मत्ती 24
24
मंदिर को नास होवनो को बारे मा सांगनो
(मरकुस 13:1-2; लूका 21:5-6)
1जबा यीसु मंदिर लक हिटके दुहुर जाय रहयो होतो। तबा वोको चेला गीन वोको जवर आइन, अना मंदिर कना ईसारा करके ध्यान देवन कव्हन लगीन। 2तबा यीसु ना उन लक कव्हयो “ हव तुमी यो सब चोव रही सेव मी तुमरो लक खरो सांगसू इनमा एक भी गोटा नही सोड़यो जाहेत सब खाल्या फेकयो जाहेत।”
संकट अना मुसीबत
(मरकुस 13:3-13; लूका 21:7-19)
3जबा उ जैतून को पहाड़ मा बसो होतो, तबा चेला हुन ना वोला नीजी तौर मा कहीन, “सांगो यो गोस्टी कबा होयेत? मनजे अखीन संसार को अखट्ट को काजक हिदान होयेत? तोरो आवन को अना दुनियाँ को आखीर को काजक हिदान होहेत?”
4यीसु ना जवाब दियो, “सतरक रव्हने” तुमीला कोनी नोको बहकाय। 5लगत सो लोक गीन आयके, ना तुम्ही ला सांगेत“ का मी मसीह सेउ।” अना गजब, लोक गीन बहक जाहेत। 6तुमी लडाई-वडाई की गोस्टी आयको, तबा नोको डरावना काहेका असो होवनो जरुरी से, पर यो आखीर नाहत। 7लोक को विरोध मा लोक, अना राज को विरोध मा राज, उभो होहेत। जघा-जघा मा गीरानी पडहेत, अना भुईडोल होहेत। 8असो मान लेव का लेकरा होवन को दरद जसो दरद को सुरुवात से।
9“वोना बेरा लोक तुमला धराके मार डाखेत, अना तगांहेत, अना मोरो नाव को कारन सब जाती को लोकगीन तुमरो बैरी भई जाहेती।#मत्ती 10:22 10वोना बेरा मा गजब बिस्वासी गीन को भरोसा थन्डो पड़ जाहेत, अना वय एक दुसरो ला धरायेत, अना एक दुसरो लक घीरना करयेत। 11गजब सो खोटो भविस्यवक्ता पैदा हो जाहेत, अना गजब लोकगीन ला बहका देहेत। 12अधरम अना बुरो करम बढनो लक सब लोकगीन को माया थन्डो भई जाहेती। 13पर जोन अखीर धीरज राखेत, सब सह लेहेत, वोच बचायो जाहेत।#मत्ती 10:22 14यो परमेस्वर को राज को साजरो बारता सारो संसार मा लोकगीन जवर मुनादी करयो जाहेत। तबा सारो, संसार मा गवाही भय जाहेत तबा आखीर आ जाहेत।”
मोठो संकट को सुरुआत
(मरकुस 13:14-23; लूका 21:20-24)
15“ यो काजी जब तुमी उ ‘उजाड़न वालो, बेकार चीज ला’ चोवो, जेनको चरचा भविस्यवक्ता दानीयल को किताब मा से, पवीतर जघा मा उभो चोवयो।” (जो वाचेत वोला समजमा आय जाहेत) 16तब जोन यहुदिया नगर मा से उ सब पहाड़ी मा पराय जाय। 17अना जोन घर को छत मा से उ जुनूस लेवन ना उतरे।#लूका 17:31 18अना जोन खेत मा से, उ आपरो कपरा धरन काजी मघा नोको लवटे#24:18वापिस न मुडके। । 19वोना दिवस मा जोन पोट लक से, अना जोन अना वय माय जिनको नहानसो लेकरा सेत, वा बायकोगिन को गजब आफत सेत। 20तुमी पिराथना करो का जाड़ो को मौसम मा पवीतर दिवस मा नोको धावनो पडे़त। 21काहेका वोना बेरा मा असो आफद आहेत, जोन सारो जग बनान को बेरा लक, अबा तकन नही आइसेस, अर ना कभी आहेत।#दानिय्येल 12:1; परकासित वाक्य 7:14 22अदी वय दिवस कम नही करयो, जातो ता कोनी को भी तन साजरो नही बचतो पर निवाड़ो गयो, मानूस को कारन वय दिवस घटायो, गयो से।
23“वोना बेरा कोनी सांगेत, का यीसु मसीह वहान सेत, का यहान सेत, तो तुमी बिस्वास नोको करजोस। 24काहेका खोटो मसीहा अना खोटो भविस्यवक्ता उभो होयेती, अना मोठयो-मोठयो चमतकार करतब दिसाहेत। उनको मकसद निवाड़ो गयो मानूस गीन ला बहकानो से। 25समजो मी ना तुमी ला पहले लक सांग दियो सेव।”
26“ एको लाय यदि कोनी सांगेत, का चोवो यीसु जंगल मा सेत। किवाड़ लगायके राखने बाहेर नोको हिटने, अना वा घर मा से, तो बिस्वास नोको करने।#लूका 17:23-24 27काहेका जसो बीजरी दिन#24:27बिजली के चमक के समान। उगती लक हिट के दिवस बुडती तकन चमका से वसोच मानूस को टूरा आहेत।”
28“जहा लास सेत वहाँच गीधाड़ जमा होयेती”।#लूका 17:3
मानूस को टूरा को दुबारा लक आवनो
