માર્ક 10
10
સુટા સેંડા ના બારા મ ઇસુ ની હિક
(મત્તિ 19:1-12; લુક. 16:18)
1ફેંર ઇસુ અનેં હેંના સેંલા કફરનહૂમ સેર નેં સુંડેંનેં, વેયા યહૂદિયા પરદેશ ની હીમ વાળી જગ્યા મ થાએંનેં યરદન નદી નેં પાર આયા. ફેંર એક વખત ઘણી મુટી ભીડ ઇસુ કનેં ભીગી થાએં ગઈ, અનેં વેયો પુંતાની રિત નેં પરમણે હેંનનેં ભાષણ આલવા મંડ્યો.
2તર ફરિસી ટુંળા ન મનખંવેં ઇસુ કન આવેંનેં હેંનેં પારખવા હારુ હેંનેં પૂસ્યુ, “હું મૂસા નું નિયમ એક આદમી નેં ઇની બજ્યેર નેં સુટી કરવા નું કે હે?” 3ઇસુવેં હેંનનેં જવાબ આલ્યો, “મૂસે તમનેં સુટા-સેંડા ના બારા મ હું આજ્ઞા આલી હે?” 4હેંનવેં કેંદું, “મૂસે સુટા સેંડા નું લખાવટ કરવા નું અનેં સુંડવા ની આજ્ઞા આલી હે.” 5ઇસુવેં હેંનનેં કેંદું “તમાર મન ની કઠણતા ને લેંદે હેંને તમારી હારુ ઇયે આજ્ઞા લખી. 6પુંણ વસન મ લખ્યુ હે કે ઝર પરમેશ્વરેં દુન્ય બણાવી હીતી, તે હેંને એક નર અનેં એક નારી બણાય. 7વેયુ એંમ વતાડે હે કે ઝર એક સુંરો અનેં સુરી લગન કરે હે તે વેય પુંતાનં આઈ બા નેં સુંડેંનેં આદમી-બજ્યેર બણેંનેં એક હાતેં રેંહે. 8એંતરે હારુ વેય હાવુ બે મનખં નેં જુંગ નહેં, પુંણ એકેંસ મનખં નેં જુંગ હે. 9એંતરે હારુ ઝર પરમેશ્વરેં જુડ્ય હે, તે આદમી-બજ્યેર પુંતાનેં એક-બીજા થી અલગ નેં કરે.”
10ઝર વેયા એક ઘેર મ આયા તે સેંલંવેં ઇસુ નેં હેંના મુદ્દા ના બારા મ ફેંર પુસ્યુ. 11ઇસુવેં જવાબ આલ્યો, “પરમેશ્વર સાહે હે કે લગન ની જુડી તાં તક બણેં રે ઝર તક આદમી કે બજ્યેર નું મોત નહેં થાતું. ઝી કુઇ પુંતાની બજ્યેર નેં સુટા સેંડા કરેંનેં, બીજી બજ્યેર હાતેં લગન કરે તે વેયો પરમેશ્વર ની નજર મ સિનાળવું કરે હે.” 12અનેં ઇવીસ રિતી કદાસ બજ્યેર પુંતાના આદમી નેં સુટા સેંડા આલેંનેં, બીજા માણસ હાતેં લગન કરે, તે વેયે પરમેશ્વર ની નજર મ સિનાળવું કરે હે.
ઇસુ નાનં સુંરં નેં આશિર્વાદ આલે હે
(મત્તિ 19:13-15; લુક. 18:15-17)
13ફેંર અમુક મનખં નાનં સુંરં નેં ઇસુ કનેં લાવવા મંડ્ય કે વેયો હેંનં ઇપેર હાથ મેંલેંનેં હેંનનેં આશિષ આલે. પુંણ સેંલા મનખં નેં વળગ્યા. 14ઇસુવેં ઇયુ ભાળેંનેં ગુસ્સે થાએંનેં સેંલંનેં કેંદું, “નાનં સુંરં નેં મારી કન આવવા દો અનેં હેંનનેં ના નહેં કો. કેંમકે ઝી એંનં સુંરં નેં જુંગ ભરુંહા વાળં અનેં નરમાઈ રાખવા વાળં હે, વેયસ મનખં પરમેશ્વર ના રાજ મ રેંહે. 15હૂં તમનેં હાસું કું હે કે ઝી કુઇ પરમેશ્વર ના રાજ નેં નાના સુંરા નેં જુંગ અવકાર નેં કરે, વેયુ પરમેશ્વર ના રાજ મ નેં જાએં સકે.” 16ઇસુ હેંનં સુંરં નેં ગળે મળ્યો, અનેં હેંનં ઇપેર હાથ મેંલેંનેં આશિષ આલી.
