प्रेरितां 23
23
1पौलुसे महासभा खौ नज़राँ गडाई ने देख्या, कने बोल्या “हे भाईयो, मैं अज्जा तका परमेशरा खातर सच्चे मना ने जीवन बिताई रा।” 2तां हनन्याह महायाजके सै जे तिसले खढ़िरे थे, तिन्हांजो पौलुसा रे मुँआं पर थप्पड़ मारने रा हुक्म दित्या। 3फेरी पौलुसे तिसने गलाया, “हे कपटी, परमेशरा तिज्जो मारना। तू व्यवस्था रे मुजब मेरा न्याय करने जो बैठिरा, कने तू व्यवस्था ते बाहर मिन्जो मारने रा हुक्म देआं?”
4सै जे सौगी खढ़िरे थे तिन्हें गलाया, “क्या तू परमेशरा रे महायाजका जो बुरा-भला बोलां?” 5पौलुसे गलाया, “हे भाईयो, हऊँ नीं जाणदा था, भई ये महायाजक आ; काँह्भई पवित्रशास्त्रा च लिखिरा, ‘अपणे लोकां रे मुखिये जो बुरा नीं बोल।’ ”
6तां पौलुसे ये जाणीने, भई किछ सदूकी लोक कने किछ सदूकी लोकां जो सभा च हाक पाईने गलाया, “हे भाईयो, हऊँ फरीसी कने फरीसियां रे वंशा रा, कने मेरा न्याय मरीरयां री आशा कने भीं ते जिऊंदा हुणे रे बारे च हुया राँ।” 7तां जे तिने ये गल्ल बोल्ली तां फरीसियें कने सदूकियां च झगड़ा हुणे लगया; कने सभा च फूट पईगी। 8काँह्भई सदूकी लोकां रा ये विश्वास आ, भई नां मरने ते बाद भीं ते जिऊंदा हूणा, नां स्वर्गदूत, नां आत्मा इ; पर फरीसी इन्हां सब्बीं च विश्वास कराँ ये।
9तां बड़ा हल्ला मचया कने किछ शास्त्री सै जे फरीसी थे, उट्ठीने ये बोलीने बैहस करने लगे, “अहें इस माहणुये च कोई बुराई नीं देखदे, जे कोई आत्मा या स्वर्गदूत तिसने बोलां तां फेरी क्या?” 10ताहली जे बौहत झगड़ा हुआ तां पलटना रे सरदारे इस डरा ते भई सै पौलुसा रे टुकड़े-टुकड़े नीं करी दो, पलटना जो हुक्म दित्या भई पौलसा जो तिन्हां चते जबरदस्ती नकाली लओ, कने कोठड़ियां च लई जाओ।
11तिसा राति प्रभु यीशु तिसले आया कने खड़े हुईने गलाया, “हे पौलुस, हिम्मत रख; काँह्भई तेढ़ी जे तैं यरूशलेम च मेरी गवाही दित्ति, तेढ़ी तिज्जो रोम शहरा च बी गवाही देणे पौणी।”
पौलुसा रिया हत्या री चाल
12ताहली जे दिन हुआ तां यहूदियां रे किछ लोकें चाल खेल्ही कने कसम खाद्दि भई तदुआं तका जे पौलुसा जो मारी नीं देंगे, जे अहें खांगे या पींगे तां अहां पर लाणत इ। 13तिन्हें जे अप्पूँ चियें ये कसम खाद्दि थी, सै चाल़ियां माहणुआं ते जादा थे।
14तिन्हें मुखियायाजकां कने बजुर्ग नेतयां ले आईने बोल्या, “अहें ये कसम खाद्दीरी भई तदुआं तका जे अहें पौलुसा जो मारी नीं देंगे, तदुआं तक जे अहें किछ बी खांये तां अहां पर लाणत इ। 15इस खातर हुण महासभा समेत पलटना रे सरदारा जो समझावा, भई पौलुसा जो तुहांले ली आओ, येढ़ा मन्नीने भई तुहां तिसरे बारे च होर बी ढंगा ने पड़ताल़ करना चाँये; कने अहां तिसरे पुजणे ते पैहले इ तिस्सो मारने खातर त्यार रैहणा।”
16पर पौलुस रे भाणजे सुणया भई सै तिस्सो मारने जो त्यार बैठिरे, तां कोठड़िया च जाईने पौलुसा जो ब्योरा दित्या। 17पौलुसे सुबेदाराँ चते इक्की जो अप्पूँ ला सद्दीने गलाया, “इस जवाना जो पलटना रे सरदारा ला लई जावा, ये तिसने किछ बोलणा चाँह।”
