2 Кор 6
6
6 ГЛАВА
1 Йымы доно пуреммӓш. 14 Ӹнянӹшӹ эдем – Йымын ӹлӹмӹ вӓржӹ.
1Йымы доно иквӓреш пӓшӓм ӹштӹшӹ ылынаат, мӓ тӓмдӓм сарваленӓ: Йымын благодатьшым нӓлмӹдӓ такеш ӹнжӹ ли. 2Вет Йымы попа:
«Ярал веремӓн Мӹнь тӹньӹм колынам,
ытарымы кечӹн тӹлӓт палшенӓм».#6:2 Ис 49:8.
Теве ӹнде ярал жеп, теве ӹнде ытарымы кечӹ.
3Служымы пӓшӓнӓ вырсымы ӹнжӹ ли манын, мӓ иктӹлӓнӓт нима шотыштат шӹртнялтмӹ кӱм ана пиштӹ. 4-5Цилӓ годымат ӹшкӹмнӓм Йымын служышыжы семӹнь анжыктенӓ: цӹтӹмӓштӹ, эксӹкӹштӹ, нелӹштӹ, пӹзӹрньӹкӹштӹ, мӓмнӓм шимӹ годым, кызаматышты, пыдыранзыкышты, нелӹ пӓшӓштӹ, чӹдӹ амалымашты, постышты,#6:4-5 «Постышты»: тидӹм «шужымашты» манынат сӓрӓш лиэш. 6ирештӹ, пӓлӹмӓшӹштӹ, кужын тырхымашты, пурышты, Святой Шӱлӹшӹштӹ, лачокшы яратымашышты, 7тӧр шамакышты, Йымын силаштыжы – мӓ тӧр ӹштӹмӓш вырсы хӓдӹрӹм вургымла дӓ шалахай кидӹштӹ кыченӓ, – 8лӹмлештмӓштӹ дӓ намысышты, вырсымашты дӓ хвальымашты. Мӓмнӓм алталышеш шотлат, но мӓ тӧр эдем ылына, 9пӓлӹдӹмеш шотлат, но мӓмнӓм пӓлӓт, колышеш шотлат, но мӓ теве ӹленӓ. Мӓмнӓм ясыландарат, но мӓ ана колы. 10Мӓмнӓм ойхырыктат, а мӓ со ӹвӹртӹшӹ ылына, мӓ незер ылына, но шукым пайдаренӓ, мӓмнӓн ниманаат уке, но цилӓок мӓмнӓн.
11Коринфӹштӹ ӹлӹшӹвлӓ, мӓ тӓлӓндӓ цилӓ гишӓнок нимат шӹлтӹде попенӓ, мӓмнӓн шӱмнӓ тӓлӓндӓ кымдан пачмы. 12Тӓлӓндӓ мӓмнӓн шӱмӹштӹнӓ тор агыл, но ӹшкӹмдӓн шӱмӹштӹдӓ тор. 13Ӹшкӹмемӹн тетявлӓэмлӓн попымы семӹнь келесем: тенгеок мӓлӓннӓ пӧртӹлтӹдӓ, тӓӓт шӱмдӓм кымдан пачда.
14Ӹнянӹдӹмӹвлӓ доно иквӓреш йӓл хамытыш идӓ кӹцкӓлт. Тӧр ӹштӹмӹн дӓ законым пыдыртымашын ма иканьышты улы? Соты дон пӹцкемӹш лошты махань кӹл улы? 15Христос дон Велиар#6:15 Велиар: худам, ярдымым, сатанам анжыктышы лӹм. кыце икышын лит? Ӓль ӹнянӹшӹ дон ӹнянӹдӹмӹ ик векӹ лин кердӹт ма? 16Йымын пӧртшӹ кыце идолвлӓ доно ик вӓрӹштӹ лиэш? Тӓ ӹлӹшӹ Йымын пӧртшӹ ылыда. Йымы тенге келесен:
«Мӹнь нӹнӹ доны ӹлӓш
дӓ лоштышты кашташ тӹнгӓлӓм.
Нӹнӹн Йымышты лиӓм,
а нӹнӹ Мӹньӹн халыкем лит».#6:16 Лев 26:12, Иез 37:27.
17Седӹндон
«Нӹнӹ логӹц лӓкдӓ,
нӹнӹ гӹц айырлыда, – Господь попа. –
Ире агыл докы идӓ тӹкнӹ, тӹнӓм тӓмдӓм Ӹшке докем нӓлӓм».#6:17 Ис 52:11.
18«Тӓлӓндӓ Ӓтя лиӓм,
а тӓ Мӹньӹн эргем дон ӹдӹрвлӓэм лидӓ», –
манеш Цилӓ Кычышы Господь.#6:18 2 Цар 7:14, Ис 43:6, Иер 31:9.
Currently Selected:
2 Кор 6: УС
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Библим сӓрӹшӹ институт, Хельсинки 2014