1 Bụo ạKorint 13

Ẹphomoghian

1Eḍighi ịyaar dị uunmo ịmi ruunmo ọḅa ghan ọnhu kịrokiro phọ awe rꞌạruukpaany phọ Ẹnaan rọḅa ghan bọ kụ mị ẹphomoghian ụ́moogh, pọ ọghaaph phọ ạmi ópel ḍịaḅa ogele rꞌẹdeneneen dị rookaragh. 2#Mat 17.20; 21.21; Mạk 11.23Mọ mị ạmoogh ruunmo dị kịsiiny ghan ịmi ọghaaph ghan ịpe Ẹnaan egananami bọ, ḅịle rꞌịlo ọnaghanan oomo ạraraar ịbooghian, rꞌolegheri ghan oomo ạraraar ḅịle rꞌịlo ọmoogh omeeraam dị ạkasian oruphom aruugum kụ mị ẹphomoghian ụ́moogh, pọ mị oopho ịyaar ri bịn. 3Mị atue ni ạsighe oomo ạraraar lọ mị ạmoogh aḍighinom iiḅi ạman, ạḅile kẹn ạngo loor ạmi mọ oguom nịan, kụ mị ẹphomoghian ụ́moogh, pọ ạsuo ịmi úlhoonaan.

4Ẹphomoghian eḍighi ọkparam rꞌoḍighi ghan iiḅi; ẹphomoghian íḍighi ephogh-aḍien rꞌiituma rꞌobaga. 5Ẹphomoghian réḍighi ghan ịlo umugholoor, rẹ́wa ghan ịlo aloor bịn, rékpom ghan ekpom, rẹ́logh ghan ịyaar ologhi. 6Ẹphomoghian rébo ghan mem lọ oye ạpioman, rẹḅaal ghan ologhi mem lọ ạḍighaagh igey eḅetenu. 7Ẹphomoghian réḍim ghan; ọku ólhoonaan ghan omeeraam mọ rꞌoḍuom ologhi phọ rꞌọkparam mọ ọdi.

8Ẹphomoghian rémineen ghan. Aruunmo ịlo ọghaaph ịpe Ẹnaan egananami bọ kẹtol li mọony amem bịn. Aruunmo ọḅa ghan ọnon ọnhu dị ụ́naghan kesi ni eekuna. Aruunmo olegheri ịyaar keten ni, 9ịdi eḍighi bọ olegheri ịyaar phọ ayira rꞌọghaaph ghan ịpe Ẹnaan egananami bọ eḍighi ni egbem bịn. 10Kụ mem dị ịpe emunughan bọ ketu bọ, egbem mọ kọ́miin mun.

11Ẹghoroghor phọ ạmi, ẹghaaphom-ịyaar phọ ạmi rꞌịitughian phọ ạmi rꞌarigbiom mọ ạmi iḍighi ni ịlo ịbam ạnmuny. Nyịidipho mị mạmanam bọ aḍighi oye, mị masereghi eḍighinom ịyaar ịbam ạnmuny. 12Ịphen yira rọmiin bọ nyịidipho ẹkigh mụdi yira opogh atamaḍiki kụ rọmiin ghan oogho dị ạrol bịn tụm. Mem mọ retu bọ, oniin kạmiin ni egbodo oniin. Ịphen mị nyịidipho úlegheri bọ ụman, mị kalegheri ni ạman mem mọ ọpo phọ, ịdipho Ẹnaan milhegheri bọ ịmi ẹmadan.

13Nyịidipho ịraar ạraraar phọ ịphen kụ ịmeera: omeeraam rꞌoḍuom ologhi rꞌẹphomoghian, kụ ẹphomoghian kụ ipu oomo phọ ịne.

Currently Selected:

1 Bụo ạKorint 13: ẠḌI

Tya elembo

Kabola

Copy

Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Yekola Koleka na Ntina ya Ạḍinya Iigbia