लूका 14

ईसु रोगलानै निरोगो कर्यो

1एक बर यहूदि मिनखा क अरामहाळा दिन ईसु मान्या-थान्या फरिसीया मऊँ एक परधान क घरा रोटी जिमबा गयो, अर बठै लोग बिपै आँख धर्या बेठ्याई हा। 2बठै एक आदमी बिकी आँख्या क सामै हो। जिका हात-पग पाणी भरबा की बजेऊँ सूजर्या हा। 3आ देखर ईसु सास्तरानै सीखाबाळा अर फरिसीयाऊँ बुज्यो, “अरामहाळा दिन कोईनै निरोगो करबो नेम-कायदा गेल सई ह क कोनी?” 4पण बे क्युंई कोनी बोल्या, जणा ईसु बिनै पकड़्यो अर निरोगो कर बिनै भेज दिओ। 5#मत्त 12:11जणा पाछै बो बानै बोल्यो, “ज थारो छोरो नहिस बळद कुआ म पड़ज्या जणा थे अरामहाळा दिन होबा की बजेऊँ बिनै तावळासा कुआ मऊँ कोनी काडो के?” 6पण इ बात को बाकन कोई जुबाब कोनी हो।

खुदनै छोटो कर मिजमानी करबो

7जद ईसु आ देख्यो की बुलाईड़ा पावणा जिमबा बेठबा ताँई चोखी-चोखी झघा टोर्या हा। जणा ईसु बानै सीखाबा ताँई एक मिसाल दिनी, 8“जद थानै कोई ब्या म जिमबा ताँई बुलावै जणा थे खुद जार चोखी झघा प मना बेठज्यो, क्युं क अंय्यां नइ होवै क बो तेरूँ बी बडानै नूत राख्यो होवै। 9अर थारै दोन्यानै नूतबाळो आर तेरूँ खेवै इनै अठै बेठबा दे। जणा तनै सरमऊँ आँख्या झुकार सऊँ निचली झघा म बेठणो पड़सी। 10इ ताँई जद थानै नूतो मिलै जणा थे जार सऊँ निचली झघा बेठज्यो, क्युं क थानै नूतो देबाळो थानै आर देखसी जणा बो खेसी, ‘ओ भाईला अठै क्याले बेठ्यो ह उपर आर बेठ।’ जणा थारै सागै बेठबाळा म तेरो मान ओर बढ ज्यासी। 11#मत्त 23:12; लूक 18:14क्युं क जखो खुदनै उचो दिखासी बिको सीर सकै सामै निचो कर्यो ज्यासी अर जखो खुदनै निचो दिखासी बिको सीर उचो कर्यो ज्यासी।”

12इकै पाछै ईसु आपका नूतबाळाऊँ बोल्यो, “जद बी तेरै कोई काण-ठिचो होवै जणा तू सगा-सम्बंदिआ, सागे भाई-भाणा अर पिसा हाळा मिनखा, अर भाईलानै मना बुलाजे क्युं क बे बी आपका ठिचा म तनै नूतर इको बदलो उतार देसी। 13पण तू कोई काण करै जणा गरीब, लंगड़ा-लुला अर आँदानै बुला। 14आ बात तेरै ताँई आसिरबाद होसी क्युं क बाकन तेरो बदलो उतारबा ताँई क्युंई कोनी। अर इको बदलो परमेसर तनै बि दिन देसी जि दिन धरमी मर्या पाछै ओज्यु जी उठसी।”

बडा ठिचा की निती-कथा

(मत्ती 22:1–10)

15ईसु की सुणर बिकै सागै चोकी प बेठर जिमबाळो एक जणो बिऊँ बोल्यो, “बे कत्ता भागहाळा हीं जखा परमेसर का राज म बेठर जिमसी।”

16जणा ईसु बिऊँ बोल्यो, “कोई मिनख बडो ठिचो करर्यो हो, अर बो बिमै आबा ताँई बोळा जणानै नूतो दिओ। 17जद बा जिमबा की घड़ी आई जणा बो जिमबा ताँई सगळानै आपको आदमी भेजर बुलावो दिवा भेज्यो, क आओ सक्यु त्यार ह।

