मत्ती 20
20
बगीचे रे मजदूरा रा उदाहरण
1स्वर्गा रा राज इस उदाहरणा साई आ: एक जमीनदार था सै जे अपणे अंगूरां रे बगीचे च मजदूरां जो लगाणे रे खातर बौहत भ्यागा घरा ते निकल़या। 2ताहली जे सै मजदूरां ने इक दिनार रोज की मजदूरिया पर सैहमत हुईग्या, तिने मजदूरां जो बगीचे च काम्म करने भेजित्या। 3तकरीवन सबेरके नौ बजे ताहली जे सै दोबारा घरा ते बाहर बजारा च गया, तिने तिसा जगह किछ मजदूरां जो बेकार खढ़िरा देख्या। 4तिने मजदूरां जो बोल्या, तुहें बी जाईने मेरे बगीचे च काम्म करा, मांह तुहांजो ठीक मजदूरी देणी, इस खातर सै चलीपे। 5बगीचे रा मालक दोबारा तकरीवन बारा बजे कने तिन्न बजे भीं बजारा च गया कने येढ़ा इ कित्या। 6तकरीवन पांज बजे सै भीं बजारा च गया तिने तिसा जगह किछ होर मजदूरां जो खढ़िरा देख्या, सै तिन्हांने गलाया, तुहें पूरा दिन येत्थी बेकार कांह खढ़िरे रैं? 7तिन्हें मालका जो जवाव दित्या, इस खातर भई किन्हिये अहांजो मजदूरिया पर नीं लगाया। फेरी मालके तिन्हांजो बोल्या, तुहें बी मेरे बगीचे च जावा कने काम्म करा।
8सांझ हुणे पर बगीचे रे मालके अपणे भण्डारीये जो गलाया, मजदूराँ जो सद्दीने पिछलयां ते लेईने पैहलकयां तक सबनीं जो पैसयां रा भुगतान करी दे। 9फेरी सै मजदूर जे पांज्ज बजे ते इक घण्टा पैहले कम्मा पर लगाईरे थे, तां तिन्हांजो इक-इक दिनार#20:9 दिनार यनिके पूरे दिना री मजदूरी मिल्या। 10कने सै मजदूर जे सबेरे ते काम्म करीराँ थे सै आये, तिन्हे सोच्चया अहांजो किछ जादा पैसे मिलणे, पर तिन्हाजो बी इक-इक दिनार मिलया। 11पैसे त तिन्हें लेईले पर जमीनदारा ने शकैत करदे हुये सै बोलणे लगे, 12सै मजदूर जे बाद बिच लगे थे, तिन्हें सिर्फ इक घण्टा काम्म कित्या पर तुहें अहांजो बी उतणा इ दित्या जितना जे तिन्हांजो दित्या, जबकि अहें सारा दिन कड़कदिया धुप्पा च बौहत मेहणत किति। 13जमीनदारे तिन्हां चते इक्की जो जबाब दित्या, दोस्त, मैं तेरने कोई बेन्याई नीं किति। क्या अहें तैह नीं कित्तिरा था भई माह तुहांजो इक दिनार देणा? 14सै जे तेरी मजदूरी बणां इ, तिस्सो लै कने चली जा; हऊँ बाद बी तितनी इ मजदूरी देणा चाँह जितणी जे तिज्जो देई कराँ। 15क्या हऊँ अपणे पैसे रा अपणिया इच्छा रे मुतावक किछ बी करने रा हक नीं रखदा? क्या तू मेरिया इसा भलाईया ते जल़ण कराँ? 16इस तरिके ने सै जे अप्पूँजो खास समझां ये, हुण सै खास नीं रैहणे, कने सै जे खास नीं समझे जायें, सै औणे औल़े वगता च बौहत खास समझे जाणे।
अपणिया मौती रे बारे च यीशुये री तिज्जी भविष्यवाणी
(मरकुस 10:32-34; लूका 18:31-34)
17ताहली जे यीशु अपणे बारा चेलयां सौगी यरूशलेम नगरा जो जाई कराँ था तां यीशु तिन्हांजो इक कनारे लेईग्या कने चलदे-चलदे तिन्हाने बोलणे लगया, 18“देक्खा, अहें यरूशलेम नगरा जो जाया राँये; कने माहणुये रा पुत्र यनि हऊँ मुखियायाजकां कने यहूदी शास्त्रियां रे हवाले कित्या जाणा, कने तिन्हां मिन्जो मौती रे लायक समझणा। 19कने मिन्जो अन्यजातियां रे हवाले कित्या जाणा, भई सै मेरा मजाक डवाओ, कने कोड़े मारो, कने मिन्जो क्रूसा पर चढ़ाओ, कने मांह तिज्जे दिन मूईरयां ते जिऊंदा हुई जाणा।”
