लूका 5

शुरु रे चेलयां रा सद्दया जाणा

(मत्ती 4:18-22; मरकुस 1:16-20)

1इक बगत ताहली जे भई लोकां रा दंगल यीशुये जो चऊँ पासयां ते घेरी ने परमेशरा रा बचना सुणीराँ था, कने सै गन्नेसरत नदिया रे कण्डे खढ़िरा था। 2तिने नदिया रे कण्डे दो किश्तियां खढ़ी रियां देखी, कने मच्छुवारे तिन्हां किश्तियां जो ऊथी छड्डिने मच्छियां पकड़ने रे अपणे जाल़ा जो धोई कराँ थे। 3यीशु तिन्हां किश्तियां चते इक्की पर चढ़ीग्या, सै जे शमौना री थी, कने तिने तिसते बिनती किति भई “कश्तिया जो कण्डे ते थोड़ा जेआ खसकाई ने पाणिये च लेई चल।” फेरी यीशु तिसच बैट्ठीने ऊथीते लोकां जो बचन सुनाणे लगया। 4जिस बगत सै लोकां ने गल्ल करी बैट्ठया, तां तिने शमौना जो गलाया भई, “तिसा जगह जे डुग्गा पाणी आ ऊथी लेईने चल, कने मच्छियां जो पकड़ने खातर अपणे जाल़ पाणिये च पाई दे।” 5शमौने जबाब दित्या, “गुरू जी, अहें पूरी रात इस खातर कड़ी मेहणत किति, पर इक बी मच्छी नीं पकड़ी सक्के, काँह्भई जे तुहें येढ़ा बोलां ये तां तुहांरे बोलणे ते हऊँ जाल़ पाई देआं।” 6ताहली जे पतरस कने तिसरे साथियें पाणिये च जाल़ सट्टे, तां इस बार तिन्हारे जाल़ मच्छियां ने इतणे भरीगे भई तिन्हांरा फटणे रा खतरा हुईग्या। 7इस खातर तिन्हें अपणे साथियां जो सै जे दुज्जिया किश्तिया पर स्वार थे तिन्हांजो अपणी सहायता करने खातर ईशारा करीने सदया। कने तिन्हे इकदम आईने, दोन्नों किश्तियां मच्छियां ने इतणियां भरी लियां भई सै डुबणे लगियां। 8येढ़ा देखीने ताहली शमौन पतरस प्रभु यीशुये रे पैराँ च पैईया कने गलाया, “प्रभु जी, मेरे लाते चली जावा, काँह्भई हऊँ इक पापी माहणु आ कने तुहांरे सामणे रैहणे लायक निआं।” 9तिने येढ़ा इस खातर गलाया भई इतणी जादा मच्छियां पकड़ी जाणे ते तिस्सो कने तिसरे साथियां जो बौहत हैरानी हुई। 10कने तियां इ जब्दिये रे पुत्र, याकूब कने यूहन्ने जो बी, सै जे शमौना रे साथी थे, हैरानी हुई फेरी यीशुये शमौना जो गलाया, “मत डरदा, हूणा ते तू मच्छियां जो नीं, माहणुआं जो मेरेले ल्यौणा।”

प्रभु यीशुये रा इक कोढ़ी माहणुये जो चंगा करना

(मत्ती 8:1-4; मरकुस 1:40-45)

11कने सै किश्तियां जो कनारे पर ली आये, कने सब किछ छड्डिने तिसरे पिच्छे चलीपे। 12ताहली सै किसी नगरा च था, तां देक्खा, तित्थी कोढ़ा ने भरीरा इक माहणु आया, कने सै यीशुये जो देखीने मुँआं रे भार पैईग्या, कने विनती कित्ती, “हे प्रभु, जे तुहें चाओ तां मिन्जो इस कोढ़ा ते ठीक करी सक्कां ये।” 13तिने हात्थ अग्गे करीने तिस्सो छुया कने बोल्या, “हाँ, हऊँ चाँह भई तू ठीक हुई जाओ!” कने तिसरा कोढ़ इकदम जान्दा रैया। 14फेरी तिने तिस्सो चेतावनी दित्ति, “किसी ने नीं बोल, पर जाईने खुद अप्पूँजो याजका ले दास्स, कने अपणे पवित्र हुणे रे बारे च जो किछ मूसे चढ़ावा ठैहराईरा तिसजो चढ़ा भई तिन्हां पर गवाही हो।” 15पर प्रभु यीशुये रे नीं चाहणे रे बाबजूद, तिन्हारे हैरान करने औल़े कम्मां री गल्लां बड़े छोड़े फैल्ली, कने दंगला रे दंगल तिन्हाजो सुणने रे खातर कने अपणी बमारियां ते ठीक हुणे खातर औन्दे गये। 16पर यीशु तिन्हाते दूर सुनसान जगह च जाईने प्राथना कराँ था।

धरंगा रे रोगिये जो चंगा करना

(मत्ती 9:1-8; मरकुस 2:1-12)

