1 Bụo ạKorint 9
9
Iiḍighi rꞌaruunmo dị ẹkpianaan otelhedom
1Ịtooghi awe ị́pham ni ịmi ḍụghum? Mịna kótelhedom aKraist ḍụghum? Mịna kọ́miin ḍịen Jịzos Ọmoogh-we phọ ayira? Nyina ḍịen kụ kạ́suo ịpe mị akumuan bọ ạngo Ọmoogh-we phọ? 2Ghạlamo bụnon úmeeraam mọ mị otelhedom aKraist ni, ẹkpe ni dị nyina kemeeraam ịdi eḍighi bọ ạdol phọ anyina esi Ọmoogh-we phọ kụ elegh dị ọdaphari oḍeenaan mọ mị otelhedom aKraist ni.
3Mem lọ awe ụḍagha ịmi, ịphen kụ ịdi mị rạkaaph ghan ọphelaam ẹmhu ạmi. 4Mịna ụ́man ọtu ghan oḍighi phọ ạmina ọmoogh ịyaar olhe ḍụghum? 5Mịna ụ́man aani ophin oniin ọnyo asiya phọ kụ orelhiom ghan erelhe phọ ạmi, ịdipho ạbueri phọ abutelhedom mọ rꞌabumor Ọmoogh-we phọ ḅịle rꞌaPita ḍụghum? 6Ẹrol dị ẹgeom Bạnabas rꞌạmina mọ ọwa ghan kụ olhe ḍụghum? 7Ọnyo ẹgham ḍịen ikpoki rále ghan? Oḅephom ozo ireeny amiim ḍịen rạ́ku ghan iimuma phọ? Opoghom iyool-ịga ḍịen rạ́moophi ghan mạmaam ịga phọ?
8Ghạlamo ịduon mị ạsighe bọ ni ịdi remite ghan ḍio etum ḍio kụ rạmaaniom, bịn ẹḅophan ni rꞌịpe Ologh phọ ạḅem bọ. 9#Dut 25.4; 1 Tim 5.18Ọge ni sịphe Ologh phọ aMozis mọ, “Ọnhu ạnam dị rạponyon ịbiakpa ụ́kasaghi ghan!” Ẹnaan ịitughianam ghan ologhi sịnam bịn ḍụghum? 10Ọdi iyira ụ́ḅaram aani ḍụghum? Ịphen phọ ịkpulughiom aani ni iyira. Ẹkpe ni dị ọzuphom rꞌọponyonom mọ kọminogh ni ịghor mọ ạbuno kopin ni bin ịbiakpa phọ. 11#Rom 15.27Yoor mọzuph ịizupha aruwaloor sịphe iloghi phọ anyina. Ẹpughan ni dị yoor kole aani ịyaar anyina ḍụghum? 12Mọ ịkpe ni, ọbo ịlo ayoor kụ mipu ịlo ạbuphe rọwa ghan bọ ịphen phọ ḍịghaagh anyina.
Ịphen phọ yoor ụ́wa. Yoor odimom ghụn ọkpar aloor oomo amem ọbo ịyaar kesophom ghan bọ mọ awe ọnaghan ooḅi ọghaaph phọ aKraist. 13#Dut 18.1Tọ nyina elegheri ni mọ bụphe roḍighi ghan bọ oḍighi Otu Ịiḅereghi phọ rọmoogh ghan eḍien ạbidi sịphe, ḅịle mọ bụphe rọpinyon ghan bọ rịkia sịphe enmeny ịyaar aghuḍum mọ role aani ghan ni bin ạrikia phọ. 14#Mat 10.10; Luk 10.7Ịduon kẹn kụ ịdi Ọmoogh-we phọ ạto bọ mọ bụphe rọkaaph ghan bọ ooḅi ọghaaph phọ ọtuan ghan sịphe kụ ọmoogh aani ịyaar ole.