इक्की मौआ री प्राथना
(मरकुस 10:35-45)
20ताहली जे जब्दिये रे पुत्राँ री माता अपणे पुत्राँ सौगी यीशुये लौ आईने तिसरे पैराँ पर मत्था टेक्कीने किछ मंगणे लगी। 21यीशुये तिसाते पुच्छया, “तू क्या चाईं?” तिसे गलाया, “मिन्जो बचन दे भई मेरे ये दोन्नों पुत्र तेरे राज्जा च इक तेरे सज्जे कने इक तेरे खब्बे पासे खौ बैट्ठो।” 22यीशुये जबाब दित्या, “तुहें नीं जाणदे भई तुहें क्या मंगी रायें? क्या तुहें मेरे साई दुख सैई सक्कां ये, तिस्सो जे हऊँ सैहणे औल़ा?” तिन्हें तिसने गलाया, “हाँ, सही सक्कां ये।” 23यीशुये तिन्हांने गलाया, “तुहें मेरे साई दुख त सैही लेंगे, पर मेरे दायें कने बायें बठाल़ना मेरा काम्म निआं, पर तिन्हांरे खातर जे मेरे पिता परमेशरा रिया तरफा ते त्यार कित्तिरा, तिन्हारे खातर इ आ।”
24ताहली जे बाकी दस चेलयां येढ़ा सुणया तां सै तिन्हां दुईं भाईयां पर गुस्से हुईगे। 25फेरी यीशुये तिन्हांजो अप्पूँ ले सद्दीने गलाया, “तुहें जाणाँ ये भई अन्यजाति राजा लोकां पर अपणा हक जमाई ने रक्खां ये; कने तिन्हारे खास नेता लोकां पर अपणा हक जताणा चाँये। 26पर तुहां च येढ़ा नीं हूणा; बल्कि तुहां च सै जे महान बणना चाँह सै तुहांरा सेवक बणो; 27कने सै जे तुहां च मुखिया बणना चाओ सै तुहांरा दास बणो; 28तियां जे भई माहणुये रा पुत्र, यनि हऊँ इस खातर नीं आया भई अपणी सेवा करवाऊँ, पर हऊँ इस खातर आया भई अप्पूँ सेवा करूँ कने बौहत सारे लोकां जो पापां ते छुड़ाणे खातर अपणा प्राण देऊँ।”
दो अन्हेयां जो आक्खीं रिया जोता रा दान
(मरकुस 10:46-52; लूका 18:35-43)
29ताहली जे सै यरीहो नगरा ते निकल़ी रां थे, तां लोकां री इक बड्डी भीड़ तिन्हारे पिच्छे चलीपी। 30कने दो अन्हे, सै जे सड़का रे कण्डे बैठिरे थे, ताहली जे तिन्हे सुणया भई यीशु तिन्नी चियें जाई करां, सै रड़ाये कने बोलणे लगे, “प्रभु, दाऊद रे वंशज, अहां पर दया कर।” 31लोकें सै थिड़के कने गलाया तुहें चुप नीं रैई सकदे; पर सै तिसते बी जादा राड़ां मारने लगे, “प्रभु, दाऊद रे वंशज, अहां पर दया कर।” 32फेरी यीशुये रुकीने सै सद्दे कने गलाया, “तुहें क्या चाँये भई हऊँ तुहांरे खातर क्या करूँ?” 33तिन्हे तिसने गलाया, “प्रभु, ये भई अहें देखणे लायक हुईजो।” 34यीशुये तरस खाईने तिन्हांरियां आक्खीं छुईयां, कने सै इकदम देखणे लगे; कने सै तिन्हांरे पिच्छे चलीपे।
Voafantina amin'izao fotoana izao:
मत्ती 20: KFSNT
Asongadina
Hizara
Mampitaha
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This work is licensed under Creative Commons Attribution-ShareAlike 4.0 License.