18“पण बे सगळा का सगळा टाळमटोळ करबा लागगा। पेलो बोल्यो, ‘म एक खेत मोल लिओ हूँ अर बि खेतनै जार मनै समाळनो ह, म तो माफी चाऊँ हूँ।’ 19पाछै बो दुसरा कनै गयो जणा बो बोल्यो, ‘म तो आजई पाच जोड़ी बळद मोल लिआ हीं अर म बानै बिचासबा जार्यो हूँ। दया कर मनै माफ करो।’

20“एक जणो ओर बोल्यो, ‘म तो लूगाई ब्यार ल्यायो हूँ जणा म कोनी आ सकूँ।’

21“जणा बो दास हो जखो सगळी बात आर आपका मालिकऊँ बोली आ सुण झाळा भर'र बो मालिक हो जखो आदेस दिआ क, ‘तावळोसो जा अर नगरी क मांयनै जत्ताबी गळिआरा अर बजारा म लुला-लंगड़ा अर मंगता हीं बानै बुलाल्या।’ 22दास पाछो आर बिऊँ बोल्यो, ‘मालिक जखो ओडायो हो बो म कर दिओ पण इब बी बोळी झघा बचगी।’ 23जणा बो मालिक हो जखो ओज्यु बिनै बोल्यो, ‘तू जा अर गळिआरा अर सड़का प जत्ता बी मिनख लाधै बानै हात जो'ड़र अठै लिआ, जिऊँ मेरो घर भर्यो-भर्यो दिखै।’ 24अर म थारूँ बोलुँ हूँ, जिनै म सऊँ पेली नूतो भेज्यो हो बामैऊँ एक जणोई, इ जिमणार को गास्योई कोनी खा।”

चेला बणबा को मोल

(मत्ती 10:37,38)

25जद ईसु क गेल-गेल भीड़ की भीड़ जारी ही बि टेम ईसु गेलनै मुड़्यो अर भीड़ऊँ बोल्यो, 26#मत्त 10:37“ज कोई मेरो चेलो बणबा की इंछ्या राखै ह। अर मेरूँ बेत्ती आपका माँ-बापानै, बाळ-बच्यानै, सागे भाई-भाणानै अर खुदका पिराणाऊँ परेम करै ह जणा बो मेरो चेलो कोनी बण सकै। 27#मत्त 10:38; 16:24; मर 8:34; लूक 9:23अर जखो बी मेर ताँई दुख उठाबा अर मरबानै त्यार कोनी बो मेरो चेलो कोनी हो सकै। 28ज थारै मऊँ कोई बडीसारी मचाण बणाबो चावै जणा के बो पेली आपको हिसाब-किताब जो'ड़र आ कोनी देखसी क मेर कनै इनै बणाबा ताँई पिसा-पाई पूरा हीं क कोनी? 29कदै अंय्यां नइ होज्या बो निम-निम भरके रेहज्या, ज अंय्यां हो जावै तो देखबाळा आ खेर बिकी हसी उडासी। 30ओ बणाबा तो लागगो पण बिनै पूरो कोनी बणा सक्यो। 31नहिस कोई अंय्यां को राजा ह, जखो दुसरा राजाऊँ बिस झार की सेना लेर लड़बा जावै। अर बिकै चढाई करबाऊँ पेलीई बिको सामलो राजा ओ कोनी बिचारै के? क, म दस झार की सेनाऊँ बिकी बिस झार की सेना को सामनो कर लेस्युं क कोनी? 32नहिस बो बि राजा की सेना क दूर रेह्ताई आपको दुत भेजर सुळजेटो कर लेसी। 33अंय्यांई सक्यु तज्या पेली थे मेरा चेला कोनी बण सको।

बे सुवादलो नमक

(मत्ती 5:13; मरकुस 9:50)

34“लुण चोखो ह पण ज लुण मऊँ सुवाद चल्योजा जणा बिनै कंय्यां चरचरो कर्यो जा सकै ह? 35बो नइ तो माटी अर नइ खाद क काम आ सकै। लोग बिनै अंय्यांई बारनै बगादी हीं। जिकै कान ह बो बानै खोलल्यो।”

Voafantina amin'izao fotoana izao:

लूका 14: एस डब्लु वी

Asongadina

Hizara

Dika mitovy