काम 23
23
1पोलुस म्हापंचायत क कानि एक टक देखर बोल्यो, “इजरायल का यहूदि भाईड़ो, म हाल ताँई परमेसर क सामै ईमानदारी क सागै साप मनऊँ जियो हूँ।” 2पण म्हायाजक हनन्या पोलुस क सारै खड़्या मिनखनै ओडायो “इकै होठा प मार।” 3#मत्त 23:27,28आ बात सुणर पोलुस बिनै बोल्यो, “ओ कपटी तू तो चुनाऊँ लिपेड़ी भीत ह, परमेसर तनै मारसी। तू मूसा का नेम-कायदा गेल मेरो न्याय करबा अठै बेठ्यो ह, पण तूई नेम-कायदा क खिलाप मनै मारबा ताँई ओडावै ह।” 4जणा कनै खड़्या मिनख पोलुसऊँ बोल्या, “तेरी अत्ती हिमत क तू परमेसर का म्हायाजकनै बुरो-भलो खेवै।” 5जणा पोलुस बोल्यो, “यहूदि भाईड़ो, मनै कोनी बेरो हो की ओ म्हायाजक ह; क्युं क पबितर सास्तर म मंडेड़ो ह की तू मिनखा का परधाननै बुरो मना खेजे।” 6#काम 26:5; फलि 3:5जणा पोलुस आ जा'णर क अठै एक टोळी सदुकीया की अर दुसरी फरिसीया की ह जणा बो पंचायत म जोरऊँ बोल्यो, “ओ यहूदि भाईड़ो, म फरिसी हूँ अर फरिसीया की ओलाद हूँ, अर मरबा क पाछै ओज्यु जी उठबा की मेरी आस की बातनै लेर मेर प मुकदमो चालर्यो ह।” 7पोलुस क अ बाता खेताई फरिसी अर सदुकीया म खिचा-ताणी होबा लागगी अर पंचायत म फूट पड़गी। 8#मत्त 22:23; मर 12:18; लूक 20:27क्युं क सदुकी मानी ही की नइ तो मरबा क पाछै कोई जी उठै, नइ कोई ईस्बर नगरी दुत ह, अर नइ आत्मा ह; पण फरिसी आ बाता म बिस्वास करीं हीं। 9अंय्यां चोखी खिचा-ताणी होगी। अर फरिसीया की टोळी मऊँ क्युंक सास्तरी खड़्या होर जोर-जोरऊँ खेबा लाग्या क, “म्हें इ मिनख म सजा देबा जोगो कोई दोस कोनी देखां, हो सकै क बिऊँ कोई आत्मा नहिस कोई ईस्बर नगरी दुत बोल्यो होसी, जणा इमै काँई बात होगी?” 10अर जद बाकी राड़ घणी बढगी जणा इ डरऊँ क बे कदै पोलुस का टुकड़ा-टुकड़ा नइ कर दिं, पलटण को सरदार आपकी पलटण का क्युं क सिपाईड़ानै ओडायो क, “जाओ अर जोरामादी बिनै बामैऊँ काड ल्याओ अर सेनाहाळा गड म लेज्याओ।”
11बि रात परबु बिनै दरसाव देर बोल्यो, “हिमत बांद अर जंय्यां तू मेरै बारां म अठै गुवाई दि ह, ठिक बंय्यांई तनै रोम म बी देणी पड़सी।”
पोलुसनै मारबा की जाळसाजी
12सुआरै क्युंक यहूदि पोलुसनै मारबा को जाळ बिछायो अर सोगन खाई क बिनै मार्या पेली म्हें क्युंई कोनी खावां पिवां 13अर जखा ओ जाळ बिछायो हो बे चाळिसऊँ बी बेसी हा। 14बे, बा परधान याजका अर यहूदि नेता क कनै जार बोल्या, “म्हें सोगन खाई ह क पोलुसनै मार्या पेली जीब प क्युंई कोनी धरां। 15जणा इब थे अर म्हापंचायत का सगळा जणा पलटण का सरदार क कनै जार ओ भानो लेल्यो क थे बिका मुकदमा क बारां म ठिक-ठिक जाच करबो चाओ हो, बिनै थारै कनै ल्याबा की बोलो, अर म्हें बिनै थारै कनै पुगबाऊँ पेलीई मार देस्यां।”
