रोमियो 3
3
1तां यहूदी हुणे रा क्या फायदा या खतने री क्या कीमत इ? 2हाँ, इसरी बौहत बड्डी कीमत इ। काँह्भई पैहले हत्थे परमेशरा रा बचन यहूदी लोकां जोई सौंपीरा।
3जे तिन्हां चते किछ धोखेबाज बी हुईगे तां क्या हुया? क्या तिन्हांरे धोखेबाज हुणे ते परमेशरा री सच्चाई बेकार हुई जाणी? 4कदीं मनी! जे हर कोई झूट्ठा बी हुई जांगा, तां बी परमेशर सच्चा इ रैहणा, तियां जे पवित्रशास्त्र परमेशरा रे बारे च बोलां,
“जिसते तुहें अपणियां गल्लां च सही साबित हुणे
कने अपणा मुकद्दमा तुहां जीतणा।”
5इस खातर जे अहांरे बुरे काम्म ये परगट करो भई परमेशर सही आ, तां अहें क्या बोल्ली सक्कां ये? क्या ये परमेशरा रे खातर गल़त आ भई सै गुस्सा करो कने अहौं सजा देओ? (हऊँ अपणी ये गल्ल माहणुये रे स्वभावा पर बोलीराँ)। 6कदी बी नीं! जे परमेशर सही नींआ, तां सै संसारा रा न्याय कदीं नीं करी सकदा।
7पर कोई ये स्वाल करी सक्कां, जे मेरे झूट्ठा रिया वजह ने परमेशरा री सच्चाई तिसरिया महिमा रे खातर जादा करीने परगट हुई, तां फेरी कांह् मिन्जो पापिये साई सजा रे लैक समझया जां? 8“अहें कांह् बुराई नीं करिये भई तिसते जे भलाई प्रगट हुई जाओ?” तियां जे भई अहांरे बारे च निंध्या करदे हुये किछ लोक अहां पर दोष लगायें, भई अहें येढ़ा बोलां ये। पर येढ़े लोक त सजा रे काबिल हुणे चाहिन्दे।
कोई धर्मी निआं
9तां फेरी क्या अहें यहूदी अन्यजातियां ते खरे? नां बिल्कुल नीं, काँह्भई अहें दस्सी चुक्कीरे भई चाये कोई यहूदी ओ या अन्यजातियां रे लोक ओ, सारे पापां रे बशा चे। 10तियां जे पवित्रशास्त्र बोलां,
“परमेशरा रे सामणे कोई बी धर्मी निआं, इक बी नीं।
11कोई बी माहणु नीं समझदा भई क्या ठीक आ;
कोई बी परमेशरा जो जाणना नीं चाहन्दा।
12सारे परमेशरा ते भटकीरे, सारे रे सारे तिसरे खातर बेकार हुईगरे;
कोई भलाई करने औल़ा निआं, इक बी नीं।
13तिन्हांरे मुँह खुल्हिया कब्रा साई बदबूदार हुईगरे,
सै अपणियां गल्लां ते छल-कपट कराँ ये,
तिन्हांरियां गल्लां नागां रे बिषा साई आं।
14तिन्हांरे मुँह शरापा ने कने नफरता ने भरीरे रैं।
15सै किसी रा खून करने जो मिनट नीं लगान्दे,
16सै तित्थी जे किति जायें नाश इ कराँ ये कने दुख इ दें,
17सै नीं जाणदे भई शान्तिया ने कियां रैहणा।
18तिन्हां च परमेशरा रा कोई डर निआं।”
19हुण अहें ये जाणाँ ये भई व्यवस्था सै जे किछ बोलां इ सै तिन्हांने इ बोलां इ, सै जे व्यवस्था रे मुतावक चलां ये; इस खातर भई हर इक मुँह बन्द कित्या जाओ कने सारे संसारा रे लोक परमेशरा री सजा रे लायक ठैहरो; 20काँह्भई व्यवस्था रा पालन करने ते कोई बी माहणु परमेशरा रे सामणे धर्मी नीं हूणा, पर व्यवस्था माहणुआं जो ये जाणने च मदद कराँ इ भई तिन्हें पाप कित्तिरा।
विश्वासा रे जरिये परमेशरा री धार्मिकता
21पर हुण बिणा व्यवस्था रे पालन करने ते परमेशरा री धार्मिकता परगट हुई, तिसरी गवाही जे व्यवस्था कने भविष्यवक्ता दें, 22यनिके सारे विश्वासियां खातर यीशु मसीह पर विश्वास करने ते परमेशरा री धार्मिकता बिणा किसी भेदभावा रे परगट हुई;
23इस खातर भई सारयां पाप कित्तिरा कने सारे परमेशरा रिया महिमा ते दूर ये, 24पर परमेशरा रे अनुग्रह ते तिने अहांजो यीशु मसीह रे जरिये मुख्ता च ग्रहण कित्या कने अहांरे पापां रिया सजा ते छुटकारा दित्या।
25-26परमेशरे यीशु मसीह जो अहांरे पापां रे खातर बलिदान हुणे जो भेज्या कने मसीहे अपणा खून्न बहाया ताकि तिस पर विश्वास करने रे जरिये अहें परमेशरा ले आई सक्को। परमेशरे ये दसणे खातर येढ़ा कित्या भई पैहले सै सहनशील कने पापियां जो माफ करने च सही था। यह ये बी दस्सां भई परमेशर सही आ ताहली जे सै मसीह पर विश्वास करने औल़यां जो ग्रहण कराँ।
27तां फेरी येढ़ि कोई गल्ल इ तिसरे बारे च जे अहें घमण्ड करी सक्कां ये? किछ बी नींआ! कने इसरी वजह क्या इ? क्या ये इसरी वजह इ भई अहें व्यवस्था रा पालन कराँ ये? नां, पर ये यीशु मसीह पर विश्वास करने रिया बजह नेआ। 28इस खातर अहें जाणाँ ये भई माहणु व्यवस्था रा पालन करने ते नीं, पर विश्वासा रे जरिये इ परमेशरा रिया नज़राँ च धर्मी बणी सक्कां।
29क्या परमेशर सिर्फ यहूदियां राई परमेशर हाया? क्या सै अन्यजातियां रा परमेशर निआं? हाँ, परमेशर तिन्हांरा बी आ।
30काँह्भई इक इ परमेशर आ, सै जे खतना औल़यां जो विश्वासा ने कने बिणा खतना औल़यां जो बी विश्वासा रे जरिये धर्मी बणां। 31तां क्या अहें व्यवस्था जो अहांरे विश्वासा रे जरिये खत्म करी रायें? कदीं मनी! पर अहें त व्यवस्था जो तिसरी सही कीमत देई राँये।
Voafantina amin'izao fotoana izao:
रोमियो 3: KFSNT
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This work is licensed under Creative Commons Attribution-ShareAlike 4.0 License.