Lomɛ́ŋ 8
8
Kusɔ́tɔn ɔlɔŋ ne kiliínditíe kí Támbák
1Nínúan epé pɛ́nyɛɛ́ papílán é Yésus Kilíis tipá pá kuánd apá pɛpɛnɛ́n. 2Á kiákí ɛ́ɛ́ Emfúnukufúúmɛ matúfá kusɔ́t é Yésus Kilíis, umiŋáŋɔ́n ó kikotí kí kifal ne niku. 3Epú púmaákányɛ́n kikotí kí Moyíis ó pusíó ɛ́ɛ́ emekú mapá tolitoli, Támbákɛ́ɛ woowóónyi epú kikotí mɛɛ́l kitiwóónyi, ó pusíó pú kifal, Támbákɛ́ɛ wɛɛpɛn kɛɛ, waatɔ́m muɔ́nɔ́kɔ́ɔn wɛɛyɛ́ ɔ́ kuɔsisɔ́tɔ́n ɔ́ nuɔ́l nunyɛɛ́ ɛlɛɛ́ nuɔ́l nú mɔɔnd u kifal. 4Umɛɛl anakáánɛ́ ɛ́ɛ́: túsɔ́tɔn aná kikotí ɔ́ɔ́yɔɔnɛ́ɛ. Maná pútiandá apá á kipiá kí emekú, maná á kipia kí Emfúnukufúúmɛ. 5Kɔk epé pɔ́ɔ́pinɔnɛ́ɛ kípia kí imekú, imekú ɔ́sɔ́tɔn ɔ́ pilɔ́ɔ́ŋɛ́t pí imekú, maná epé pɔ́ɔ́pinɔnɛ́ɛ Emfúnukufúúmɛ ɔ́sɔ́tɔn aná Emfúnukufúúmɛ ɔ́ɔ́yɔɔnɛ́ɛ. 6Pitɔ́ndɔ pí nuɔ́l eyuukesi é niku maná epú Emfúnukufúúmɛ ɔ́ɔ́yɔɔnɛ́ɛ éyuukesi ɔ́ kusɔ́t ne kiyeéwe. 7Á kiákí ɛ́ɛ́ epé pilɔ́ɔ́ŋɛ́t píɔ́pɔ́ pí imekú píányinanɛ́ pɔ́ nyɛ pokóyikoy pá Támbák, pátipá pɔ́ɔ́pinɔn kikotí kí Támbák, á kiákí ɛ́ɛ́ pátipá na pukaaka pú kuɔ́pɛn ó kikotí kí Támbák. 8Epé pɛ́nyɛɛ́ á kipia kí imekú pátipá pɔ́kupɔ́tɔkɛn Támbákɛ́ɛ. 9Kɔk panɔ́ nutipá á kipia kí emekú, maná á kipiá kí Emfúnukufúúmɛ, á kiákí ɛ́ɛ́ Emfúnukufúúmɛ ú Támbák ɔ́ɔ́lɔpɔn káánɔ́. Índɛ mɔɔnd tipá upian Emfúnukufúúmɛ ú Kilíis utipá wɔ́ɔ́pinɔn wɔ. 10Maná índɛ Kilíis ɔ́ɔ́nyɔ́mbitɔn Káánɔ́, tɛ kúpá ɛ́ɛ́ nuɔ́l nuánɔ́ ényíkú ó pusíó pú kifal, Emfúnukufúúmɛ u Támbák ánúfáan kusɔ́t, á kíákí Támbák ánúák indɛ́ndɛ́nɛ kɛ́ɛ́yɛ́ ké eŋis. 11Índɛ Emfúnukufúúmɛ ú éwú umeényí Yésuse é peekúén ɔ́ɔ́lɔpɔn naanɔ́, weényééki kusɔ́t ké Emfúnukufúúmɛ káánɔ́ ɔ́ tuɔ́l tuukúén. 12Paandimán tuémenyen ɛ́ɛ́: tuápián ɔɔlɔ́ útiányípá ɔ́ pilɔ́ɔ́ŋɛ́t pí emekú epí tuɔyɔnɛ́ táásɛ, tutipá tuɛsikɛnɛn ɛ́ɛ́ túánd ɔsɔ́tɔn aná emekú wáásɔ́ pílɔ́ɔ́ŋɔnɛ́ɛ. 13Índɛ nuɔ́sɔ́tɔn, nuɔŋɔn ɔ́ pilɔ́ɔ́ŋɛ́t pí emekú nuényiku; maná índɛ, á pukaaka pú Emfúnukufúúmɛ, nusɔ́k kikɔ́nd á maandá máánɔ́ makáánɛ́, nuɔ́nyísɔt. 14Epé kitikit kiliínditíe kí támbák endesíé pɔ nyɛ paán pá Támbák. 15Nutimatáŋap efúnukufúúmɛ ɛ́ɛ́ únúéyi piɔ́lí kunyaánɛ ɛ́ɛ́ wáánda onúóndosi á pumbíla, maná tumapia enfúnukufúúmɛ útúéyesíe paán pá Támbák púú túpílanɛ́ wɔ́ ɛ́ɛ́: Ápá, anakáánɛ́ kunyɛɛ́ ɛ́ɛ́ Taát. 16Enfúnukufúúmɛ ú Támbák ɔ́ɔ́kɔɔyɔn kiliíndtié kíásɔ́ ɛ́ɛ́ túɛ́yɛ́ paán pá Támbák. 17Tunyɛ paán pá Támbák: tuátáŋapa kákásɔ́ maandá maatámb, emé Támbák maákɛ́n nikúli níɛ́yɛ́ indan. Tuányítáŋap niap ɔlɔŋ ne Kilíis, á kiákí ɛ́ɛ́ índɛ tuɔ́kɔ́pikɔn ɔlɔŋ nɛɛyɛ́, tuányipá nɛɛyɛ́ kɛ́ɛ́yɛ́ é nukúm nɛkɛtɛ́ɛ.
