मरकुस 7
7
रितिया रे पालना रा स्वाल
(मत्ती 15:1-9)
1तां फरीसी कने किछ यहूदी शास्त्री सै जे यरूशलेम नगरा ते आईरे थे यीशुये रे चऊँ पासयां कट्ठे हुये, 2तिन्हें देख्या भई तिसरे किछ चेले बिणा हात्थ धोये रोटी खाया रां थे सै जे यहूदी रीति-रिवाजा रे मुतावक ठीक नीं था, 3काँह्भई फरीसी कने सब यहूदी खाणा खाणे ते पैहले हमेशा पूर्वजां रिया रितिया रे मुतावक अपणे हात्थां जो धोआं थे। 4ताहली जे सै बज़ारा ते औआं थे बिणा हात्थ धोये नीं खान्दे थे; कने बौहत सारियां होर रितियां जो बी मन्नां थे, तियां जे भई कटोरियां, लोटे, ताँबे रे बरतना जो धोणा कने माँजणा। 5इस खातर फरीसियें कने शास्त्रियें यीशुये ते पुच्छया, “तेरे चेले बजुर्गां रियां रितियां पर काँह नीं चलदे, कने बिणा हात्थ धोये रोटी खायें?” 6यीशुये तिन्हांजो जवाब दित्या, “यशायाह ठीक था ताहली जे तिने पवित्र शास्त्रा च तुहां साई पखण्डियां रे बारे च भविष्यवाणी कित्ती; तियां जे लिखिरा :
“ ‘तुहें लोक मेरे बारे च बौहत अच्छा बोलां ए,
पर तुहें हकीकत च माहने प्यार नीं करदे।#7:6 यशा. 29:13
7तिन्हांरी अराधना मेरे खातर कोई मायना नीं रखदी,
काँह्भई सै परमेशरा रे हुक्मा जो छड्डिने माहणुआं रा हुक्म सखांये।’#7:7 यशा. 29:13
8काँह्भई तुहें परमेशरा रे हुक्मां रा पालन करना बन्द करितरा कने माहणुआं रियां रितियां रा पालन करां ए।”
9यीशुये तिन्हांजो गलाया, “तुहें अपणियां रितियां जो मनणे खातर बड़िया चलाकिया ने परमेशरा रे हुक्मा जो तोड़ां ये! 10काँह्भई मूसे बोलीरा, भई ‘अपणे पिता कने अपणिया माता रा आदर कर’ कने जो कोई माता-पिता जो बुरा बोल्लो सै जरूर मारी दित्या जाओ। 11-12पर तुहें लोकां जो ये सखांये भई अपणे माता-पिता री सहायता नीं करना ठीक आ, काँह्भई तुहें अपणे माता पिता जो ये गलाणे जो बोलां ये भई ‘मैं तुहांजो देणे रे बदले परमेशरा जो देणे री कसम खाद्दीरी, इस वजह ते हऊँ तिन्हांरी सहायता नीं करी पान्दा।’ 13इयां इ तुहें अपणिया बणाई रिया रितिया जो मनणे खातर लोकां जो बोलां ये, कने तुहें ये करने पर परमेशरा रे हुक्मां रा आदर नीं करदे।”
माहणुये जो अशुद्ध करने औल़ी गल्लां
(मत्ती 15:10-20)
14तां यीशुये लोकां जो अप्पूँ ले सद्दीने तिन्हांने गलाया, “तुहें सारे मेरी गल्ल सुणा, कने जो किछ हऊँ दस्सां तिसजो समझणे री कोशिश करा। 15येढ़ि कोई चीज़ नीं तिसाजो जे माहणु खाईने अपवित्र हुआं; पर सै जे किछ माहणुये रे अन्दरा ते निकल़ां, सै तिस्सो अपवित्र कराँ। 16जो बी मेरी गल्ल सुणां, सै ध्यान देईने सुणो कने समझो।”
17तंजे सै भीड़ा ते दूर इक्की घरा च गया, तां तिसरे चेलयां इस उदाहरणा रे मतलबा रे बारे च तिसते पुच्छया। 18यीशुये चेलयां ने गलाया, “क्या तुहें बी येढ़े नासमझ ये? क्या तुहें नीं समझदे भई सै चीज़ जे माहणु खां, सै तिस्सो अपवित्र नीं करी सकदी? 19काँह्भई सै चीज़ जे तुहें खांये सै तुहांरे मना च नीं, पर पेट्टा च जांई कने शरीरा ते बाहर निकल़ी जांई?” येढ़ा बोलीने तिने सब खाणे रियां चिज़ां जो पवित्र ठहराया।
