1 Nje gə Kɔrɛnt 6
6
Mat 5.38-41
1Dəw kara horo-si gə, logə ɓo tar to horo ꞌje gə ngon ko̰-e gə nama nje ɗa ne dɔ buguruje ɓa aw səg-e no-je gə, ɓo no njerɔsangəje gə ang wa? 2Njerɔsangəje ja ɓa d-a gangə tar dɔ dəwje gə dɔ nangə nee le, ꞌgərə-je ang wa? Ngaa ɓo sisəy ja a gangəje tar dɔ dəwje gə dɔ nangə nee nama mba ɗi ɓa asəje mba gɔl-je ngan tarje gə njɛ̰-njɛ̰ gə to horo-sisəy gə ang wa? 3Anjije kara j-a gangə tar dɔ-je gə le, ꞌgərəje ang baa wa? Ngaa ɓədə ɓa tarje gə ɓogəne wa? 4Ngaa tar to horo-si gə ɓogəne nama, dəwje gə Mbo̰ naa lə njetakagəje oje gə ne ang ɓa undaje-je gə nje gangə tarje. 5M-pa m-ar to rɔ kul lə-sisəy. Be ɓa horo-si gə le, dəw gə nje kəm karə kara gə asə gangə tar horo ngan ko̰ naaje gə ja godo wa? 6Ngaa ngan ko̰ naaje ja d-aw səgə naa, ngaɓa no nje gə ꞌta kagə Kirisi ang gə səmə! 7Be ɓa, kar tar to horo-sisəy gə ja le, to ne gə kṵra̰y ɗɔdə ngaa kən. Mba ɗi ja oreje ur-si ndəng dɔ ne gə dɔ buguru gə ꞌɗa gə si ang wa? Mba ɗi ɓa ɓo dəw ɓogo si nama ḭya̰je ar-ɛje ang wa? 8Ngaa to gə sisəy ja cibi ꞌɗaje ne dɔ buguru ngaɓa ꞌɓogo nje gə kɛm, ngaɓa ꞌto ngan ko̰-si ja cibi. 9ꞌGərəje ang baa wa? Nje ɗa ne dɔ buguruje le d-a kuwa ɓeko̰ lə Luba gə nenduba ang.
Ərəje rɔ-si dɔ-ɛ gə ang: njekayaje nəm, nje polo magəje nəm, nje ɓogo lo toje nəm, njetəl rɔ-je gə jeneje nəm, jingawje gə njeto gə naaje nəm, 10nje ɓogoje nəm, nje gə ɓo neje uwa-je ɓərə gə nəm, mbə kodoje nəm, njetaji kilje ose njekunda bagəraje, ꞌjejee tɔ̰y nee le, d-a kuwa ɓeko̰ lə Luba gə nenduba ndɔ kara ang. 11Ngaɓa ye ja, to neje gə nje gə kɛm horo-si gə, ꞌɗa kede ja tɔ. Ngaa ꞌtogo-si, ngaa d-unda si gə losang-ɛ, ngaa ꞌturu-si gə dəwje gə gadə-gadə gə ri Mbayɓe Jeju Kirisi ngaɓa gə ɗəw Njil Luba gə lə-sijee nəm tɔ.
12Ɗəw to kar m-ɗa neje tɔ̰y ja, ngaa ne tɔ̰y may ang baa; ɗəw to kar m-ɗa ne tɔ̰y ja ngaa ꞌma m-a kḭya̰ ɗəw kar ne kara kara uwa-m ɓərə gə ang. 13Nekusa to mba mə dəw, to to gə mə dəw kara to mba nekusa tɔ; ngaa Luba a tuji-je joo kɛm. Ngaa darɔ dəw to kar kun ɗa ne kaya ang; darɔ to kar Mbayɓe, to to gə Mbayɓe kara to kar darɔ tɔ. 14Be ɓa Luba gə nje kar Mbayɓe uy ɓa ndol le, a kar-sijee j-a kuy mba ndol gə singamongə lə-a tɔ. 15ꞌGərəje to gə darɔ-sisəy le to bar kəm rɔ Kirisi ang wa? Ɗaa m-a kun bar kəm rɔ Kirisi mba təl ɗ-ɛ gə bar kəm rɔ kaya jene wa? Ndɔ kara ang. 16ꞌGərəje ang wa? Dəw gə um naa gə gə kaya jene le ꞌtəl ꞌtoje gə darɔ gə kara. Mba, ꞌpa na: ꞌJejee joo kɛm d-a to darɔ gə kara baa. 17Ngaa dəw gə um naa gə gə Mbayɓe nama njil-e kara um sə-a naa gə kara baa tɔ. 18A̰yje kaya gə ka̰y. Neɗa gə kṵra̰y gə ɗa-ɗa gə dəw ɗa le, ɗa darɔ-ɛ gə ɗaga nee baa, ngaa dəw gə un rɔ-ɛ ɗa ne kaya nama ɗa kṵra̰y gə darɔ-ɛ ye ja. 19ꞌGərəje ne gə nee ang wa? Darɔ-sisəy le to kəy lə Njil Njerɔsangə gə Luba ja ar-ɛ isi mə-si gə; ɗaa darɔ-sisəy le to kar-si ang. 20Mba ꞌndogo-si gə ne ndogo gə gad-e al dɔ lo. Ɗaa may kar unje darɔ-si ulaje ne rɔnduba dɔ Luba gə.
Oyo Eponami Sikoyo:
1 Nje gə Kɔrɛnt 6: lap
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2020, ATALTRAB. All rights reserved