Nukúm nuólonée
18Káámɛ, muyú múásɔ́ mú nínúan tipá ni iŋetí, ne nukúm nú Támbák enú weényítútíínyenyée. 19Á kiákí ɛ́ɛ́ maandá kitikit Támbák maáluŋá éépétenyi ni itɛ́m kundukund, puɔ́s epú Támbák éényítíínyenyée nukúm nú paán pɛ́ɛ́yɛ́. 20Á kiákí ɛ́ɛ́ piluŋaluŋa kitikit makɔɔ́n á kipia kí imbekí isɛ́kísɛ́k, piluŋaluŋa pikáánɛ́ píímuɛ́t timakɔɔn á kiákí ɛ́ɛ́ pímɔɔyɔ, maná Támbákɛ́ɛ kɔk umaák pɛ́, á kipia kikáánɛ́. Maná pí mɛnɛkɛ́n pipíódínyí ɔtɛ́m. 21Ɛ́ kuɛlɛ ɛ́ɛ́ Támbák ányááŋɔn piluŋaluŋa pikáánɛ́ ɔ́ puɔ́lí pú niku, páányípá weéŋelí póond pátáŋap nukúm enú Támbák éényékényé paán pɛ́ɛ́yɛ́. 22Tuémenyen peseé ké peseée ɛ́ɛ́: kuasiám ninúan piluŋaluŋa kitikit áákíma nɛ kutɛ́ɛ́ ɛlɛɛ́ akáandɔ́ upéétenyé nupíén. 23Kútipá pɔ́ pééŋény pépéétenyée, tɛ pasɔ́ kákásɔ́ epé tuányípiá Emfúnukufúúmɛ ɛlɛɛ́ niap ni kutúan é púúpú Támbák maátuákɛ́n indan ɛ́ɛ́ waányítúfa, tuákíma kákásɔ́ kí itɛ́m ɛlɛɛ́ pɔ, tuépéétenyi ɛ́ɛ́ Támbák túéyi paán pɛ́ɛ́yɛ́ pɛ́ ɛɛn, wóond wááŋɔn tuɔ́l túásɔ́. 24Á kiákí ɛ́ɛ́ tunyɛ petúkúnén, maná ó pipíóndínyí ɔtɛ́m. Kɔk, índɛ ɛɛ́kɛɛ́nɛn pú pípíóndonyé ɔtɛ́m, pukáánɛ́ tipá kupíóndi ɔtɛ́m. Anyɛ kuand opíóndi ɔtɛ́m é púúpú ɛ́ɛ́nɛnɛ́ á? Aákóo. 25Maná índɛ tuópíóndonyi ɔtɛ́m é púúpú tutiányípá tuɛ́nɛn, tuépéétenyi pú ne kuésepenyi. 26Piluŋ pímoómí, Emfúnukufúúmɛ kɛ́kɛ́ɛ́yɛ́ ɔ́ɔ́tuɔ́yikɔnɛn káásɔ́ á punɔ́ɔ́n, á kiákí ɛ́ɛ́ tutipá tumenyen kupísókoliti aná kuɛ́sikɛnɛnɛ́ɛ. Maná Emfúnukufúúmɛ óópísókolonyi káásɔ́ ó pusíó nɛ ɛmbíyɛ́kɛ́l mɔɔnd tiányípá ukuémi. 