जकर्याह 7
7
चूठे बअरतो रिया तँईं बकणा
1यहोवे ये सन्देश भविष्यबक्ता जकर्याह खे तेबे दित्तेया जेबे राजा दारा फारसो पाँदे राज करने लगी रा था। ये तेसरे राजो रे चौथे सालो रे किसलेव नाओं रे नऊए मीन्ने रे चौथे दिने ऊआ। 2तेबे बेतेलो रे रणे वाल़ेया शरेसेर ओर रेगेम्मेलेक ओर तिना रे आदमी यरूशलेमो दे पेजे, ओर सेयो यहोवे ते मतादा रिया तँईं बिनती करने खे आए। 3तिने यहोवे रे मन्दरो रे पुरोईता, सेना रे सेनापतिया ते ओर भविष्यबक्तेया ते ये पूछेया, “क्या आसा खे पाँजुए मीन्ने दे रोंदे रणा चाईयो ओर खाणा खाणे ते लग रणा चाईयो?” 4तेबे सेना रे यहोवे रा ये वचन मांगे पऊँचेया, 5“देशो रे सबी लोका ते ओर पुरोईता खे बोलो कि इना सत्तरा साला बीचे पाँजुए ओर सातुए मीन्ने दे बरत ओर शोग मनाया, तो से मेरिया तँईं नि था। 6जेबे तुसे खाओ-पियोए, से सब तुसे आपणियां तँईं खाओ-पियोए। 7ये सेई वचन ए, जो परमेशरे पुराणे बखतो रे भविष्यबक्तेया रे जरीये तेस बखते बोलेया था जेबे यरूशलेम समृद्ध था ओर लोका ते परेया दा था ओर जेबे ना सिर्फ शईरो रे नेड़े-तेड़े रे गांवा दे बल्कि दक्खणा रे इलाके ओर पच्छमा दे थालले इलाकेया दे बी बऊत जे लोक रओ थे।”
आज्ञा ना मानणे ते गुलामिया दे जाणा
8तेबे परमेशरो रा ये वचन भविष्यबक्ता जकर्याह गे पऊँचेया, “सेना रे परमेशरे ईंयाँ बोली राखेया, 9लोका ते बोलो कि स्वर्गदूता री सेना रा यहोवा ईंयाँ बोलोआ, कि जो सच्च ए सेई करो, ओर एकी दूजे साथे दया ओर कृपा रा बर्ताओ करो। 10बिदुआ जवाणसा रा फाईदा नि उठाओ। जिना बच्चेया रे बाओ मरीगे दे ए, तिना अनाथा साथे बुरा बर्ताओ नि करो। परदेशी लोका या गरीब लोका साथे बुरा बर्ताओ नि करो। एकी दूजे रे खलाफ बुरिया योजना नि बणाओ।” 11पर तुसा रे बुजुर्गे यहोवे री आज्ञा मानणे ते ना करिती ओर हठ करी की आपणियां आखी फेरी लिया, ओर आपणे कान बन्द करीते ताकि सुणी नि सको। 12बल्कि तिने आपणे दिल पात्थरो जेड़ा इजी खे बणाईता, ताकि सेयो मूसे रे दित्ते रे बिधानो ओर तेस वचनो खे नि मानी सको। इजी ते अलावा तिने तिना सन्देशा खे सुणना बन्द करिता जो सेना रे यहोवे पुराणे बखतो दे आपणी आत्मा रे जरीये भविष्यबक्तेया ते बुलाए थे। इजी बजा ते सेना रे परमेशरो रिया तरफा ते तिना पाँदे बड़ा रोष पड़केया। 13सेना रे यहोवे रा ये वचन ए, “जेबे मैं सेयो बुलाए तेबे तिने मेरी गल्ल नि सुणी।” “इजी री खातर जेबे तिने आऊँ बुलाया, तो मैं तिना री गल्ल नि सुणी।” 14मैं सेयो पऊण-चूखाने दे ओर तूफानो रे जरीये दूर-दूर देशा दे बखेरी ते, जेती सेयो परदेशी बणी की रओ थे। तिना री जमीन इतणी बेकार ऊईगी कि कोई बी तीसिए जाओ नि था। तिने आपणी मनपसंद जमीन रेगिस्तान बणाई ती।
Voafantina amin'izao fotoana izao:
जकर्याह 7: BGH
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This work is licensed under Creative Commons Attribution-ShareAlike 4.0 License.