16आ बात पोलुस को भाण्जो सुणली क बे बिनै मारबा क चकरां म ह, जणा बो गड म जार आ बात पोलुसनै बता दि। 17जणा पोलुस एक सुबेदारनै बुलार बिऊँ बोल्यो, “इ मोट्यारनै पलटण का सरदार क कनै लेज्याओ, ओ बिऊँ क्युं बोलबो चावै।” 18जणा बो बिनै पलटण का सरदार क कनै लेज्यार बोल्यो, “केदि पोलुस मनै बुलार मेरूँ अंय्यां बोल्यो ह की ओ मोट्यार पलटण का सरदारऊँ क्युं बोलबो चावै ह, तू इनै बिकन लेज्या।”
19जणा पलटण को सरदार बिको हात पकड़र बिनै कूणा म लेज्यार बिऊँ बुज्यो, “तू मेरूँ काँई खेबो चावै ह?” 20बो बिऊँ बोल्यो, “यहूदि आ साजिस करी, क थे पोलुसनै इ भानै पंचायत म लेर आओ अर अंय्यां मानो जंय्यां क बे बिकी ओर चोखी ढाळ जाच करबो चावीं हीं। 21पण थे बाकी मना मानज्यो, क्युं क बामैऊँ चाळिसऊँ बेसी मिनख बिकी घात म बेठ्या हीं, जखा आ सोगन खाराखी ह क, जद ताँई बे पोलुसनै नइ मार गेरीं जणा ताँई क्युंई कोनी खावीं पीवीं। अर बे इब त्यार हीं अर तेरी हामळनै उडिकीं हीं।” 22जणा पलटण को सरदार ओ आदेस देर मोट्यारनै बिदा कर्यो, “आ कोईनैई मना खिजे क तू मनै अ बाता बताई ह।”
फेलिक्स क सामै पोलुस की पेसी
23जणा पलटण को सरदार दो सुबेदारानै बुलार बोल्यो, “रात क नो बजे कैसरिया जाबा ताँई दो सो सिपाईड़ा, सत्तर घुड़सवार अर दो सो भाला बगाबाळानै त्यार राखो। 24अर पोलुस ताँई बी घोड़ा त्यार राखो, जिऊँ बिनै राजपाल फेलिक्स क कनै राजी-खुसी पुगा सको।” 25बो बाकै हात कागद भेज्यो जिमै अंय्यां मंडर्यो हो क,
26“म्हराज राजपाल फेलिक्सनै कलोदियुस लूसियस को नमस्कार। 27इ मिनखनै यहूदि पकड़र मारबो चावै हा, पण जद मनै इको बेरो पड़्यो की ओ रोमी ह। जणा सिपाईड़ा लेर इनै छुटा ल्यायो। 28म आ जाणबो चाओ हो क बे इपै काँई दोस लगावीं हीं, जि बजेऊँ म इनै यहूदि म्हापंचायत लेगो। 29जणा म समजगो की बे आपका धरम का नेम-कायदा क बारां म इपै दोस लगार्या हीं, पण इमै मार देबा अर इनै केद करबा जोगो इमै कोई दोस कोनी ह। 30अर जद मनै ओ बेरो पड़्यो की बे इ मिनखनै मारबा क चकरां म हीं, जणा म तावळोसो इनै तेरै कनै भेज दिओ। अर इपै मुकदमो चलाबाळानै बी आदेस दिओ की तेरै सामै जार इपै मुकदमो बाजी करै।”
31जणा पाछै सिपाईड़ा ओडाया गेल बिनै रात्यु-रात अन्तिपतरिस नगरी म ल्याया। 32अर दुसरा दिन पैदल चालबाळा सिपाईड़ा पोलुसनै घुड़सवारा क सागै छोडर पाछा सेनाहाळा गड म आग्या। 33अर जद बे कैसरिया पुग्याक जणा बे पोलुसनै तो बि राजपाल क सामै खड़्यो कर्यो अर पलटण क सरदार क हातऊँ मंडेड़ो कागद बिनै दिओ। 34बो कागद बाचर बो पोलुसनै बुज्यो, “तू कूणसा इलाका को ह?” अर जद बिनै ओ बेरो पड़गो क कलिकीया को ह 35जणा बो बिऊँ बोल्यो, “जद तेरै प मुकदमाबाजी करबाळा आसी जणा तेरा मुकदमा की सुणाई होसी।” अर बे बिनै हेरोद का गड म निगरानी म राखबा ताँई ओडायो।
Currently Selected:
काम 23: एस डब्लु वी
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
(c) 2010-2017, New Life Computer Institute. All rights reserved