27Támbákɛ́ɛ kɔk wɛɛ́nɛnɛ́ itɛ́m siásɔ́ émenyen epú Emfúnukufúúmɛ áámbanɛ́ kuɔŋɛn, á kiákí ɛ́ɛ́ Emfúnukufúúmɛ óópísókolonyi aná Támbák ɔ́ɔ́yɔɔnɛ́ɛ é péépé pɔ́ɔ́pinɔnɛ́ɛ wɔ. 28Tuémenyen ɛ́ɛ́, puandá kitikit púmɛ́nyipíɛ́lɛ́, ɔ́ɔ́kɔtɔ é peseé ó pusíó pú péépé pɔ́ɔ́yɔnɛ́ Támbákɛ́ɛ, pányɛ papílán aná nuketi núɛ́yɛ́ ɔ́ɔ́yɔɔnɛ́ɛ; 29Épé Támbákɛ́ɛ wɔ́ muɛ́t maáyɔ́ɔ́n kisíósíó, umandá asɔ́mb ɛ́ɛ́ pápá imfuényé nɔ muɔ́nɔ́ wɛɛyɛ́; ɛ́ kuɛlɛ ɛ́ɛ́ Támbák ééyi muɔ́nɔ́ wɛɛyɛ́ ukutuán á paán pɛ́ɛ́yɛ́ kitikit. 30Épé umaáyɔ́ɔ́n kisíósío, wapílíkɛn pɔ; epé u maápílíkínɛ weekeéyi pɔ́ indɛ́ndɛ́nɛ, epé umeéyí pɔ́ indɛ́ndɛ́nɛ, weekúmi pɔ.
Puandá tipá kutúátɔn ni iŋɔyɔ i Támbák
31Tuɔ́yɛt ɛ́ɛ́ kiákí andíkɛ́k? Índɛ Támbák nyɛ káásɔ́ á kiáyí, ɛ́nyɛ́ unyɛɛ́ ukutúnuenesi? 32Wɔ́ ewú umɛɛ́l utikányí ɛ́ɛ́ muɔ́nɔ́ wɛɛyɛ́ ɛ́ɛ́n muyu, wɛɛsɛm wɔ́ káásɔ́ ó pusíó. Tiɛkiɛ́ unyɛɛ́ pɛ́kuɛ́nyɛ́ɛl ɔlɔŋ nɔ muɔ́nɔ́ wɛɛyɛ́ utitúfá puandá kitikit? 33Ɛ́nyɛ́ unyɛɛ́ ukusɔɔ́mɔn paayúúnanɛ́ pá Támbák? Tɛ mɔɔnd, á kiákí ɛ́ɛ́ Támbákɛ́ɛ wééyesíe mɔɔnd indɛ́ndɛ́nɛ. 34Ɛ́nyɛ́ unyɛɛ́ pɛ́ kupɛn pɔ́ kɔk? Tɛ mɔɔnd, á kiákí ɛ́ɛ́ Yésus Kilíis mekú, sol sol woond wɛɛnyɔk á pilɔ́ŋ, unyɛ ɔnyɔ́l kɔ́ ɔmbɔ́k u ɔnɛ́m ú Támbák, woópísókolonyi káásɔ́ ó pusíó. 35Kiákí kínyɛɛ́ kutuátɔn ɔ́ niɔy ení Kilíis pianɛ́ káásɔ́ ó pusíó? Muyú éé? Indúmtén éé? Insésítényi éé? Insana éé, Ɔsɔ́k éé, Kilɔk éé, Nikú éé. 36Púnyɛ puɔ́ŋɔ́n ɛ́ɛ́: Ó pusíó pú Támbák pasɔ́ kitikit tunyɛ patambíkán é nikú puɔ́súm puɔsúm, pɛ́tuɛ́lɛ ɛlɛɛ́ pitúmbɛ́ɛ páyuukanɛ́ na pɛ́ é nisikit melúk. 37Maná á máamakáánɛ́ kitikit, tuápíányinan ká akaminɛ ewú umɔɔ́tuɔ́yɛ́t. 38Ɛ́ɛ́ɛ́ sá sá sá yeémenyén ɛ́ɛ́: Tɛ́ nikú, tɛ kusɔ́t, tɛ pe Éŋele, tɛ kipia, tɛ kipíányina, tɛ á kí ninúan, tɛ kíólonée, 39tɛ pukaaka pú mɛnɛ́mɛnɛ́ɛ, tɛ pú eŋulúm, tɛ kiluŋaluŋa kilotí, tíányitúátɔ́n nɔ niɔy ení Támbák mɔɔ́túɔ́yɛ́t é Yésus Kilíis Ɔkɔ́n waasɔ́.
Oyo Eponami Sikoyo:
Lomɛ́ŋ 8: yav
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2026, CABTAL