ધન વાળો માણસ અનેં અમર જીવન ના બારા મ
(મત્તિ 19:16-30; લુક. 18:18-30)
17ઝેંવો ઇસુ પુંતાનં સેંલં હાતેં જાવા હારુ નકળ્યો, તે એક માણસ હેંનેં કન દોડતો જાએંનેં આયો. હેંને ઇસુ નેં હામેં ઢેંસુંણ માંડેંનેં પૂસ્યુ, “હે ખાસ ગરુ, હૂં હું કામ કરું કે પરમેશ્વર મનેં અમર જીવન આલે?” 18ઇસુવેં જવાબ આલ્યો, “તું મનેં ખાસ હુંકા કે હે? પરમેશ્વર નેં સુંડેંનેં કુઇ બી ખાસ નહેં.” 19તું આજ્ઞાવં નેં તે જાણેસ હે: મનખં નેં માર નેં દડવું, સિનાળવું નેં કરવું, સુરી નેં કરવી, ઝૂઠી ગવાહી નેં આલવી, કેંનેં ધુંખો નેં દેંવો, આપડં આઈ-બા નું માન કરવું. 20હેંને માણસેં ઇસુ નેં કેંદું, “હે ગરુ ઇયે બદ્દી આજ્ઞાવેં હૂં નાનપણ થી માનતો આયો હે.” 21ઇસુવેં હેંનેં પ્રેમ ની નજર થી ભાળ્યુ. અનેં હેંનેં કેંદું, “તારી મ ખાલી એકેંસ વાત ની કમી હે. જા, તારી બદ્દી મિલકત વેંસેંનેં વેયા પઇસા ગરિબં નેં વાટેં આલ. અનેં અગર તું એંમ કરહેં તે હરગ મ તનેં ધન મળહે. તું આ કામ કરેંનેં આવ અનેં મારો સેંલો બણેં જા.” 22ઝર હેંને માણસેં ઇસુ નેં એંમ કેંતં હામળ્યુ તે હેંનું મોડું ઉતરેંજ્યુ. વેયો માણસ દુઃખી થાએંનેં જાતોરિયો, કેંમકે વેયો ઘણો ધનવાન હેંતો.
23ઇસુવેં સ્યારેં-મેર ભાળેંનેં પુંતાનં સેંલંનેં કેંદું, “ધનવાન નેં પરમેશ્વર ના રાજ મ જાવું ઘણું કાઠું હે!” 24સેંલા ઇસુ ની વાત થી વિસાર કરતા થાએંજ્યા. હેંનેં લેંદે ઇસુવેં ફેંર હેંનનેં કેંદું, “હે બાળકોં, ઝી ધન ઇપેર ભરુંહો રાખે હે, હેંનં હારુ પરમેશ્વર ના રાજ મ જાવું ઘણું કાઠું હે! 25પરમેશ્વર ના રાજ મ, ધનવાન માણસ નેં જાવું એંતરું કાઠું હે, ઝેંવું કે એક ઉંટ નું હોઈ ના નાકા મ થાએંનેં નકળવું કાઠું હે!” 26ઝર સેંલંવેં ઇયુ હામળ્યુ તે વેયા વદાર વિસાર કરતા થાએંજ્યા અનેં એક-બીજા નેં કેંવા મંડ્યા, “તે ફેંર કુંણ જાએ સકે?” 27ઇસુવેં હેંનં મએં ભાળેંનેં કેંદું, “મનખં થી તે આ નહેં થાએ સક્તું, પુંણ પરમેશ્વર થી થાએં સકે હે. કેંમકે પરમેશ્વર થી સબ કઇ થાએં સકે હે.” 28પતરસ ઇસુ નેં કેંવા મંડ્યો, “હમારું હું થાહે ભાળ હમું તે સબ કઇ સુંડેંનેં તારા સેંલા બણેંજ્યા હે.” 29ઇસુવેં કેંદું, “હૂં તમનેં હાસ્સું કું હે કે એંવું કુઇ મનખ નહેં, ઝેંને મારા અનેં તાજા હમિસાર હારુ પુંતાનું ઘેર કે, ભાજ્ય નેં કે, બુંનં નેં કે, આઈ નેં કે બા નેં કે, બાળ-બસ્સ કે, ખેંતરં નેં, સુંડ દેંદું વેહ, 30વેયુ હાવુ એંના જુંગ મ સતાવ હાતેં બદલા ના ફળ ના રુપ મ હો ગણા નેં મેંળવે, ઘેર અનેં ભાઈ અનેં બુંનેં અનેં આઈજ્યેં અનેં બાળ બસ્સ અનેં ખેંતરં નેં હુંદું મેંળવહે. આવવા વાળા ટાએંમ મ પરમેશ્વર હેંનનેં અમર જીવન આલહે. 31પુંણ ઘણં બદ્દ મનખં ઝી પુંતે-પુંતાનેં ઇની દુન્ય મ મુંટં હમજે હે, વેય પરમેશ્વર ની નજર મ નાનં થાએં જાહે. અનેં ઝેંનનેં ઇની સંસાર મ નાનં હમજવા મ આવે હે, વેય પરમેશ્વર ની નજર મ મુંટં હમજવા મ આવહે.”