(मरकुस 13:24-27; लूका 21:25-28)
29“ वोना दिवस मा अचरज दुख को मघा दिन इन्धार भई जाहेत। अना चन्दा को उजार खतम भई जाहेत। अना बादल मा जोन नक्सतर सेत, उ सब हिलायो जाहेत। तबा तारा चान्दनी बादल लक पड़ जाहेत।#परकासित वाक्य 6:12-13 30तबा मानूस को टूरा को हिदान बादल मा चोहेत, अना सब धरती को लोकगीन आपरो, सीना ला पिटेहेत। अना मोठयो, ताकत अना महिमा को संग बादल मा मानूस को टूरा ला आवता दिसेत।#दानिय्येल 7:13; जकर्याह 12:10-14; परकासित वाक्य 1:7 31अना उ तुर्रा का मोठयो आवाज को संग, आपरो, सरगदूत गीन ला धाड़ेत अना सप्पा दुनिया पासुन आपरो निवाड़ो लोकगीन ला जमा करयेत”।
अँजीर को झाड़ को सिक्सा
(मरकुस 13:28-31; लूका 21:29-33)
32“अँजीर को झाड़ को उदाहरन लक सीको, जबा वोको डगाली नरम होवासे अना पान हिटासे, तबा तुमला मालूम भई जासे, का उनहारो को मौसम आय गयोसे। 33असोच जबा तुम्हीला असो गोस्टी होवतो दिसेत। तो समज जावने का यो बेरा कठा नाहत, बल्की बेसकुड़ मा सेत। 34तुमरो लक खरो-खरो सागंसू, जब लक यो गोस्टी पूरो नही होयेत। तबा तकन यो जुग को आखीर नही होहेत। 35बादल अना धरती टल जाहेत, पर मोरो कव्हयो कदीच नही बदलेत”।
जागत रव्होन की सिक्सा
(मरकुस 13:32-37; लूका 17:26-30,34-36)
36“वोना दिवस अना वोना बेरा को बारेमा कोनीला मालूम नाहत, ना सरग दूत गिनला, ना मानूस को टूरा ला यो गोस्टी बस परमेस्वर बाबुजी ला मालूम सेत।”
37“जसो नूह को परलय को बेरा मा होतो, वसोच मानूस को टूरा को भी आवनो होहेत।” 38काहेका परलय को बेरा को पयले, जोन दिवस तकन नूह जहाज मा नही चघयो होतो। वोना दिवस तकन लोकगीन जेवत-पिवत अना बिहा करत होतीन। 39अना पानी-पूरा आयो, अना सबला बाहाय के ले गयो#24:39 परलय को घटना अना मानूस गीनला काही पता नही चलो, वसोच मानूस को टूरा को भी आवनो होहेत। 40वोना बेरा मा दुई जन खेत मा सेत, एक सोड़ दियो जाहेत, अना दुसरो उचल लियो जाहेत। 41दुई बायका चकिया मा कनीक पीसत होतीन, वा मा लक एक उचल लियो जाहेती, अना दुसरी ला सोड़ दियो जाहेती। “ 42यो काजी तुमी जगत रव्हो अना पिराथना करत जावो, काहेका तुमीला यो मालुम नाहत का, खेत का मालिक मजे पिरभु कबा आवनवारो सेत। 43पर तुमी यो जान लेव का घर को मालिक ला मालुम होवतो का चोर कबा धसन वारा सेत। मंग उ जागत रव्हतो अना घर मा चोरी होवतो।#लूका 12:39-40 44यो कारन लक तुमी तैय्यार रव्हो जोन बेरा मा तुम्ही नही सोचा सेव वोच बेरा मानूस को टूरा आजाहेत।”
बिस्वासमंद नौकर अना दुस्ट नौकर
(लूका 12:41-48)
45“असो बिस्वास काबील अना अक्कलवारा दास कोन सेत? जोनला वोका मालीक ना नौकर गीन को वरता, मुकतियारी मा राखेत का सबला सहि बेरा मा वोला जेवन देहेत।” 46“धन्य से उ दास जेनको मालीक जबा आवासेत, तो वोला उ मालीक वसोच, करता पाहेत।” 47मी तुमरो लक खरो कव्हसू, का उ आपरो सब धन माया को पर वोला मूनिम राखेत। 48“दूसरो पक्स मा एक बुरो दास से, जोन अपरो मन मा कव्हा सेत। मोरो मालिक लगत दिवस भयो लवटो नाहत। अबा उसीर से।” 49अना आपरो संगी नौकर गिनला मारन लगे। अना बेवडा#24:49पियक्कड़ को संग जेवन अना पीवन लगे। 50तबा वोना दास को मालीक असो दिवस आहेत, जोन दिवस अना पलको बारेमा कोनी नही सोचयो होतो। 51तबा उ वोला कड़ो सजा देहेत। अना पाखन्डी गिनला वोको संग डाख देहेत, जहान रड़नो अना दात किचकीचानो होहेत।#24:51वोला लगत कड़ो सजा भेटेत
Voafantina amin'izao fotoana izao:
मत्ती 24: PSP25
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Powari Bible© The Word for the World International and Powari Madhya Pradesh, 2025.
