Mattĕo 28

Jezŭ Htaboge Dèthĭ Aklè̆

(Mărko 16.1-10; Lŭka 24.1-12; Zowănnī 20.1-10)

1B́ĕ Munisòd́è̆ hwă, dòsòd́è̆ aŭsu dini lumuwòthab́ĭ nu, Marĭa Madalè̆nā kî Marĭa alewe dèbwè legè d́ŏ lūkho nu. 2Tcabò̄, Lākho jijā dèbogè, manè̄, Kib́ĭcè Abwèzo dèbwè ò d́ŏ Mò̄kho la kî leb́ôhtî hwă saphlòḿĭnigè lo kî sanălăò d́ŏ akho nu. 3Zu mūkă mè acab́ô̆ hlăgolî nu kî zè dèkô̆dèthò mè acab́ô̆ dèscihtĭphò̆ nu. 4D́ŏ dèscisă ni ze le abu, klĭpho adôi lū dalā mègè acab́ô̆ athĭ tòcò akhò̆pha nu.

5Kib́ĭcè Abwèzo jî̄b́èhta kî d́ògè amihmu tòcò, “Scisă ḿè, manè̄ ji thîhè̆ tèpwè thĭ wāhlè Jezŭ htè ab́èhtalaglothĭgè dèbwè nu. 6Cò tò ò b́ĕjo ńò. Manè̄, Za htaboge htŏ acab́ô̆ Cò d́ò nu. Le kî tcabò̄ alleaklè htè Jezŭ òsòḿî̆lagè nu. 7Kî geplaplă, d́ò̆sabò̄ Zo bōhmubicè tòcò htè Za htaboge htŏ nu. Kî tcabò̄ Ze legè thĭ hlò̆mò̄ d́ŏ Galilĕage bu, d́ŏnu thĭ gā tcahtîkò̆ Cè. Tcabò̄, Jò d́ò̆sadòlò htŏ thĭ.”

8Cè tòcò hèhtaplaplăgè lūkho d́ŏ dèscisă kî dèthalōthalai abu kî cwèlegè d́ŏ bōhmubicè tòcò ò, cab́ô̆htè cò kò̄ d́ò̆sa lōwa dè awîakè̆ ajo nu.

9Kî tcabò̄, Jezŭ htèglè̄ni cè tòcò, Cò d́ò, “B́èmò!” Cè tòcò le kî phòb́a Jezŭ akhahlèkho kî thèb́è̆htagè Cè. 10Jezŭ d́ò cè tòcò, “Scisăbò̄ ḿè. Le d́ò̆sabò̄ Jè thè̆buwe tòcò agē le d́ŏ Galilĕage nu. D́ŏnu ca ka tcahtîkò̆ Jè.”

Adôidè Adèd́ò̆sage

11B́ĕnu cè tòcò lekô klè nu, tcabò̄, klĭpho adôi lū aklè̆ tòcò genī U bu kî d́ò̆sagè Phŭgido tòcò dè aphî̆hta hwăgè tòcò nu. 12Cè tòcò ladēplo hwă akhoane athobwethabwe tòcò, ci i òè hwă klĭpho tòcò hô̆ d́ō, 13zè hmèla lōwa, “D́òbò̄ htè Zo bōhmubicè tòcò le b́ĕ klăḿè̆lumu d́ō ahugè Zo co b́ĕ wa sòḿĭthebĕ akhî nu. 14Agò̄ phlò̆nī b́eḿĕ Mādo anigu bu d́ō, wò kò d́òmò d́ò̆è cè cab́ô̆htè thĭ gô̄ hlô̆htabò̄ dèba nu.”

15Cè tòcò phî hô̆ kî mègè acab́ô̆ cè b́è dèhtulahmèla adĕ nu. Kî bija dòdò̄tòthò̆ ikò̆ d́ŏ Jŭdapho tòcò aklè̆ htô̆ dola khŏdini jo nu.

Jezŭ D́è̆lî̄hta Ane

(Mărko 16.14-18; Lŭka 24.36-49; Zowănnī 20.19-23; Thodŏpho 1.6-8)

16Bōhmubicè scidèbwè legè d́ŏ Galilĕage nu, d́ŏ khòlò̆ dèmè̆ akho acab́ô̆ Jezŭ hmèla cè tòcò adĕ nu. 17Kîd́ò̆ b́ĕ cè tòcò tcahtî Cè nu, zò gò̄la thèb́è̆hta lōwa, barasă tòcò cò htèniwĭniwa we tèpwè. 18Jezŭ leb́ôhtî cè kî Zi jî̄b́èhtî lōwa, Cò d́ò, “Dèphlŭdèthere lŏcăcè d́ŏ Mò̄kho kî Lākho b́è ilagè Jè. 19Mègōnu, le kî mèphî̆hta bijakhwĭpho lŏcăcè Jo bōhmubicè, ŭsab́ăbò̄ cè htĭ d́ŏ Pa kî Pho kî Spirito Tcahtĭ ami abu nu. 20Kî thôithò̆i cè agè̄ mèkô lŏ Jè hmèlagè thĭ tòcò nu. Kî tcabò̄, Jò òkô thĭ kă gô̆ amuni htô̆ munilēdū nu.”

Voafantina amin'izao fotoana izao:

Mattĕo 28: GRNT21

Asongadina

Hizara

Dika mitovy

Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra

Geba Roman New Testament © Bible Society of Myanmar, 2021.

Hahafantatra misimisy kokoa momba ny Geba Roman New Testament