17इक दिन ताहली जे यीशु बचनां री शिक्षा देईराँ था, तां किछ फरीसी कने व्यवस्थापक बी ऊथी बैठिरे थे, ये लोक गलील कने यहूदिया प्रदेशा रे हर इक गाँवां ते कने यरूशलेम नगरा ते आईरे थे काँह्भई चंगा करने औल़ी प्रभुरी सामर्थ यीशुये सौगी थी। 18कने देक्खा कई लोक इक माहणुये जो सै जे लकवे रा रोगी था, पाल़किया पर ल्याये, कने सै तिस्सो अन्दर ले जाणे कने यीशुये रे सामणे रखणे रा उपाय टोल़ीराँ थे। 19कने ताहली जे भीड़ा री वजह ने तिस्सो अन्दर नीं ले जाई सक्के तां तिन्हें छत्ता पर चढ़ीने कने खपरैल हटाईने, तिस्सो पालकिया सौगी बिच्चा ते यीशुये रे सामणे उतारीत्या। 20येढ़ा करने ते यीशुये तिन्हारे भरोसे जो देखीने तिस माहणुये जो गलाया, “मेरे दोस्त, तेरे पाप माफ हुए।” 21फेरी शास्त्री कने फरीसी अपणे-अपणे मनां च बिचार करने लगे भई, “ये कुण आ, सै जे परमेशरा री निंध्या कराँ? परमेशरा जो छड्डिने कुण पापां जो माफ करी सक्कां?” 22यीशुये तिन्हारे मना री गल्लां जाणीने, तिन्हांने बोल्या, “तुहें अपणे मना च बुरा बचार कजो करी रांये? 23क्या येढ़ा बोलणा सान आ हूणा? तेरे पाप माफ हुये या येढ़ा बोलणा भई उट्ठ कने चलने लग? 24पर इस खातर भई तुहें जाणी सक्को माहणुये रे पुत्रा जो इसा धरतिया पर पापां जो माफ करने रा बी अधिकार आ।” तिने तिस लकवे रे रोगिये जो गलाया, “हऊँ तिज्जो बोलां, उट्ठ कने अपणिया पाल़किया चक्कीने अपणे घरा जो जा।” 25सै इकदम इ तिन्हांरे सामणे उट्ठीने खड़ा हुया, कने तिस पर जे सै पैईरा था तिस्सो चक्कीने, परमेशरा री बडयाई करदा हुआ अपणे घरा जो चलिग्या। 26फेरी सारे लोक हैरान हुईगे कने परमेशरा री बडयाई करने लगे, कने सै डरीने बोलणे लगे, “आज्ज अहें नोखियां गल्लां देखी।”

यीशुये लेविये जो अपणे पिच्छे चलने रा हुक्म दित्या

(मत्ती 9:9-13; मरकुस 2:13-17)

27कने इसते बाद, सै बाहर गया, कने इक लेवी नौआं रे चुंगी लेणे औल़े जो चुंगी लेणे औल़े नाक्के पर बैठिरा देख्या, कने तिसने बोल्या, “मेरे सौगी औ।” 28फेरी सै सारा किछ छड्डिने तिसरे पिच्छे चलीप्या। 29कने लेविये अपणे घरें यीशुये रा आदर करने खातर इक बड्डी धाम दित्ति; कने चुंगी लेणे औल़यां री कने होर मेहमान्नां री सै जे तिस सौगी रोटी खाणे बैट्ठे थे तिन्हांरी इक बड्डी भीड़ थी। 30कने फरीसी कने तिन्हांरे शास्त्री, तिसरे चेलयां ने ये बोलीने शकैत करने लगे, “तुहें चुंगी लेणे औल़यां कने पापियां ने सौगी खां-पीयें?” 31यीशुये तिन्हाजो जवाब दित्या, “डाक्टर भले चंगयां रे खातर नीं, पर बमाराँ रे खातर जरूरी आ। 32कने, हऊँ धर्मियां जो नीं, पर पापियां जो मन फिराणे रे खातर सदणे आईरा।”

उपवासा रे बारे च स्वाल

(मत्ती 9:14-17; मरकुस 2:18-22)

33इक दिन तिन्हें तिसने बोल्या, “यूहन्ना रे चेले त लगातार उपवास रखां ये कने प्राथना करदे रैं, कने तियां इ फरीसियां रे बी, पर तेरे चेले त खांदे पींदे रैं।” 34यीशुये तिन्हाते पुच्छया, “तदुआं तक जे लाड़ा सौगी आ, तां क्या तुहें बरातियां जो उपवास करने खातर बोल्ली सक्का ये? 35पर सै वगत औणा ताहली जे लाड़ा बरातियां ते लग कित्या जाणा तिस वगत फेरी तिन्हां उपवास रखणा।” 36फेरी यीशुये तिन्हाजो इक उदाहरण दस्या, “कोई बी माहणु नये कपड़े जो फाड़ी ने पुराणे कपड़े पर तिसरी टल्ही नीं लान्दा, कने जे कोई येढ़ा कराँ तां नौआं त फटणा इ फटणा, सौगी जो तिस नौंये टुकड़े पुराणे ने मेल नीं खाणा। 37कने कोई अंगूरां रा नौआं रस पुराणी मशकां च नीं भरदा, काँह्भई नया अँगूरी रस तिन्हाजो फाड़ी ने बगी जाणा, कने तिसते मशकां बी खत्म हुई जाणा। 38अंगूरां रा नौआं रस मशकां ची भरना चाहिन्दा। 39दुखा री गल्ल इ भई सै जे कोई पुराणे अंगूरां रा रस पीआं सै ताजा कने नौआं अँगूरा रा रस नीं पीणा चाहिन्दा। सै बोलां ये, पुराणा इ खरा!”

Voafantina amin'izao fotoana izao:

लूका 5: KFSNT

Asongadina

Dika mitovy

Mampitaha

Hizara