2 Bụo ạKorint 12
12
Ịdi ạPol ạmiin uḍien rꞌịdi ogananami oḍeenaan nyọdi
1Ghạlamo ịdipho iituma phọ sụo ị́moogh bọ ni, mị kaatuma ni. Kụ nyịidipho mị kạkaaph ịlo ịmiin dị Ọmoogh-we phọ aḍighi kụ mị ạmiin, ḅịle rꞌịdi ọdi agananami uḍeenaan ịmi. 2Mị alegheri ni oniin ọnyo aKraist dị osiph ogheelom ookpe kꞌạke dị amuneniom ịraar, esi aḍioph rꞌinya ạsia dị meten. Mọ ịsien eye phọ, ḅịle mọ ẹmugh aloor, mị úlegheri, Ẹnaan kụ ilegheri. 3Mị ạḅile ni rạḅem mọ usiph ni oye phọ ọphon ogheelom ooḅi ọmar phọ — mọ ịsien eye phọ, ḅịle mọ ẹmugh aloor, mị úlegheri, Ẹnaan kụ ilegheri. 4Kụ ẹpe phọ ọdi ạnaghan ni rạraar dị ịlo ọghaaph úlegheri, rạraar dị anem oye kétue ẹkaaph. 5Ọdo phọ oye phọ ọphon kụ ẹdi mị kaatumaam bọ. Mị káatumaam loor ạmi, emuton rạraar phọ ịpe eḍeenaan bọ ḍidugh phọ ạmi. 6Mọ mị ụwa ni ootuma, ọbo ịyaar ọnughiom ạmi ẹka mị́tol, ịdi eḍighi bọ mị mụkaaph ghan ni ịdi eru ịne. Kụ mị káatuma, ịdi eḍighi bọ mị rạ́wa mọ oye ụlogh ịmi edoghola dị epelom ẹlo ịpe ọdi ạmiin bọ dị mị aḍighi, ạḅile ạnaghan dị mị ạghaaph.
7Ụtuan ni omirighan mọ mị kabagaam ghan bọ iituma phọ, ụngo ịmi eephina dị ephin ni iboom mụdi ooḅurom kụ ugim ịmi. Ephinom mọ ịghigh eeroma dị aSetan ụgiphoghom ghan ịmi, ḅịle rꞌomirighan mọ mị kúutuma. 8Ịraar ọdo amem mị ụuḅereghi ghan ni Ọmoogh-we phọ mọ ọdi amuton eephina phọ ẹphen loor ạmi ạsighe. 9Ọdi ạpagharanaan ni ạkpaariom mọ, “Ẹnon ịyaar dị nạ kạwa ílho, emuton ọnma ighirigiir phọ ạmi. Ịikpo phọ ạmi relom ghan mem lọ nạ adugh.” Esi ịduon phọ kịḅeeraan ghụn ịmi olegheri ghan oboom rꞌootumaam ghan ạraraar phọ reḍeenaan ghan bọ ḍidugh phọ ạmi, ọbo ịikpo phọ aKraist kụ ighoph ịmi. 10Loor ịphen phọ, mị ạtuan ni ẹmhu phọ aKraist rạmiloghom ghan ḍidugh, roofola, ịminimiin, ịgbiphoghom, ḅịle rꞌịiḅaghami. Mị adugh ghụn, pụruku molhome ịikpo phọ ạmi.
Ịdi ạbuo ạsiosi phọ aKraist ọkan ologhi ạPol
11Mị raḅo ni arolologhi, kụ nyina kụ iḍighi ni ịyaar phọ mị raḅo bọ ịduon phọ. Isiom ghụn inyina kụ oghol ghan ạmi ḍiiḅi aḍien. Ghạlamo mị ụ́man ni ịyaar, bịn rꞌẹnum mị úsoorom ni upu butelhedom mọ ạbuphe nyina reephughemi ghan bọ. 12Areelegh ogey otelhedom ịrolom ni sịphe ọkparam mọ mị ạrolom ghan bọ ogbo phọ anyina aḍighi yogh iiḍighi aruugu rꞌareḍeenaan rꞌịiḍaany phọ. 13Uḍighi inyina eeghe dị eeph bọ epu ịlo ịpheri phọ ạsiosi phọ, emuton ịdipho mị inyina dool ikpoki phọ ị́leti bọ? Ịphen phọ eḍighi ọpioman, pọ ịsar ịwilenaan ịmi!
14Ọloghom rꞌegi phọ sịen ịraar ọdo amem mị mạnyaaghian bọ oru ọmiin anyina, kụ mị inyina dool ikpoki ríleti. Nyina kụ ịkan ologhi ạmi, kíkpoki anyina. Ọmaar ogbiighi, ịbam ạnmuny kụ rọ́ngo ghan bụrude rꞌaburunhiin ạbidi ịyaar ọrolom; ạburude rꞌaburunhiin phọ ghụn kụ rọwaanaan ghan ịlo ịbam ạnmuny phọ. 15Mị kạḅaal li ologhi aliom oomo ịlo mị ạmoogh ḅịle rꞌoomo ịnyaam mọ ạmi ạngo ruwaloor phọ anyina. Ẹphomoghian phọ mị ịphomoghian bọ inyina melhom ẹpughan redughe nyẹpe nyina ịphomoghian bọ ịmi ḍụghum?
16Nyina eloghoma ni mọ mị inyina dool ikpoki ị́leti, kụ nyina rẹḅem ghan mọ mị ọbelebele oye dị ạsighe ikeḍi isiphom inyina. 17Sịphe awe phọ mị iruom bọ inyina, oniin rꞌạmina uupuruan ni mọ ạar inyina ikpoki uruom ịmi ḍụghum? 18Mị ụuḅereghian ni Tạitos mọ aru. Mị ạḅile ạloghom ọphori phọ ọnyo asiya phọ mọ ạtuan aani nyọdi. Nyina kẹḅem ni mọ ạTaitos ạanyi inyina ikpoki aliom ḍụghum? Ọdi rꞌạmina ụ́ḅoph ịitughian rꞌeḍighinom ịyaar ḍụghum?
19Iini sịen kꞌaḍio phọ nyina regbiom ghan ologhi mọ yoor rọgba ghan ịlo ọphelaam ẹmhu. Eeye, iiḅi asiya, yoor rọkaaph ghan ịpe ẹḅeeraan bọ Kraist ghisigh Ẹnaan; ḅịle, tọrobo ịlo yoor oḍighi pọ ịlo ọoneghiom anyina ophophe. 20Ẹkigh mụdi mị aru asi ẹpe, nyina kẹgbatanaan ni ịpe mị agbiighi bọ, ḅịle mị kạgbatanaan ni ịpe nyina egbiighi bọ. Ẹkigh mụdi mị kạmiin ni ịruonu rꞌephogh-aḍien, ịghagh iloghi rꞌeeph ịkaraph, roofola rꞌịkalaghian, obaga rꞌịgbaragbara. 21Ẹkigh mụdi mị ạḅile aru Ẹnaan kisooromi ni ịmi ghisigh anyina, kụ mị amoghinaan ḍita phọ oḍighi yogh bọ ịkaraph phọ kụ kőkiton bọ esi ịkaraph ẹenir phọ rꞌole ẹmha phọ rꞌipesi phọ ạbidi.
Currently Selected:
2 Bụo ạKorint 12: ẠḌI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS