22 أيث-كورينث 7
7
1إِذن آي يمْعِيزّن ينُو، وَامِي ذَانغ يعَاهذ أَربِّـي خ ثْمسْڒَايِين-أَ لَابُد أَ نسِّيصْفَا يخف نّغ زِي مَارَّا مِين ذَانغ يسخْنِيزن ذِي دَّات ذ اَرُّوْح حمَا أَ نِيڒِي ذ صَّالِحِين بْڒَا اَخطِّي س ثِيݣّْوْذِي ن أَربِّـي.
أَرَّسُوْل بُلُوس ثسْفَرّح-يث جْمَاعث ن ڒْمُوْمِنِين ن أَيث-كُوْرِينْث
2اَرزْمم-اَنغ كنِّيو يمُوْشَانْ ذݣ وُوْڒَاون نْوم. ؤُڒَا ذ يجّن وَار ث نضْڒِيم شَا، وَار ث نسْعوّج شَا، وَار ث نْغشّ شَا. 3وَار قَّارغ شَا مَانَايَا بَاش اَكنِّيو عيّْبغ لَّا. ڒَاحقَّاش نِّيغ-اَوم قْبڒ قَا كنِّيو ذݣ وُوْڒَاون نّغ، أَ نمّث نِغ أَ ندَّر اَكِذْوم. 4نش تݣّغ اَكِذْوم زْعَامث اَطَّاس، لْإِفْتِخَر إِي غَارِي ذَايْوم يمْغَر. تْوَاشجّْعغ اَطَّاس، ڒفْرَاحث ينُو تمْفيَّاض-د خ مَارَّا ڒمْحَاين نّغ.
5شُوْف، نشِّين وَامِي د نُوْذف غَار لْإِقْلِيم ن مَاسِدُوْنْيَا دَّات نّغ وَار ثْرِيّح شَا، نتْوَازيَّار زِي مْكُڒ جِّهث اَمنْغِي غَار بَارَّا ذ ثِيݣّْوْذِي غَار ذَاخڒ. 6وَلَكِن أَربِّـي، يعْنِى ونِّي يتْعَاوَانن يِنِّي يتْخيَّاقن يعَاون-اَنغ س ومَاثْنغ تِيتُوْس وَامِي د يُوْسَا. 7أُو مَاشِي غِير وَامِي د يُوْسَا تِيتُوْس، يعَاون-اَنغ أَربِّـي عَاوذ وَامِي تُوْغَا ذَايس تْهِلَّام. ئِخْبَر-اَنغ تِيتُوْس قَا ثْوحّْشم-اَيِي، قَا ثْندْمم ثْرزُّوْم خَافِي اَطَّاس. أَمنِّي ڒفْرَاحث ينُو ثرْنِي كْتَار.
8إِيوَا وَامِي كنِّيو سْخيّْقغ س ثبْرَات نِّي ينُو نّغْنِي، ذ اَمزْوَارُو تُوْغَا ندْمغ ڒخُّو وَار نْدِيمغ شَا. يعْنِى ندْمغ وَامِي ࢲْرِيغ ثَبْرَات نِّي ينُو ثسْخيّق-يكنِّيو ذݣ يِجّن ن ڒْوقْث وَلَكِن ثعْذُو ذغْيَا. 9ڒخُّو نش فَرّْحغ. مَاشِي وَامِي ثْخيّْقم؛ لَّا، وَامِي ثْخيّْقم بَاش اَذ تْتُوْبم. ثْخيّْقم يعْنِي يجّن ن وخِيّق زِي أَربِّـي، أَمنِّي وَار كنِّيو ثڒْقِيف ؤُڒَا ذ يجّن ن ثْخسَّارْث زَّايْنغ. 10شُوْف، أَخِيّق زِي أَربِّـي يتَارو-د تُّوْبَا، تُّوْبَا-يَا ثْندّه-يكنِّيو اَذ تْنجْمم وَار تجِّي بُو نْدَامث. أَخِيّق زِي دُّنشْت-أَ لَّا، يتَارو-د ڒْموْث. 11فكَّارث كنِّيو ذِي مِين ذَايْوم د يتَارو وخِيّق-أَ زِي أَربِّـي. يعْنِي مشْحَاڒ تْحَوَاڒم س وُوْڒ ثْرزُّوْم اَذ تْحلّم مَانَايَا ذغْيَا. يعْنِي مشْحَاڒ ثْندْمم مشْحَاڒ ثنْخڒْعم، ذَايْوم يجّن ن مزْڒِي ذ ثِيݣّْوْذِي. يعْنِي مشْحَاڒ ثسْوجْذم اَذ تْحكْمم نِيشَان. مِين مَا يدْجَان ذِي ثْمسْڒَايْث-أَ كنِّيو وَار ذَايْوم بُو ڒْعِيب. 12نش ؤُرِيغ-اَوم-د ثَبْرَات نِّي، مَايمِّي؟ مَا عْلَاحْسَاب ونِّي يضڒْمن نِغ ذ ونِّي يتْوَاضڒْمن؟ لَّا، ؤُرِيغ-اَوم-ت-يد بَاش اَكنِّيو سْفهْمغ زَّاث إِ أَربِّـي مشْحَاڒ إِي ذَانغ تݣّم اَرَّاي س وُوْڒ. 13س مَارَّا مَانَايَا نتْوَاعَاون.
مَاشِي نتْوَاعَاون نشِّين أُو صَافِي؛ لَّا، عَاوذ نْفَرح اَطَّاس وَامِي نࢲْرَا مشْحَاڒ يفَرح تِيتُوْس أَرُّوْح نّس ثسْريّْحم-ث كنِّيو مَارَّا. 14وَامِي زَّايْوم فْتَخَرغ غَار تِيْتُوْس وَار يدْجِي مَايمِّي غَا سذْحِيغ ڒخُّو. ڒَاحقَّاش مَامّش نسِّيوڒ اَكِذْوم نِيشَان ذِي مَارَّا، ؤُڒَا ذ لْإِفْتِخَر نّغ خَاوم غَار تِيتُوْس قَا يفّغ-د نِيشَان. 15نتَّا اَقَا ثقِّيمم-اَس ذݣ وُوْڒ أُو كْتَار عَاذ خْمِي يتْفكَّار ذِي اَرَّاي إِي ذَاس ثݣِّيم، يعْنِي ثْقبْڒم-ث س يِجّن ن ثِيݣّْوْذِي ترْجِيجِيم. 16فَرّْحغ وَامِي زمَّرغ اَخَاوم تْعوَّاڒغ ذِي مِين ذِي مَا.
Currently Selected:
22 أيث-كورينث 7: ريف
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo