Mika INDRAY MIJERY
INDRAY MIJERY
I Mika mpaminany dia niara-belona tamin’Isaia ary samy niasa tao Joda izy roalahy. Tokony ho tamin’ny 740–700 eo ho eo ny fotoana niasany. Izany dia fotoana nikorontana sy nampihorohoro tokoa satria tamin’izany dia mandrahona hamely ny fanjakana Joda ny Asiriana.
Ny votoatin’ny Boky
Ambaran’i Mika fa i Jerosalema dia ho potika sahala amin’ny nanjo an’i Samaria izay rava tamin’ny taona 721 tal JK. Izany dia noho ny fahotana manjaka ao, indrindra fa ny tsy fahamarinana eo amin’ny fiarahamonina. Ambaran’ny Mpaminany fa Andriamanitra mihitsy no miditra an-tsehatra mitaky ny fahamarinana sy ny fitiava-namana. Samy mahazo teny tandrify azy na ny loholona na ny mpanapaka na ny mpisorona na ny mpitsara mandray kolikoly na ny mpaminany sandoka mila vola amin’ny faminaniany. Manaitra ny mpihaino ny Mpaminany mba hisaina ka hanapa-kevitra hankatò ny sitrapon’Andriamanitra, dia ny hanao ny marina sy ho tia famindrampo, ary ny hanaraka an’Andriamanitra amin’ny fanetren-tena. Mifandimby ao amin’ny Boky ny fananarana hentitra sy ny fanambaràna famonjena izay hataon’Andriamanitra amin’ny ho avy.
Ny firafitry ny Boky
Misy fizarana telo ny Boky, koa ny fizarana tsirairay dia miandoha amin’ny teny fanamelohana ary mifarana amin’ny teny fampanantenana ho an’izay sisa.
Fizarana 1: 1–2
Teny fampidirana nataon’ny mpandamina ny Boky: 1.1
Fanamelohana ireo mpanankarena manao an-keriny sy mpandainga: 1.2–2.11
Fampanantenana fa mbola hangonin’NY TOMPO, Mpiandry tsara, indray, ny olona sisa: 2.12-13
Fizarana 2: 3–5
Fanamelohana ireo mpitondra: 3.1-12
Fampanantenana ny amin’ny hoavy. Hisy zazalahy ho teraka ao Betlehema, izay hiandry ny sisa amin’ny Israely amin’ny herin’NY TOMPO ary hitondra amin’ny fiadanana: 4–5
Fizarana 3: 6–7
Fanamelohana noho ny faharatsiam-panahy nanjaka teo amin’ny fiarahamonin’ny olon’Andriamanitra, ary fitarainan’ny Mpaminany noho izany: 6–7.6
Fanantenan’ny Mpaminany fa mbola haneho ny famindrampony ihany Andriamanitra: 7.7-20
Voafantina amin'izao fotoana izao:
Mika INDRAY MIJERY: MRV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© La Société Biblique Malgache 2011