿ ರ್ಹೈತಬಿ ಯಕ್ಕ ವಿಷಯನಾಹುತಿ ಭುಲೊಕಮಾ ಯಕ್ಕಜ಼ ಮನಸವಾಲಾ ಥಯಾಮ ತೆ ಪರಲೊಕಮಾ ರ್ಹವಾನಾ ಮಾರಾ ಬಾಕ್ಹು ತ್ಯುನೊನೆ ಥಾವಸ ಕೈನ ತುಮೊನೆ ಕೌಸ. 20ಕಾಕದ್ಯಾಮ ಬೆಜ಼ನಾ ರ್ಹೈನೆಕಾ ತನ್ನಜ಼ನಾ ರ್ಹೈನೆಕಾ ಮಾರಾ ನಾಮಂಪರ ಮಳಿನ ಕಿಜಾ಼ ಆವಸ ತ್ಯುನಾ ವಚ್ಮಾ಼ ಮಿ ರ್ಹೌಸ. ಕೈನ ಕದ್ಯೊ.
ಕರಣಾ ನೈ ರ್ಹಯಲ ಸೆವಕನಿ ಸಾಮ್ಯ
21ತೆಳಾಮಾ ಪೆತ್ರಾ ತಿಕನ ಐನ, ಕರ್ತಾ ಮಾರೊ ಭೈ ಮಾರಾ ವಿರುದ್ದ ಪಾಪ ಕರ್ಯೊಮ ಕೆಕ್ಲಿಸಲಾ ತಿನೆ ಮಾಫ ಕರು? ಕ್ಹಾತ ಸಲಾ ಸು? ಕೈನ ಕದ್ಯೊ. 22ಯೆಸು ತಿನೆ, "ಕ್ಹಾತ ಸಲಾ ಕೈನ ನೈ ಸತ್ತರಪರ ಕ್ಹಾತ ಸಲಾ” ಕೈನ ಮಿ ತುನೆ ಕೌಸ. 23ತಿನಾಹುತಿ ಪರಲೊಕ ರಾಜ್ಯ ತಿನಾ ಆಳೊಕ್ಹು ಲೆಕ್ಕೊ ಲಿವಾನಾ ಯಕ್ಕ ರಾಜಾ಼ನೆ ಹೊಲಿಕೆ ಥೈಸ. 24ತೆ ಲೆಕ್ಕೊ ಲಿವಾನೆ ಶುರು ಕರ್ತಾಮಾ ದಕ್ಹ ಹಜಾ಼ರ ಕ್ಹೊನಾನಾ ಬಿಲ್ಲಾ ದಿವಾಲಾ ಆಳನೆ ತೆ ರಾಜಾ಼ಕನ ಲಾಯಾ. 25ತೆ ಸಾಲಾ ತಿರ್ಸಾನೆ ತಿಕನ ಸುಜ಼ ನೈ ರ್ಹಯಲಕ್ಹು ತಿನೊ ಮಾಲಕ ತಿನೆ, ತಿನಿ ಬೈಕೊನೆ, ಬಚ್ಚಾ಼ವೊನೆ ತಿನೆ ರ್ಹಯಲ ಕ್ಹಾರು ಇಕ್ಕಿನ ತೆ ಸಾಲಾ ದ್ಯು ಕೈನ ಅಪ್ಪಣೆ ದಿದ್ಯೊ.
26ತೆಳಾಮಾ ತೆ ಆಳ ಉಂದಾ ಗುಡಗಾ ಘಾಲಿನ ತಿನು ಮಾತು ಝುಕೈನ ಮಾಲಕನೆ, "ಮಾಲಕ, ಮಾರಾ ಉಪ್ಪರ ತಾಳ್ಮೆ ರ್ಹವಾದೆ, ತಾರು ಕ್ಹಾರು ಮಿ ದ್ಯುಸ” ಕದ್ಯೊ. 27ತೆ ಆಳನೆ ರಾಜೊ಼ ಕನಿಕರ ಪಡಿನ ತಿನೆ ಛೊಡೈನ ತೆ ಸಾಲಾ ಕ್ಹಾರಿ ಮಾಫ ಕರಿ ಪಡ್ಯೊ. 28"ಪಾಚ಼ಲ್ತೊ ತೆ ಸೆವಕ ಭಾರೊ ಐನ ತಿನೆ ಕ್ಹೊ ರುಪ್ಪಾನಾ ಬಿಲ್ಲಾ ದಿವಾಲಾ ಯಕ್ಕ ಆಳನೆ ದೆಕಿನ ತಿನೆ ಧರಿನ ನಡ್ಡಿ ಚಿಕಲಿನ, ಮಾರಿ ಸಾಲಾ ಫೆಡ’ ಕೈನ ಕದ್ಯೊ. 29" ತೆನೈಸೊ ತಿನಾ ಕ್ಹಾತೆ ಆಳಬಿ ಉಂದಾ ಗುಡ್ಗಾ ಘಾಲಿನ ಮಾರಾ ಉಪ್ಪರ ತಾಳ್ಮೆ ರ್ಹವಾದೆ ಮಿ ತಿರಸುಸ’ ಕೈನ ಮಾಂಗಿಲಿದ್ಯೊ. 30" ತೆನೈಸೊ ತೆ ಒಪ್ಪೆವಾಚಿ ಗೈನ ತೆ ಸಾಲಾ ತಿರಸಾಯೆ ಲಕ್ಕಾ ತಿನೆ ಜೆಲಮಾ ಘಲಾಯೊ.
31ತಿನಾ ಕ್ಹಾತೆ ಆಳೊ ಥಯಲ ಸಂಗತಿಯೊನೆ ದೆಕಿನ ಘನ್ನಾ ದುಖ ಪಡ್ದಿನ ತಿನಾ ರಾಜಾ಼ಕನ ಐನ ಥಯಲ ಕ್ಹಾರು ತಿಕನ ಕದ್ಯಾ. 32ತೆಳಾಮಾ ತೆ ರಾಜೊ಼ ತಿನೆ ಬಲೈನ, ‘ಎ, ದುಷ್ಟ ಆಳ, ತು ಮನೆ ಮಾಂಗಿಲಿದಲಕ್ಹು ತಾರಿ ಸಾಲಾ ಕ್ಹಾರಿ ಮಾಫ ಕರ್ಯೊಸ. 33ಮಿ ತುನೆ ಮರಗಲ ನಿಂಗತ ತುಬಿ ತಾರಾ ಕ್ಹಾತೆ ಆಳನೆ ಮರಗಾನು ವ್ಹತು? ತಿಮ್ಮ ಕೈನ 34ರಾಜೊ಼ ಸಿಟ್ಟ ಥೈನ ತಿನೆ ದಿವಾನಿ ಸಾಲಾನೆ ತಿರಸೆಲಕ್ಕಾ ತಿನೆ ಪಿಡ್ಸಾಲಾವೊನಾ ಹತೊಮಾ ದ್ಯುಸ. 35" ತುಮಾರಾಮಾ ಹರಯಕ್ಲೊ ತಾರಾ ಭೈನೆ ಮನಸಕ್ಹು ನೈ ಮಾಫ ಕರ್ಯಾಮ ಮಾರೊ ಬಾಬಿ ತುಮೊನೆ ತಿಮ್ಮಜ ಕರಸ ಕೈನ ಕದ್ಯೊ.
Voafantina amin'izao fotoana izao:
ಮತ್ತಾಯ 18: Srr25
Asongadina
Hizara
Mampitaha
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Sikkiligar Bible © The Word for the World International and Sikkiligar Bhasha Samiti, Madhya Pradesh, 2025
