काम 14
14
इकोनियुम म पोलुस अर बरनाबास
1इकोनियुम म पोलुस अर बरनाबास अरदास करबाळी झघा म गया अर बठै उपदेस दिआ जिऊँ यहूदि अर यूनानी, बोळा मिनख बिस्वास कर्या। 2पण बे यहूदि जखा बिस्वास कोनी कर्या हा बे गैर-यहूदि मिनखानै बिस्वासी भाया क खिलाप भड़काया अर बाकै मना म झेर भर दिओ। 3पोलुस अर बरनाबास बोळा दिना ताँई बठैई रिह्या अर बिना कोई डर क परचार करता रिह्या। अर परबु बी बाका हाताऊँ अचरजभर्या काम अर चमत्कार दिखार आपकी दया का संदेसनै साबित कर्यो। 4अर नगरी म अंय्यां होयो क मिनखा म फूट पड़गी। कोई भेजेड़ा चेला को तो कोई यहूदि पंथ को हिमायत्यो होयो। 5पण जद यहूदि अर गैर-यहूदि मिनख आपका नेता सेत्युं बाकी बेजती करबा अर भाठा मारबा की सोची। 6जणा बानै इको पेल्याई बेरो पड़गो अर बे बाकै आबाऊँ पेलीई लिकोनिआ का लुस्तरा अर दिरबे नाम की नगर्या अर कनै का इलाका म भाग छुट्या। 7अर बठै परमेसर का चोखा समचार को परचार करबा लागगा।
लुस्तरा अर दिरबे म पोलुस अर बरनाबास
8लुस्तरा म एक अंय्यां को मिनख हो जिकी टांग्या म जमाई जान कोनी ही बो जलमऊँई लंगड़ो हो। 9बो पोलुसनै ध्यानऊँ सुणबा लागर्यो हो जणा पोलुस बिकै कानि देख्यो अर बिमै निरोगो होबा को बिस्वास देखर 10जोरऊँ बोल्यो, “खड़्यो हो।” अर अत्ती खेताई बो खड़्यो होगो अर उछळबा कुदबा लागगो। 11ओ चमत्कार देखर लुस्तरा का मिनख लिकोनिआ भासा म बोलबा लाग्या क , “मिनख रूप म खुद देवता आपणा कनै आया हीं।” 12बे बरनाबासनै जयुस#14:12 जयुस यूनानी मिनख इनै खास देवता मानता हा। अर पोलुसनै हरमेस#14:12 हरमेस इनै यूनानी समचार लेज्याबाळा देवता को मुखिया मानता हा। कह्या क्युं क बो बोलबाळा म मुखियो हो। 13नगरी क बारला नाकै जयुस को देवरो हो। अर बि देवरा को पुजारी सांड अर माळा लेर नगरी का बारना प आयो क्युं क बो मिनखा क सागै पोलुस अर बरनाबास ताँई बलि देबो चाओ हो। 14अर जद भेजेड़ा चेला पोलुस अर बरनाबासनै इ बात को बेरो पड़्यो जणा बे आपका गाबा पा'ड़र बि भीड़ म कुदगा अर बाऊँ जोरऊँ खेबा लागगा, 15“थे काँई करो हो म्हें बी तो थारी जंय्यां का मिनख हां, म्हें तो थानै चोखा समचार सुणाबा आया हां क थे आ बेकाम की चिजानै छोडर बि जीवता परमेसरनै जाणो, जखो ईस्बर नगरी अर धरती, समदर अर जोक्यु बिमै ह बानै बणायो ह। 16बितेड़ा टेम म बो धरती का सगळा मिनखानै बाकी इंछ्या गेल चालबा दिओ। 17इकै पाछै बी बो खुदनै साबित करतो होयो, भलाई करी अर आसमानऊँ टेम-टेम प मी बरसार धरती प चोखी फसल उगार आपणानै देवै ह जिऊँ आपणो मन राजी होवै ह।” 18अ सगळी बाता बोलबा क पाछै बी, बे बोळी मुस्किलऊँ भीड़नै बलि देबाऊँ रोक्या।
19इकै पाछै अंताकीया अर इकोनियुम नगर्याऊँ क्युंक यहूदि आर भीड़नै भड़कार खुद म मिला लिओ। अर बे पोलुसनै भाठाऊँ मार'र बिनै मरेड़ो समजर बिनै नगरी क बारनै घिसर गेर दिआ। 20पण जद चेला बिकै च्यारूमेर भेळा होया जणा बो खड़्यो होर नगरी म आयो अर दुसरा दिन बरनाबास क सागै दिरबे चलेगो।
सिरीया का अंताकीया म ओज्यु आबो
21बि नगरी म बे परमेसर का समचार सुणार बोळा चेला बणार लुस्तरा अर इकोनियुम होताहोया पिसदिआ का अंताकीया म आगा, 22अर चेलानै समजाता अर हिमत बंधाता हा क, “बिस्वास म बण्या रेह्ओ अर परमेसर का राज म बड़बा ताँई आपानै बोळा दुख भोगणा पड़सी।” 23अर बे सगळी बिस्वासी मंडळ्या म मुखिया टाळ्या अर बरत क सागै अरदास कर बानै परबु क हाता म सूप दिआ जिपै बे बिस्वास कर लिआ हा।
24जणा पाछै बे पिसदिआ क गेला होर पंफुलिया नाम का इलाका म गया। 25अर पेरगे म बचन सुणार अतालिआ आया। 26बठैऊँ बे न्याव प सवार होर अंताकीया गया जठै बे बि कामनै हाल पूरोई कर्यो हो जि ताँई बानै परमेसर का हाता म सूप्यो गयो हो। 27बठै जार बे बिस्वासी मंडळी की सभा बुलार बानै बे सगळी बाता खे सुणाई जखी परमेसर गैर-यहूदिआ क मांयनै बाकै हाता करवायो अर कंय्यां गैर-यहूदि मिनखा ताँई सचा परमेसरनै मानबा को गेलो खुल्यो। 28बे बोळा दिना ताँई बठैई बिस्वास्या क सागै रिह्या।
Voafantina amin'izao fotoana izao:
काम 14: एस डब्लु वी
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
(c) 2010-2017, New Life Computer Institute. All rights reserved