थरप्या तका का काम 14
14
इकुनियम देस में पोलुस अन बरनबास
1इकुनियम में अस्यान व्यो के, वीं दुई जणा यहूदियाँ की सबा में हाते ग्या, अन अस्यान बाताँ किदी के यहूदियाँ अन जो यहूदी ने हे वणा विस्वास किदो 2पण विस्वास ने करबावाळा यहूदियाँ मनक जो यहूदी ने हे वाँका मन में विस्वास्याँ को विरोद करबा वाते उकसाया। 3वीं दुई जणा घणा दन तईं वटीस रिया अन बना दरप्याँ परबू की बाताँ ने बताता रिया, अन परबू वाँने तागत देन वाँकाऊँ अचम्बा अन हेन्याणी का काम करवान वाँका करपाऊँ भरया तका संदेसा को मान बड़ातो रियो। 4पण वीं नगर का मनकाँ में फुट पड़गी, तो थोड़ाक मनक यहूदियाँ के आड़ी अन थोड़ाक थरप्या तका का आड़ी वेग्या हा,
5पण जो यहूदी ने हा वीं अन यहूदी मनक आपणाँ नेता ने भी हाते लेन वाँकी नन्दया करबा वाते अन भाटाऊँ ठोकबा वाते होच्यो। 6तो वीं हंगळी बाताँ ने जाणन वटूँ लुकानिया का लुस्त्रा अन दिरबे अन अड़े-भड़े का नगर में भागग्या 7अन वटे हव हमच्यार हुणाबा लागा।
लुस्त्रा अन दिरबे नगर में
8लुस्त्रा नगर में एक मनक जनमऊँ लंगड़ो हो, जो कदी ने चाल्यो हो 9वो मनक पोलुस ने बाताँ करतो तको हुणरियो हो, पोलुस वींका आड़ी देक्यो अन होच्यो के, ईंमें हव वेबा को विस्वास हे। 10अन पोलुस जोरऊँ हाको करन क्यो, “आपणाँ पगाँ पे ऊबो वे” वो ओ हुणताई फदकन ऊबो व्यो अन चालबा-फरबा लागग्यो। 11वटा का मनक पोलुस को ओ काम देकन, लुकानिया की भासा में जोरऊँ क्यो, “कुई देवताँ मनक को रूप धारण करन आपणाँ बंच में परगट व्या हे।” 12वणा मनक बरनबास ने जेयास अन पोलुस ने हिरमेस क्यो, काँके पोलुस बाताँ करबा में खास हो। 13जेयास को मन्दर नगर का बारणे हो। वींको पूजारी हाण्ड अन फूला को हार लेन फाटकाँ के बारणे आन पोलुस अन बरनबास के वाते बली देणो छारियो हो।
14पण जदी थरप्या तका चेला पोलुस अन बरनबास ओ हुण्यो, तो आपणाँ गाबा फाड़न भीड़ में ग्या अन जोरऊँ केबा लागा, 15#निर 20:11; भज 146:6“हो लोगाँ, थाँ ओ कई कररिया हो। माँ भी थाँके जस्यानीस मनक हाँ, अन थाँने हव हमच्यार हुणाबा आया, ताँके थाँ अणा फोगट की चिजाँऊँ छेटी वेन जीवता परमेसर के आड़ी आवो, जणी हरग, धरती, समन्द अन जो कई अणामें हे वणीस बणाया हे। 16वणी बित्या तका टेम में दनियाँ का लोगाँ ने आपणाँ-आपणाँ गेला पे चालबा दिदा। 17पण तद्याँ भी वो भलई करतो तको खुद की गवई देतो रियो, आकासऊँ बरका वरई, हारी रिता में हव हाक देतो रियो अन थाँको मन आणन्दऊँ भरतो रियो।” 18ओ केन भी भीड़ ने घणी अबकीऊँ रोकी के, वीं वींका वाते बली ने देवे।
19पण थोड़ाक यहूदियाँ अन्ताक्या अन इकुनियमऊँ आन मनकाँ ने आपणी आड़ी करन पोलुस के भाटा ठोक्या अन वींने मरियो तको हमजन नगरऊँ बारणे गड़ीन लेग्या। 20पण जदी चेला वींके च्यारूँमेर आन ऊबा वेग्या, तो वो ऊबो वेन नगर में ग्यो अन दूजे दन बरनबास के हाते दिरबे नगर में परोग्यो।
सिरिया का अन्ताक्या में पाछो आणो
21वीं दुई वणी नगर में मनकाँ ने हव हमच्यार हुणाता अन वटे घणा चेला बणाया, पछे पाच्छा लुस्त्रा, इकुनियम अन पिसदिया का अन्ताक्या में पराग्या। 22अन चेला ने हिम्मत देन विस्वास में बड़वा वाते धिजो बन्दाता रिया अन केता रिया के “परमेसर का राज में जाबा वाते आपाँने घणो दुक जेळणो पेड़ी।” 23वटे की हरेक विस्वास्याँ की मण्डली में बुड़ा-ठाड़ा ने थरप्या अन वाँने वरत अन परातना करन परबू का हाताँ में हूँप दिदी, जिंपे वीं विस्वास करता हा। 24तद्याँ वीं दुई पिसदिया वेता तका पंफुलिया देस में ग्या। 25पछे पिरगा देस में हव हमच्यार हुणान अन्तळिया देस में पूग्या। 26वटूँ जाँज में बेटन अन्ताक्या में ग्या अन अटेईस वीं काम के वाते वणा ने परमेसर का अनुगरे में हुप्याँ ग्या हा। जिंने वणा अबाणू पूरो किदो हे।
27जदी वणा वटे जान वटा की विस्वास्याँ की मण्डली का मनकाँ ने भेळा किदा, अन जो काम परमेसर वाँका हाते किदो हो वींने बतायो, अन केबा लागा के जो यहूदी ने हे, वाँका वाते भी विस्वास करबा ने परमेसर गेलो खोल नाक्या हे। 28अन पछे वीं वटे विस्वासी मनकाँ के हाते नरई दन तईं रिया।
Voafantina amin'izao fotoana izao:
थरप्या तका का काम 14: एम टी आर
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
(c) 2010-2017, New Life Computer Institute. All rights reserved