20फेरी यीशुये गलाया, “सै जे माहणुये रे अन्दरा ते निकल़ां, सैई माहणुये जो परमेशरा रिया नज़राँ च अपवित्र कराँ। 21काँह्भई अन्दरा ते, यनिके माहणुये रे मना ते, बुरे-बुरे बचार, व्यभिचार, चोरी, हत्या, परस्त्रीगमन, 22लोभ, दुष्टता, छल, लुचपन, बुरी नज़र, निंध्या, घमण्ड, कने मूर्खता निकलां इ। 23ये सब बुरियां गल्लां माहणुये रे अन्दरा तेई निकल़ां इयां कने माहणुये जो अपवित्र कराँ इयां।”
सुरुफिनीकी जनाना रा विश्वास
(मत्ती 15:21-28)
24फेरी यीशु गलील प्रदेशा जो छड्डिने सूर कने सैदा रे नगर च आया; कने इक्की घरा च गया कने चाँह था भई किसी जो पता नीं लगो; पर सै लुक्खी नीं सक्कया। 25कने इकदम इक जनाना तिसारिया छोट्टिया कुड़िया च जे बुरीआत्मा थी, तिसरी चर्चा सुणीने आई, कने तिसरे पैराँ पईगी। 26ये यूनानी कने सीरिया प्रदेश फोनिशिया नगरा री थी। तिसे यीशुये ने विनती कित्ती भई मेरिया कुड़िया चते बुरीआत्मा जो कड्डी दे। 27यीशुये जनाना जो गलाया, “घरा रे बच्चयां जो सै जे यहूदी ये तिन्हांजो पैहले रज्जीने रोटी खाणे दे, काँह्भई बच्चयां ते रोटी लेईने कुत्तयां जो देणा ठीक निआं।” 28तिसे यीशुये जो जवाब दित्या, “ये सच्च आ प्रभु; फेरी बी कुत्ते बी त बच्चयां रे खाणे रे मेज़ा हेठ पैईरे टुकड़यां जो खाई लें।” 29यीशुये तिसाजो गलाया, “ये गल्ल बोलीने तैं माह पर अपणा विश्वास दस्या इस वजह ते मैं तुहांरी कुड़ी ठीक कित्ती, इस खातर हुण तू अपणे घरौ चली जा।” 30तिसे अपणे घरें आईने देख्या भई कुड़ी मंजोलिया पर पैईरी कने बुरीआत्मा निकल़ी गरी।
बैहरे कने हकले माहणुये जो चंगा करना
31फेरी यीशु सूर प्रदेशा रे लाकयां जो छड्डिने सैदा नगरा ते कने दिकापुलिस इलाके ते हुन्दे हुये गलील दरयावा पुज्जे। 32तां लोकें इक्की टौणे जो सै जे थत्था बी था यीशुये लौ ल्याईने तिसले अरज किति भई सै ठीक हुई जाओ। 33तां यीशु तिस्सो भीड़ा ते लग लईग्या, कने अपणी गुट्ठियां तिसरे कन्ना च पाईयां, कने गुट्ठी कन्ना ते कड्डीने तिस पर थुक्कीने तिसरिया जीभा जो छुया; 34कने स्वर्गा खौ देखीने बड्डा सुसकार भरया, कने यीशुये तिस माहणुये ने गलाया, “इप्फत्तह!” मतलब “खुली जा!” 35सै इकदम सुणने लगया, कने बगैर किसी परेशानिया ते साफ-साफ बोलणे लगया। 36तां यीशुये लोकां ने बोल्या भई किसी ने देखां बोलदे; पर जितना तिने तिन्हांजो चिताया तितना इ सै होर प्रचार करने लगे। 37सै बौहत इ हैरान हुईने बोलणे लगे, “तिने जो किछ कित्या सब खरा कित्या; सै बैहरयां जो सुणने री, कने गुंगयां जो बोलणे री बी ताकत देआं।”
Voafantina amin'izao fotoana izao:
मरकुस 7: KFSNT
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This work is licensed under Creative Commons Attribution-ShareAlike 4.0 License.
