काम 5
5
हनन्या अर सफिरा
1बठै एक मिनख हो जिको नाम हनन्या हो अर बिकी लूगाई सफिरा नाम की ही बे दोन्यु मिलर आपकी जमीन को एक टुकड़ो बेच्यो। 2जणा बे दोन्यु जणा मिलर बि जमीन का रिपीआ मऊँ क्युंक थोड़ा घणा रिपीआ आपकै कनै राखलिआ अर बाकी का लेज्यार भेजेड़ा चेला क आगै कर दिआ। 3जणा पतरस बिऊँ बोल्यो, “हनन्या तेरा मन प सेतान कंय्यां कबजो कर लिओ क तू जमीन क बिकबाऊँ मिल्या पिसा म सक्यु राख'र पबितर आत्माऊँ झूठ बोलगो। 4बेचबाऊँ पेली इ जमीन प तेरोई हक हो अर बिकबा क पाछै बी बिका दाम तेराई हा। जणा पाछै तू तेरा मन म आ बात क्याले घड़ीं? अंय्यां कर तू मिनखाऊँ नइ पण परमेसरऊँ झूठ बोल्यो ह।” 5आ सुणताई हनन्या पड़गो अर पड़ताई पिराण तज दिआ। अर जत्ता बी आ सुणी अर देखी बा सगळा म डर बड़गो। 6अर क्युंक जवान मोट्यार आगै आर बिकी लासनै कफन म लपेटी अर बारनै लेज्यार बिनै गाड दिओ। 7करीब तीनेक घंटा पाछै बिकाळी लूगाई बी बठै आई अर जोक्यु बठै होयो बा बाता को बिनै कोनी बेरो हो। 8जणा पतरस बिनै बुज्यो, “तू बता थे बा जमीन अत्ता मई बेची ही के?” बा बोली, “हाँ, अत्ता मई बेची ही।” 9जणा पतरस बिऊँ बोल्यो, “थे दोन्यु परबु की पबितर आत्मानै बिचासबा ताँई क्याले सोची? इब देख तेरा मोट्यारनै गाडबाळा बारना मई खड़्या हीं अर बे तनै बी लेज्यासी।” 10जणा बा जदकी जद बिका पगा म पड़गी अर पड़ताई मरगी। जवान मोट्यार मांयनै आया जणा बा बानै मरेड़ी लाधी। जणा बे बिनै उठार बिका मोट्यार क कनैई बिनै बी गाड दिओ। 11सगळी बिस्वासी मंडळी अर जत्ता बी इ बातनै सुणबाळा हा, बा सगळा म इ बात को डर बड़गो।
चमत्कार अर अचरजभर्या काम
12भेजेड़ा चेला क हाता बोळी सेलाणी अर चमत्कार मिनखा म होर्या हा अर बे एक चित होर सुलेमान का बरिंडा म भेळा होता हा। 13बाकै सागै होबा की हिमत कोई मई कोनी ही पण इकै बावजुद बी लोग बाकी बडाई करता। 14अर बठिनै परबु प बिस्वास करबाळा लूगाई अर मिनख रोजकी बाकी टोळी म मिलता जार्या हा। 15भेजेड़ा चेला जोक्यु कर्या हा बिको नतिजो ओ होयो क लोग रोगलानै सड़का प खाट अर बिछावणा बिछार बापै सुवा देता क्युं क जद पतरस बठिकी जावै जणा बिकी छाया बापै पड़ सकै। 16यरूसलेम क आस-पास की नगर्याऊँ बी रोगला अर सूगली ओपरी बलाय रळेड़ा मिनखानै लेर आबा लाग्या। अर बे सगळा निरोगा होता हा।
भेजेड़ा चेला को पकड़्यो जाबो
17जणा म्हायाजक अर बाकै सागै का सदुकी पंथहाळा मिनख भेजेड़ा चेला प जळबा लागगा। जिकै चलतै बे बाकै खिलाप क्युं कारवाई करबा की सोची। 18अर बे बा भेजेड़ा चेलानै पकड़र कोठड़ी म बंद करवा दिआ। 19पण जंय्यांई रात होई जणा ईस्बर नगरी दुत आर बि कोठड़ी का कुआड़ानै खोल दिओ अर बा भेजेड़ा चेलानै बारनै लेज्यार बाऊँ बोल्यो, 20“मनदर म जार खड़्या होवो अर इ नया जीवन की सगळी बाता मिनखानै सुणाओ।” 21जणा बे बिकी बात मानर भागपाट्याई मनदर म जा लिआ अर बठै सीख देबा लागगा। बठिनै म्हायाजक अर बिकाळा साती, इजरायल म रेह्बाळा सगळा बूडा-ठेरा की पंचायत बुलार बानै भेळा कर्या अर कोठड़ी म खुवा भेज्यो क बानै पंचायत क सामै हाजिर करो। 22जणा सिपाईड़ा बानै ल्याबा ताँई कोठड़ी म गया। पण बे बानै बठै कोनी लाध्या, जणा सिपाईड़ा ओटा आर इ बात की खबर पंचायतनै दि। 