ઇસુ તીજી વાર પુંતાના મોત ના બારા મ ભવિષ્યવાણી કરે હે
(મત્તિ 20:17-19; લુક. 18:31-34)
32અમુક દાડં પસે વેયા યરુશલેમ સેર મએં જાએં રિયા હેંતા, અનેં ઇસુ હેંનનેં અગ્યેડ-અગ્યેડ જાએં રિયો હેંતો. સેંલા ઇની વાત મ ઘણા વિસાર મ પડેંલા હેંતા કે ઇસુ તાં જાએં રિયો હે ઝાં ઘણં બદ્દ મનખં હેંનો વિરોધ કરે હે. અનેં અમુક મનખં ઝી હેંનનેં હાતેં-હાતેં જાએં રિય હેંતં વેય ઘણં સમકેંલં હેંતં, કે યરુશલેમ મ હેંનેં હાતેં હું થાહે. તર ઇસુ ફેંર પુંતાનં બાર સેંલંનેં અલગ લેં જાએંનેં હેંનં હાતેં વાતેં કરવા મંડ્યો કે એંનેં હાતેં હું-હું થાવાનું હે. 33ઇસુવેં કેંદું, “ભાળો આપું યરુશલેમ સેર મ જાજ્યે હે, અનેં હૂં માણસ નો બેંટો મુખી યાજક અનેં મૂસા નું નિયમ હિકાડવા વાળં ન હાથં મ હવાડવા મ આવેં. અનેં વેયા મનેં બીજી જાતિ ન મનખં ન હાથં મ હુંપહે, અનેં વેય મનખં મનેં મોત નેં લાયક નો ઠરાવહે. 34વેયા મારી નિંદા કરહે, અનેં મારી ઇપેર થુંકહે, અનેં મનેં કોડા મારહે, અનેં મનેં માર નાખહે, પુંણ હૂં મરેંલં મહો તીજે દાડે પાસો જીવતો થાએં જએં.”
યાકૂબ અનેં યૂહન્ના ની માંગણી
(મત્તિ 20:20-28)
35તર જબ્દી નો બેંટો યાકૂબ અનેં યૂહન્નાવેં ઇસુ કનેં આવેંનેં કેંદું, “હે ગરુ, હમું સાહજ્યે હે કે ઝી કઇ હમું તારી કનેં માંગજ્યે, વેયુ તું હમારી હારુ કરે.” 36ઇસુવેં હેંનનેં કેંદું, “તમું હું સાહો હે કે હૂં તમારી હારુ કરું?” 37હેંનવેં ઇસુ નેં કેંદું, “ઝર તું તારી મહિમા મ રાજ કરવું સલુ કરે, તે હમનેં તારી હાતેં રાજ કરવા ની પરવંગી આલજે કે હમં મનો એક તારી જમણી પાક્તી અનેં બીજો તારી ડાબી પાક્તી બેંહજ્યે.” 38ઇસુવેં હેંનનેં કેંદું “તમું નહેં જાણતા કે હું માંગો હે? ઝી દુઃખ હૂં વેંઠવાનો હે, હું તમું વેંઠેં સકો હે? ઝીવી રિતી હૂં મરવા નો હે, હું તમું મરહો?” 39હેંનવેં જવાબ આલ્યો, “હમારી થી થાએં સકે હે” ઇસુવેં હેંનનેં કેંદું, ઠીક હે “ઝી દુઃખ હૂં વેંઠવાનો હે, તમું વેંઠહો; અનેં હૂં ઝેંમ મરવા નો હે, હેંમ તમું મરહો. 40પુંણ મારો અધિકાર નહેં, કે મારી જમણી અનેં મારી ડાબી પાક્તી બેંહાડવું, ઇયે જગ્યા હેંનં હારુ પરમેશ્વરેં તિયાર કરી હે, ઝેંનનેં હેંને પસંદ કર્યા હે.”
41ઇયુ હામળેંનેં બીજા દસ સેંલા યાકૂબ અનેં યૂહન્ના ઇપેર રિહ કરવા મંડ્યા. 42તર ઇસુવેં હેંનં બદ્દ સેંલંનેં પુંતાનેં કન બુંલાવેંનેં હેંનનેં કેંદું, “તમું જાણો હે કે ઝી મનખં ઇની દુન્ય મ અધિકારી માનવા મ આવે હે, વેય પુંતાના અધિકાર નેં પુંતાનેં નિસં વાળં મનખં ઇપેર સલાડે હે. અનેં હેંનં ના અગુવા હેંનની વાત મનાવવા હારુ પુંતાનો અધિકાર સલાડે હે. 43પુંણ તમારે હેંનં જેંમ નેં થાવું જુગે, હાં ઝી કુઇ તમં મ મુંટો બણવા સાહે, તે વેયો બદ્દનો સેંવક બણે. 44અનેં ઝી કુઇ તમં મ મુખિયો થાવા સાહે, વેયો બદ્દનો નોકર બણે. 45કેંમકે હૂં માણસ નો બેંટો એંતરે હારુ નહેં આયો કે બીજં મારી સેવા કરે. પુંણ હૂં એંતરે હારુ આયો કે પુંતે બીજં ની સેવા કરું અનેં મારો જીવ આલેંનેં ઘણં નેં હેંનં ન પાપં થી સુંડવેં લું.”
ઇસુ આંદળા માણસ બર્તિમાઈ નેં ભાળતો કરે હે
(મત્તિ 20:29-34; લુક. 18:35-43)
46યરુશલેમ સેર મએં જાતિ વખતેં ઇસુ અનેં હેંના સેંલા યરિહો સેર મ આયા. અનેં એક મુટી ભીડ યરિહો સેર મહી નકળેં રી હીતી. હેંનેસ ટાએંમેં તિમાઈ નો બેંટો બર્તિમાઈ એક આંદળો ભિખારી, સડક નેં મેરં બેંઠો હેંતો. 47ઝર હેંને મનખં થકી હામળ્યુ કે ઇસુ ઝી નાજરત ગામ નો હે, વેયો એંના રસ્તા મ થાએંનેં જાએં રિયો હે. તે વેયો સિસાએં-સિસાએં નેં કેંવા મંડ્યો, “હે ઇસુ દાઉદ રાજા ની પીઢી ના સુંરા મારી ઇપેર દયા કર.” 48ઘણં મનખં હેંનેં વળગ્યં કે સપ રે, પુંણ વેયો ફેંર પાસો સિસાવા મંડ્યો, “હે દાઉદ રાજા ની પીઢી ના સુંરા, મારી ઇપેર દયા કર.” 49ઝર ઇસુવેં હામળ્યુ તે રુંકાએંનેં કેંદું “હેંનેં બુંલાવો” અનેં મનખંવેં હેંના આંદળા માણસં નેં બુંલાવેંનેં હેંનેં કેંદું “હિમ્મત રાખ! ઉઠ! ઇસુ તનેં બુંલાવે હે.” 50ફેંર હેંને આંદળે માણસેં સાદરો ફેંકેં દેંદો અનેં તરત ઇબો થાએંજ્યો અનેં ઇસુ કનેં આયો. 51તર ઇસુવેં હેંના આંદળા માણસ નેં પૂસ્યુ, “તું હું સાહે હે કે હૂં તારી હારુ કરું?” હેંને ઇસુ નેં કેંદું, “હે ગરુ, ઇયુ કે હૂં ભાળવા મંડું.” 52ઇસુવેં હેંનેં કેંદું, “તું ઘેર જાએં સકે હે, મેંહ તનેં હાજો કર દેંદો હે, કેંમકે તું મારી ઇપેર વિશ્વાસ કરે હે.” અનેં વેયો તરત ભાળવા મંડ્યો, અનેં રસ્તા મ ઇસુ નેં વાહે થાએંજ્યો.
Voafantina amin'izao fotoana izao:
માર્ક 10: GASNT
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.