15Kụ rꞌiniin ịphen phọ dị mị mapuru ghan ílho. Ḅịle kẹn mị ụ́tuan opuruom anyina rạraar phọ ịphen kụ rạge bọ. Kpạripe ghụn mị amugh, dị oye kạ́kaaph ạpuenom ịyaar obomaam mọ ạmi. 16Mị kạ́tuan mọ mị rạkaaph ghan ooḅi ọghaaph phọ bịn abaga. Ịkpaariom ni ịmi. Mị úlegheri ịlo mịrolom ịmi mọ mị mụ́kaaph ghan bọ ooḅi ọghaaph phọ. 17Mị kụ ạwaanaan loor ạmi oḍighi phọ, ọbo mị mupuru ni ikpoki olhe ghan. Ẹḅile ghụn ịkpaariom ịmi, ịdi eḍighi bọ Ẹnaan kụ ịḅogh oḍighi phọ ọphon ẹlhogh ḍịghaagh ạmi. 18Ịikpia phọ ạmina eeghe? Ịdipho mị ikpoki ḅịle rꞌịpe isi bọ ịmi ụ́waam ghan bọ ooḅi ọghaaph phọ kụ ịikpia phọ ạmi.
19Ịyaar ịmi ị́ghoroghi. Mị kẹ́bene oye. Mị ụmagha loor ạmi ẹbene ọbo mị ạtophoron we lọ mị katue ạḅaranaan Kraist. 20Igbo ạbuo aJu phọ mị uḍighi aani ni oniin ọnyo ạbidi ọbo mị ạtophoron bịdi. Ghạlamo ịdipho mị makpetenaan bọ ni Ologh phọ aMozis bịn igbo ạbuphe rooko bọ ni mị uuko aani ni, ọbo mị ạtophoron bịdi. 21Ịduon phọ kẹn kụ ẹdi igbo aruuruen phọ róoko ghan bọ Ologh phọ aMozis mị uḍighi aani ni ooruen, ọbo mị ạtophoron bịdi. Ẹmhu phọ rẹ́ḅem ghan mọ mị ráako ghan iilogh phọ Ẹnaan. Emeeraam mọ iilogh phọ aKraist kụ riphogh ịmi. 22Igbo ạbuo ọkporokporo omeeraam mọ, mị ụkporokporo aani ni ọbo mị ạtophoron bịdi ạḅaranaan Kraist. Esi okpere, mị asi ẹmha lọ omuuna rọkiom elhiom, mị umuuna aani ni bịn, ọbo mị ạphel buniin ạbidi reten lọ mị katue.
23Mị ughol ẹmhu ooḅi ọghaaph phọ kụ raḍighi ghan bọ oomo phọ ịphen phọ, ọbo mị ạmoogh bụḅarama dị kọkaaph aani ghan. 24Nyina elegheri ni mọ iipikian eghiil, aḍita phọ rokiil ghan ni, kụ oḍiemiom mọ bịn rạmoogh ghan ruunmo phọ. Ikiil ịlo nyina kẹmoogh aani ruunmo phọ. 25Oophugha ephegh dị odi ịtuugha rạtuan ghan ni ọzola aḍuphuuph iphelegbe phọ kẹḅuura bọ ni bịn kápogh ekeeny rꞌelhiom; kụ yira ghụn ụtuan ọzola ạḍidi kẹ́ḅuura kꞌagee-pọ kụ rokiil ghan bọ. 26Mị ụtuan ruunmo phọ bịn kụ asomoghi bọ aghiil ọteeny aḍiigbu phọ. Ḅịle kẹn mị ụ́kigh obiom elephiri dị rạḅugh ghan bịn kaphogh oopho esi ạgiph. 27Mị rạkparagha ọphamaghan aloor ạmi, ọbo kughel ghan bọ ịmi phọ ạmagh bọ bụnon awe mọ oru aani eghiil phọ.
Currently Selected:
1 Bụo ạKorint 9: ẠḌI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS