1 Bụo ạKorint 7
7
Asipuru ịlo apinien
1Ọoḅeghion nụun ophogh sipuru phọ nyina ipuru bọ ịmi sịphe ạḍinya phọ nyina ẹge bọ iruom ịmi! Ẹkar ri ẹnighe ọrol ẹgelenya, 2kụ ọlo alephiri ophinogh ni pinien, ḅịle kẹn ạnmariir ạalagh ni ilom ọbo osophoghom dọl ipesi! 3Olhom mọ ạrol dọl aburulhom, ḅịle kẹn ạnir phọ ạrol dọl ạnmariir ilhom, 4ịdi eḍighi bọ ạnir phọ kụ ọ́moogha loor, olhom mọ kụ ạmoogh nyọdi; ḅịle kẹn olhom mọ kụ ọ́moogha loor, ạnir phọ kụ ạmoogh nyọdi! 5Oniin nyoniin kúkine ghan ẹmina aḍughul, emuton ekulha amem lọ nyina ẹḅoph ọnhu ọkuom aloor anyina ịiḅereghi. Ịphen reten bịn ịḅile ni eetumanan, ọbo aSetan kạmiin ghan bọ mọ ẹmina aḍughul rịgurogh inyina atu ịdegh inyina apogh.
6Mị inyina rị́kpaariom; mị rạkaaph ghan ịphen ịlo ọloghonaan anyina ḍịghaagh bịn. 7Bin ologhi ạmi, ẹkpe ni dị oomo awe kọrol ḍịen ạmi, kụ ọlo tọrobo oye ạmoogh ni ruunmo phọ ịpe Ẹnaan ẹngo bọ nyọdi, ịlo oye rꞌoye.
8Ịphen mị ạkaaph rạkpulughiom bụphe kạ̋alan bọ rꞌarukpukele ạnmariir. Ẹnighe ghụn ni dị nyina kẹrol bịn, ịduon mị odi bọ. 9Mọ nyina kétue ẹtol ḍịo anyina, pọ ịbalan. Ẹkpe ghụn ạalan, kpạripe rꞌomughom ẹephua.
10 #
Mat 5.32; 19.9; Mạk 10.11, 12; Luk 16.18 Ịphen kụ ịdi mị ạto rạḅeni bụphe mạalan bọ. Ịto phọ ịphen ịlo Ọmoogh-we phọ, kị́lo ạmi. Ạnir kụ́taanaan ghan ẹmhu, 11kụ ọlo mạtaanaan ẹmhu kụ́wa ghan lephiri, ạḅile ghụn aḅula kꞌolhom mọ ọdi, kụ olhom ạnir ọdi kúseere ghan.
12Bụeri phọ mị rạḅeni ịlo ologhi ạmi, kị́to Ọmoogh-we phọ. Ọnyo asiya lọ maphin ạnir dị Ẹnaan úlegheri kụ ameeraam ni orughom ọdi, kúseere. 13Kụ ọnyo asiya lọ mạal oye dị Ẹnaan úlegheri kụ ameeraam ni ọrolan ọdi, kụ́taanaan ẹmhu. 14Ẹnaan kẹtuan ni omeeraam ạnir phọ etigh aani olhom mọ ọpo nyọdi úlegheri bọ eseerian; ḅịle kẹn, Ẹnaan kẹtuan ni omeeraam olhom mọ etigh aani ạnir phọ ọpo nyọdi úlegheri bọ eseerian. Ịduon ílho, pọ ạnmuny phọ ạbidi koḍighi bụo aruru. Kụ Ẹnaan mẹtuan dọl phọ ạbidi etigh bịdi eseerian. 15Kụ eḍighi ịyaar dị ọpo úmeeraam bọ Ẹnaan ạwa ọgbaranaan, pọ ạgbatanaan ni ạḍua! Kụ ọdo ọghaaph phọ ọphon asoor, ịyaar ị́koroghi olhom mọ mꞌạnir phọ mameeraam bọ. Ịtolom ẹepho, ịdipho Ẹnaan mịmagh bọ inyina. 16Nyina ẹrolom ni ẹepho, pọ iini kọtuan ni nyịna ạnir phọ ọpel olhom mọ ạna otene, iini kẹn kọtuan ni nyịna olhom mọ ọpel ạnir phọ ạna otene.
Ịtol dọl amem mọ Ẹnaan ịmagh bọ inyina
17Oye ye phọ ạphamanam ni ruunmo phọ ịpe Ọmoogh-we phọ ạngo bọ nyọdi, kụ ạrolom ghan dọl amem mọ Ẹnaan ẹmagh bọ nyọdi! Ọphon kụ ologh dị mị rạtughemi ghan sịosi ạsiosi. 18Oye lọ maḍuna kụ ameeraam ḍịmagh phọ Ẹnaan, pọ kụ́uḅaghamian loor. Oye lọ odimom oodu kụ ameeraam ḍịmagh phọ Ẹnaan, pọ kúḍuna. 19Ọrolom oodu rꞌoḍuna ị́moogh ịyaar oḍighinom. Ooko ghan iilogh phọ Ẹnaan kụ ịman ịyaar. 20Tọrobo oye ạrol dọl phọ dị ạrol bọ mem mọ dị ameeraam bọ ḍịmagh phọ Ẹnaan! 21Mọ nạ uḍighi ẹbene mem mọ Ẹnaan ẹmagh bọ nyịna, pọ kạ́aḅaghamian loor. Kụ nạ ạmoogh eepoogh oḍighi aani uwo ade, pọ sịghe ni, 22ịdi eḍighi bọ ẹbene lọ Ọmoogh-we phọ mạmagh pọ maḍighi uwo ade ọdi. Ịduon phọ kẹn uwo ade lọ aKraist mạmagh, pọ maḍighi ẹbene ọdi. 23Ẹnaan igho ni inyina ḍiboom aḍighi, kụ kéḍighi rẹbene ẹngo we. 24Bụo asiya, oye ye ạmoogh mụḅoph rꞌẸnaan sịphe ạdol phọ dị ạrol bọ mem mọ ọmagh bọ nyọdi!
Asipuru ịlo ịpe ẹkpianaan bọ risina ạnmanyaan rꞌarukpukele ạnmariir
25Ịphen ẹkpulughiom risina ạnmanyaan dị ilom kạ̋alagh. Ọmoogh-we phọ kụ ịmi ụ́to ụḅeni, mị rạkaaph ịitughian ạmi, kụ ẹkpe ni oḍuom ologhi loor ighirigiir phọ Ọmoogh-we phọ ụnma bọ ịmi.
26Ọtuan ịminimiin phọ ạnyiidipho, mị ragbiom mọ ẹnighe ghụn dị olephiri ọony kạrol ghan bịn. 27Nạ apin ni ạnir, pọ kạ́wa ọgbaranaan. Nạ ạnir kőphin, pọ kạ́wa ạnir ophin. 28Kụ eḍighi ịyaar dị nạ aphin ạnir, pọ nạ ịkaraph kőḍighi. Kụ eḍighi ịyaar dị esina ọnyani ạal ilom, pọ ọdi ịkaraph kőḍighi. Kụ mị rạwa ghan mọ kéḍigh aani ịiḅaghami aḅirini phọ edianaan bọ ọdo awe phọ ạbuen.
29Bụo asiya, ẹmhu ọghaaph phọ ạmi ịduon: ọony ẹnum amem bịn kụ mesugha, kụ emiigh nyịidipho ẹghiom ghisigh, bụlo mophinogh nmạriir ọrol dọl ạregelenya, 30bụlo romoghi ogburugha izin phọ ạbidi, bụlo rọmilogh rẹegh kúḍighi ịlo ọḅaal ologhi, bụlo rokooghi rạraar oḍighi mụdi kị́lo ạbidi, 31bụlo ọphamanam rạraar aḅirini phọ kụ́sighe emooph ạbidi ụkpasi sịphe, ịdi eḍighi bọ aḅirini phọ yira rọmiin bọ rạteeny eekuna.
32Ịḅeeraan ịmi mọ kẹ́moogh ghan ọoḅaghamian aloor. Oye lọ ạnir úpin rạkuom ghan loor ọdi oḍighi Ọmoogh-we phọ, ịdi eḍighi bọ ọdi rạwa ghan ọḅaalami ologhi Ọmoogh-we phọ. 33Kụ oye lọ maphin ạnir rạkuom ghan loor igbiriḅa aḅirini phọ, ịdi eḍighi bọ ọdi rạwa ghan ọḅaalami ologhi ạnir phọ ọdi, 34bịn roḍurughan nyọdi. Ạnir mꞌesina ọnyani dị ilom ụ́bal rạkuom ghan loor ọdi oḍighi Ọmoogh-we phọ, ịdi eḍighi bọ ọdi rạwa ghan ọḅogh aruzu-ạnyu phọ rꞌuwaloor phọ ọdi ọngo Ẹnaan, kụ ạnir lọ mạal ilom rạkuom ghan loor ọdi igbiriḅa aḅirini phọ, ịdi eḍighi bọ ọdi rạwa ghan ọḅaalami ologhi olhom mọ ọdi.
35Mị rạkaaph ghan ịdi keḍighi sụo ịngo inyina. Mị rạ́logh oḍigh irum anyina. Mị rạwa ghan ghụn mọ iḍighi ghan ịpe ẹkpianaan bọ kụ ẹnighe, ẹḅogh oomo aloor phọ anyina ẹkuom Ọmoogh-we phọ, ọman képogh.
36Ọde lọ agbi mọ ọno mamirighan ọnyani ọno dị otebeeny ḍịkala ọnuun ạal ilom kụ mạrol sịphe apeloghom isina, pọ ameeraam mọ ọnyani phọ rꞌọony phọ ạalan! Ịphen phọ íḍighi ịkaraph. 37Kụ eḍighi ịyaar dị ọde phọ ụ́kpaariom kụ ạphur ọkpuku mọ ọno kạ́nughenyan ọnyani phọ kụ eru ni ịitughian ọdi bịn, pọ egey eḍighinom ịyaar ri. 38Ịduon kụ iḍighi kụ ọde lọ ạnughenyan ọnyani ọdi aḍighi ni igey, kụ ọde lọ ụ́nughenyan ọnyani ọdi aḍighi ni igey phọ rapuemi.
39Ạnir ilom ólhoonaan ẹmhu ọdi bịn mem dị olhom mọ ọdi ni rapooghu. Eḍighi ịyaar dị olhom mọ ọdi amugh, ọdi ạmoogh ni eepoogh ạal ọnyo asiya lọ ạḅeeraan nyọdi. 40Kụ ọbo bin ologhi ạmi, oku otu orugh kụ kẹngo nyọdi ọḅaal ologhi epu. Mị ragbi mọ ịphen ologhi phọ ạmi kụ ẹdi Uwaloor Iigbia phọ rạatughian kẹn ni.
Currently Selected:
1 Bụo ạKorint 7: ẠḌI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS