1 पतरस 2
2
जिऊंदा पत्थर कने पवित्र लोक
1इस खातर हरेक बुराईया ते दूर रौआ। दुज्यां जो धोखा मत देआ कने कपटी मत बणा, जल़ण करने औल़े मत बणा कने किसी री बेईज्जति मत करा, 2पर तियां जे नये जम्मीरे बच्चे अपणिया मौआ रे असली दुधा खातर तरसां ये तियां इ तुहांजो बी परमेशरा रे वचना जो सिखणे खातर तरसणा चाहिन्दा, ताकि तिसरे जरिये पूरे तरिके ने छुटकारा पाणे खातर तुहें बधदे जाओ। 3काँह्भई तियां जे पवित्रशास्त्र बोलां, “तुहें तजरबे ने जाणील्या भई प्रभु भला।”
4प्रभु यीशुये ले औआ सै जे जीवित पत्थर आ, तिसजो जे लोके निकम्मा समझीने त्यागी तरा, पर परमेशरे तिसजो चुणया कने सै तिसरे खातर कीमती आ। 5तुहें बी जीवित पत्थराँ साई आओ कने आत्मिक घर बनाणे च अप्पूँजो इस्तेमाल करा, तित्थी जे तुहां आत्मिक बलिदान चढ़ाणे खातर पवित्र याजकां साई सेवा करनी, सै जे यीशु मसीह रे जरिये परमेशरा रिया नज़राँ च ग्रहण करने लायक हो। 6काँह्भई पवित्रशास्त्रा बोलां :
“देक्खा! हऊँ सिय्योन च कुणे रा पैहला चुणीरा कने बौहत कीमती पत्थर रक्खां;
कने सै जे कोई तिस पर विश्वास करगा, तिस्सो कदीं बी शर्मिन्दा नीं हुणे पौणा।”
7इस खातर तुहां विश्वास करने औल़यां रे खातर ये पत्थर बौहत कीमती आ,
पर सै लोक जे विश्वास नीं करदे तिन्हांरे खातर,
“तिस पत्थरा जो जे राजमिस्त्रियें बेकार समझीने त्यागी तरा था,
सैई पत्थर कुणे रा पैहला पत्थर हुईग्या,”
8कने पवित्रशास्त्र बी बोलां,
“येई पत्थर आ तिसते जे लोकां जो ठोकर लगां इ
कने चट्टान तिन्हांजो थल्ले सट्टां इ।”
तिन्हांजो ठोकर लगां इ, काँह्भई सै परमेशरा रे सन्देशा पर विश्वास नीं करदे, तिन्हांरे खातर ये परमेशरे तैह कित्या था।
9पर तुहें चुणीरे लोक ये कने याजक ये सै जे राजे साई परमेशरा री सेवा कराँ ये, पवित्र प्रजा कने परमेशरा रे लोक ये। तिने तुहांजो अन्धकारा चते अपणी अदभुत ज्योतिया च सद्दीरा ताकि तुहें तिसरे अदभुत कम्मां रा प्रचार करी सक्को। 10पैहले तुहें परमेशरा रे लोक नीं थे, पर हुण तुहें परमेशरा रे लोक ये। पैहले तुहां पर परमेशरा री दया नीं हुईरी थी, पर हुण हुईरी।
मसीह जिम्मेवारी
11मेरे प्यारे मित्रो, हऊँ तुहांजो विनती कराँ भई तुहें अप्पूँजो परदेशी कने मुसाफर समझीने तिन्हां शरीरा री बुरियां इच्छां ते दूर रौआ सै जे हमेशा तुहांरिया आत्मा रे बरोधा च लड़ाई कराँ इयां। 12अविश्वासी लोकां रे बिच तुहांरा चाल-चल़ण ठीक हो, इस खातर भई तिन्हां गल्लां च जे सै तुहांजो बुरा समझीने बदनाम कराँ ये, सै तुहांरे भले कम्मां जो देखीने परमेशरा रे औणे रे दिन परमेशरा री महिमा करो।
अधिकारियां रे अधीन रैहणा
13प्रभुये जो आदर देणे रे खातर तुहांजो इस संसारा रे सारे अधिकारियां जो मनणा चाहिन्दा : राजे जो बी सै जे सब्बींते बड्डा अधिकारी आ, 14कने राजपाला रे बी अधीन रौआ, काँह्भई सै गल़त करने औल़यां जो सजा देणे कने भला काम्म करने औल़यां जो आदर देणे खातर राजे रे जरिये नियुक्त कित्या गईरा। 15काँह्भई परमेशरा री इच्छा येई ताकि तुहें भले काम्म करने ते बेअक्कल लोकां री अज्ञानता रियां गल्लां जो बन्द करी देआ सै जे तुहांरे खिलाफ कराँ ये। 16अजाद माहणुये साई जीओ, पर अपणिया इसा अजादिया जो बुराईया रे खातर आड मत बणावा; पर अप्पूँजो परमेशरा रे सेवक समझीने जीओ। 17सब्बीं लोकां रा आदर करा, अपणे साथी विश्वासियां ने प्यार रखा, परमेशरा ते डरा कने राजे रा आदर करा।
मसीह अहांरा आदर्श
18अरे सेवको, पूरे आदरा ने अपणे मालकां रे अधीन रौआ, न सिर्फ भले कने नम्र मालकां रे, पर निर्दयी मालकां रे प्रति बी। 19जे कोई परमेशरा रा ध्यान करदे हुये अन्याय रिया वजह ते दुख सैयां, तां तिसते परमेशर बौहत खुश हुआं। 20पर जे बुरे कम्मां रिया वजह ने तुहांजो मारया-कुट्टया जां कने तुहें धीरज रक्खया, तां इसच प्रशंसा री क्या गल्ल इ, पर जे भला काम्म करीने दुख सैया कने धीरज रक्खां ये, तां इसते परमेशरा जो खुशी हुआं इ।
21परमेशरे तुहें इस खातर सद्दीरे, काँह्भई मसीहे बी तुहांरे खातर दुख सैईरा कने अहांरे खातर इक उदाहरण बणीगरे, ताकि तुहां बी येढ़ा दुख सैहणा तियां जे तिने दुख सैया। 22पवित्रशास्त्र बोलां,
मसीहे कदी कोई पाप नीं कित्या,
कने तिने कदीं कोई झूठ नीं बोल्या।
23तिने गाल़ी सुणीने गाल़ी नीं दित्ति, कने दुख सैहीने किसी जो बी धमकी नीं दित्ति; बल्कि तिस सच्चा न्याय करने औल़े परमेशरा रे अग्गे तिने खुद अप्पूँजो सौंपीत्या।
24सै खुद अहांरे पापां जो अपणे शरीरा पर लेईने क्रूसा पर चढ़ीग्या, ताकि अहें पापां रे खातर मरी सक्को कने धार्मिकता रे खातर जी सक्को; तिसरे जख्मां रे जरिये तुहें चंगे हुईरे। 25पैहले तुहें भटकी रियां भेड्डां साई थे, पर हुण अपणे प्राणां रे चरवाहे कने देख-रेख करने औल़े ले वापस आई चुक्कीरे।
Voafantina amin'izao fotoana izao:
1 पतरस 2: KFSNT
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This work is licensed under Creative Commons Attribution-ShareAlike 4.0 License.