Chivumbuzi 10
10
Mungelo ndi kabuku kamana
1Ndipo ndinguwona mungelo munyake wanthazi wasikanga kuchanya, wakuvwara mtambo, ndi chiŵingavuwa pa mutu pake; ndipo chisku chake chenga uli ndi dazi, marundi ghake nge ndi mizati ya moto. 2Ndipo wenga ndi kabuku kakubanuka mu janja lake. Rundi lake lamarghe wangukanda pa nyanja, ndi lamaze wangukanda pa mtunda; 3ndipo wangukambura ndi mazu ghakuru, uli ndimo nkharamu yibanguriya: ndipo wachikambura, vidiririzi vinkhonde ndi viŵi vingudiririska mazu ghawo. 4Po vidiririzi vyo vinkhonde ndi viŵi vingugunda ndatinge ndilembenge; kweni ndinguvwa mazu ghakutuwa kuchanya, ghakuti, “Zighiriyapo. Vidiririzi vyo vinkhonde ndi viŵi vyakamba ungavilembanga cha.” 5Ndipo mungelo yo ndinguwona kuma pa nyanja ndi pa mtunda, wangusoske kuchanya janja lake lamarghe, 6ndipo wangurapiya paku mweniyo ngwamoyo ku muyaya ndimuyaya, mweniyo wangulenga kuchanya ndi vya kweniko, charu ndi vya mwenimo, ndi nyanja ndi vya mwake, kuti yireke kuŵapo nyengo yakuswera so cha, 7kweni kuti mu mazuŵa gha mazu gha mungelo wachinkhonde ndi chiŵi yo, penipo wamkumba mbata, po ndipo ghakafiskikanga mangari ghaku Chiuta, uli ndimo wanguŵanduliya umampha ŵaŵanda ŵake ŵamchimiwo.
8Ndipo mazu gho ndinguvwa ghakutuwa kuchanya, ghangukamba so nane, ghanguti, “Kanga, karonde kabuku ko kakubanuka kamu janja la mungelo mweniyo watuma pa nyanja ndi pa mtunda.” 9Ndipo ndinguya ku mungelo yo, ndingunena nayo, kuti wandipaske kabuku ko. Ndipo wali kwaku ine, “Karonde ndipo ukarghe; kaŵaŵiskenge mumoyo mwako, kweni mu mlomo wako kaŵenge kakusamuka ulaka mbuchi.” 10Ndinguronda kabuku ku janja la mungelo yo, ndingukaswita; ndipo mu mlomo wangu kenga kakusamuka nge mbuchi; kweni ndati ndakaswita, mumoyo mwangu munguŵaŵa. 11Ndipo wangunena nane, “Kutenere iwe kuchimiya vyapa makamu ndi mitundu ndi marongororedu ndi ŵakaronga.”
Oyo Eponami Sikoyo:
Chivumbuzi 10: TongaMw
Tya elembo
Kopya
Kokisana
Kabola
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bible Society of Malawi