23अर कह्या, “म्हें कोठड़ी का बारना म पुग्याक जणा म्हानै बारना प कसर ताळो लागेड़ो लाध्यो अर पेरेदार बी पेरो देताई लाध्या पण जंय्यांई म्हें ताळो खोलर मांयनै बड़्याक जणा म्हानै बठै कोई कोनी लाध्यो।” 24मनदर की रूखाळी करबाळा अर परधान याजक आ बात सुणर चकर म पड़ग्या क आखीरक बाकै सागै होयो तो होयो काँई? 25अत्ता मई कोई आर बानै बतायो, “थे जानै कोठड़ी म बंद कर्या हा बे तो मनदर म मिनखानै सीख देर्या हीं।” 26जणा मनदर की रूखाळी करबाळा सिपाईड़ा को सरदार आपहाळी सेना का क्युंक सिपाईड़ा क सागै गयो अर भेजेड़ा चेलानै बठैऊँ प्यारऊँ लिआयो। क्युं क बे मिनखाऊँ डरता हा इ ताँई बठै जोर-जबरदस्ती तो चाल कोनी सकै ही क कदै बे भाठा नइ बगाबा लागज्या। 27बे बानै ल्यार बडी पंचायत क सामै हाजिर कर दिआ, जणा म्हायाजक बाऊँ बोल्या, 28#मत्त 27:25“म्हें थानै ठोक बजार आदेस दिन्यो हो क, बि मिनख का नाम की सीख मना दिज्यो, पण थारै काना प तो जुंई कोनी रिंगी। अर थे सगळा यरूसलेमनै बिकी सीखऊँ भर दिओ, थे काँई चाओ हो? बिको लोय म्हारै माथा मंढबो चाओ हो के?” 29जणा पतरस अर दुसरा भेजेड़ा चेला बोल्या, “मिनखऊँ पेली परमेसर की बातनै मानबो जरूरी ह। 30म्हारा बाप-दादा को परमेसर थारै हाता सुळी प चढार मार्या गया ईसुनै मोतऊँ ओज्यु जीवायो। 31अर परमेसर बिनैई आपका दाया हात कानि उचा पद प बिठार राजकुमार अर बचाबाळो बणायो ह। बो इजरायल का मिनखानै पापऊँ मन फेरबा को मोको अर पाप की माफी देसी। 32अर आ बाता का गुवा म्हें हा, बंय्यांई पबितर आत्मा बी गुवा ह जिनै परमेसर बिका मानबाळानै दि ह।” 33आ सुणर पंचायत का सदस्य लाल-ताता होर बानै मारबा की सोची। 34पण बामै गमलिएल नाम को एक फरिसी जखो यहूदि नेम-कायदा सीखाबाळो हो अर सगळा मिनख बिकी ईज्जत करता हा। बो पंचायत म खड़्यो होर बा चेलानै चिनेक देर बारनै लेज्याबा ताँई हुकम दिओ। 35जणा पाछै बो बोल्यो, “इजरायल का मिनखो, थे जखो आ मिनखा क सागै करबा जार्या हो बो सोच समजर करज्यो। 36थानै याद होवै तो क्युंक बरसा पेली थियूदास आ खेतो होयो चमक्यो क म बी क्युं हूँ अर करीब च्यार सो मिनख बिकै गेल होलिआ, पण बो मार्यो गयो अर जत्ता बिनै मानता हा बे सगळा खिंडगा अर बिको आनदोलन मिटगो। 37अर बंय्यांई नाम दरज कराबाळा दिना म गलिली यहूदा चमक्यो अर क्युंक मिनखानै बो बी आपकै गेल कर्यो पण बो बी मिटगो अर जत्ता बिनै मानता हा बे बी खिंडगा। 38जणा म खेऊँ हूँ इमै टांग मना अड़ाओ अर आ मिनखानै खुला छोड द्यो क्युं क ओ काम ज मिनख कानिऊँ ह जणा अ सगळा मतैई मिट ज्यासी। 39पण ज इमै परमेसर की मरजी ह जणा थे आनै कोनी रोक सकोगा। कदै अंय्यां नइ होज्या क थे परमेसरऊँ लड़बाळा बाज ज्याओ।” 40जणा बे बिकाळी बात मानर बानै बुलवाया अर बाकै तड़ा पड़वार आ खेर छोड दिआ, अर आदेस दिओ क, “आईंदा इ ईसु नामऊँ कोई बात मना करज्यो।” 41बे राजी-खुसी पंचायतऊँ चलेगा क्युं क ईसु नामऊँ परमेसर बानै पिड़ा अर बेजती भोगबा जोगा समज्या। 42बे रोजकी मनदर अर मिनखा क घरा म सीखाता अर चोखा समचार को परचार करता कोनी थक्या क ईसुई मसी ह।
Currently Selected:
काम 5: एस डब्लु वी
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
(c) 2010-2017, New Life Computer Institute. All rights reserved