18इस खातर सुबेदारे पौलुसा रे भाणजे जो पलटना रे सरदारा ले नेईने गलाया, “कैदी पौलुसे मिन्जो सद्दीने विनती कित्ती, भई ये जवान पलटना रे सरदारा ने किछ बोलणा चाँह; इस्सो तिसला लई जवा।” 19पलटना रे सरदारे तिसरा हाथ पकड़ीने तिस्सो लग नेईने पुच्छया, “तू मेरने क्या बोलणा चाँह,”
20तिने गलाया, “यहूदी अगुवेयां साजस कित्तिरी भई तेरने विनती करो भई कल पौलुसा जो महासभा च ल्याओ, मन्नो भई सै होर बी ठीक ढंगा ने तिसरी जाँच करना चाँये। 21पर तिन्हांरी देखां सुणदा काँह्भई तिन्हां चते चाल़ी माहणु पौलुसा जो मारने खातर त्यार बैठिरे, तिन्हें ये कसम खाद्दीरी भई तदुआं तका जे तिन्हां पौलुसा जो मारी नीं देणा तदुआं तका नां किछ खाणा नां पीणा। कने हुण सै त्यार ये कने तेरे बायदे रा इन्तजार करया रायें।”
22फेरी पलटना रे सरदारे जवानां जो ये हुक्म देईने भेजित्या, “किसी ने देखां बोलदा भई तैं मिन्जो ये गल्लां दस्सी रियां।”
पौलुसा जो फेलिक्सा ले भेज्या जाणा
23फेरी पलटना रे सरदारे दो सुबेदाराँ जो सद्दीने गलाया, “दो सौ सैनिक, सत्तहर स्वार, कने दो सौ भाले औल़े, राति रे नौ बजे ते बाद कैसरिया नगरा जो जाणे खातर त्यार करी रखयों। 24कने पौलुसा रिया स्वारिया खातर घोड़े त्यार रखयों, भई तिस्सो फेलिक्स हाक्मा ला सही सलामत पहुँचाई देओ।”
25पलटना रे सरदारे येढ़ि इक चिट्ठी बी लिखी:
26“महामहिम् फेलिक्स हाक्मा जो क्लौदियुस लूसियास रा नमस्कार; 27इस माहणुये जो यहूदियें पकड़ीने मारना चाया, पर तां जे मैं जाणया भई सै रोमी आ, तां पलटन लईने तिस्सो छडवाईल्या।
28“हऊँ जाणना चाँह था भई सै किस वजह ते तिस परा दोष लाया रायें, इस खातर तिस्सो तिन्हां रिया महासभा च लईग्या। 29तां मैं जाणी लया भई सै यहूदी व्यवस्था रिया बैहसा रे बारे च तिस परा दोष लांये, पर मारी देणे खातर तिसच कोई दोष नीं मिलदा। 30कने ताहली जे मिन्जो पता लगया भई सै इस माहणुये रिया घाता च त्यार हुईने बैठिरे, तां मैं ताहलु इ तिस्सो तेरले भेजित्या; कने दोष लाणे औल़यां जो बी हुक्म देईत्या भई तेरे सामणे तिस परा इल्जाम लाओ।”
31इस खातर तेढ़ा जे सैनिकां जो हुक्म दित्तिरा था, तियां इ सै पौलुसा जो लईने रातों-रात यरूशलेम ते अन्तिपत्रिस नगरा च ल्याये। 32दुज्जे रोज सै स्वाराँ जो पौलुसा सौगी कैसरिया नगरा जो जाणे खातर छड्डिने सपाई यरूशलेम जो वापस हुये। 33तिन्हें कैसरिया नगरा च पुज्जी ने राजपाल जो चिट्ठी दित्ति; कने पौलुसा जो बी तिसरे सामणे खड़ा कित्या।
34ताहली जे राजपाले चिट्ठी पढ़ी, तां तिने पुच्छया भई पौलुस किस प्रदेशा ते था। ताहली जे तिने सिख्या भई सै किलिकिया ते था। 35कने ताहली जे पता लगया भई सै किलिकिया प्रदेशा रा, तां तिसने गलाया, “ताहली जे तेरे आरोपियां बी औणा तां हऊँ तेरा मुकद्दमा सुणांगा।” कने तिने पौलुसा जो हेरोदेस रे किले च पैहरे च रखणे रा हुक्म दित्या।
Voafantina amin'izao fotoana izao:
प्रेरितां 23: KFSNT
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This work is licensed under Creative Commons Attribution-ShareAlike 4.0 License.