1 Bụo ạKorint 12
12
Ịlo aruunmo aruwaloor
1Ọoḅeghion nụun ophogh ḍipuru phọ anyina ịlo aruunmo aruwaloor phọ! Iiḅi asiya, rꞌeniin ịlo ịphen phọ dị mị rạwa ạaghinaan anyina ílho. 2Nyina elegheri ni mọ mem mọ nyina ẹrol bọ ẹku aruru phọ, ạnmuny aghuḍuul dị rẹ́ḅa ghan kụ ịmooghom inyina eekeleghi ghan. 3Iloghoma nụun mọ oye dị Uwaloor phọ Ẹnaan kụ aḍiemiom rạ́ḅem ghan mọ, “Moruule Jịzos,” kụ oye dị Uwaloor Iigbia phọ kụ úḍiemiom kátue ạkaaph amitiom mọ, “ẠJizos kụ Ọmoogh-we phọ ni.”
4 #
Rom 12.6-8
Aruunmo aruwaloor phọ kịrokiro ni, kụ oniin Uwaloor phọ ni kụ rạngo ghan bọ. 5Oḍighi ọlo oye rꞌoye ni, kụ oḍighi ghan ni rọngo nyoniin phọ Ọmoogh-we phọ. 6Ịnyaam oḍighinom oḍighi phọ kịrokiro ni, kụ eniin phọ Ẹnaan phọ ni kụ rẹngo ghan bọ ịnyaam oḍighi ọlo oye rꞌoye. 7Rọmiin ghan eḍighinom ịyaar Uwaloor Iigbia phọ loor ạtorobo oye reten kịrokiro, ịlo ạsuo aḍita phọ. 8Uwaloor Iigbia phọ ạngo ooni oye olegheri ịyaar, ạngo ooni oye ọmaar ghan ọtughemi, kụ ịyal phọ ạbidi rọkaaph ni ḍiniin adom mọ. 9Ogina phọ Uwaloor phọ ni ạngo ooni oye omeeraam, ạngo ooni oye ịikpo ookonom ghan ạreezegh, 10ạngo ooni oye ịikpo oḍighi yogh ghan ịiḍaany, ạngo ooni oye ọghaaph ghan ịpe Ẹnaan egananami bọ, ạngo ooni oye ịikpo mọ ạaḅeghion ghan ruunmo alegheri ịlo igey mꞌịkaraph aruwaloor kụ ẹsighe eru, ạngo ooni oye mọ ephum ghan kụ ạḅa ọnon ọnhu dị ụ́naghan, ạngo kẹn ooni oye mọ ạgba ghan ẹmhu phọ ạḅeni we. 11Oniin rꞌogina Uwaloor phọ ni kụ raḍighi ghan bọ oomo phọ ịphen phọ kạngo ruunmo ịlo oye rꞌoye, ịdipho ẹḅeeraan bọ nyọdi.
Aloor phọ ẹmoogh ni riisi kịrokiro
12 #
Rom 12.4, 5 Oye ạmoogh bọ ḍiniin aloor, kụ ariisi aloor phọ ịbadi ni, kụ oomo phọ ariisi phọ etulughan bọ sịphe aḍiniin phọ aloor phọ. AKraist ạkighom aani ịduon phọ. 13Ughol li ogina phọ Uwaloor phọ kụ owurogh bọ oomo phọ ayira mụum mọ. Ạbuo aJu rꞌaruuruen, rꞌạrebene rꞌạbuo ade mọḅoph ḍiniin aloor phọ rọpughol ghan muniin ạmuum Uwaloor phọ.
14Sịen dị esi kịrokiro kụ etulughan bọ eḍighi loor phọ, 15eḍighi ịyaar dị ẹda owol phọ ẹḅem mọ, “Mị útu bọ ḍịghaagh, pọ mị úlho aani sịphe aloor phọ,” ịduon phọ bịn ímirighan nyọdi ọrol aani ịsiphe aloor phọ. 16Ḅịle kẹn aḅeri phọ kụ ạḅem mọ, “Mị útu bọ ekpeḍien, pọ mị úlho aani sịphe aloor phọ,” ịduon phọ bịn ímirighan nyọdi ọrol aani ịsiphe aloor phọ. 17Oomo phọ aloor phọ kụ eḍighi ekpeḍien bịn, mịnaghan ghan ika ḍụghum? Ḅịle kẹn, oomo phọ aloor phọ kụ eḍighi aḅeri bịn, mịnaghan ghan ika eḍu? 18Kụ Ẹnaan melhegheri ni kụ ẹde bọ oomo ariisi aloor phọ ịdipho ẹḅeeraan bọ nyọdi. 19Eḍighi ịyaar dị oomo ariisi aloor phọ kụ eḍighi nyeniin bịn, aloor phọ mịtol bọ ḍighen? 20Ịdi edi bọ, ariisi aloor phọ ịbadi ni kụ aloor phọ aḍiniin ni.
21Ịduon kụ iḍighi kụ ekpeḍien phọ kémighirom ẹḅeni ḍịghaagh mọ, “Mị ụ́moogh ịyaar oḍighinom ạna.” Ḅịle kẹn, ẹmhu phọ kémighirom ẹḅeni rạda aruwol mọ, “Mị ụ́moogh ịyaar oḍighinom anyina.” 22Okiririom ghụn ophogh, ariisi aloor phọ ịpe ẹghigh bọ dị ẹyoghoyogho ni phọ eḍighi ni ephigh iboom, 23kụ ariisi aloor phọ ịpe ghụn yira rogbiom ghan bọ mọ ị́man ịyaar phọ kụ ịdi yira roonmenemi ghan koghueniom. Ḅịle kẹn ariisi aloor phọ ịpe ị́nighe ghan bọ ọmiin phọ ghụn kụ ịdi yira roonmenemi ghan ọnighemiom ẹnighe 24phọ ẹpe iiḅi ariisi aloor phọ ayira rẹ́wa ghan bọ. Kụ Ẹnaan rꞌaloor ọdi ni kụ ạdeeghi bọ riisi aloor phọ ẹdiom ọngo eghuan riisi phọ ịpe eghuan íḍigh bọ. 25Esi ịduon phọ amadian ólho loor phọ, eniin edimom nyeniin dọl igbiririph. 26Kụ eniin esi aloor phọ rẹmiinom, pọ oomo ịpheri phọ rẹmiinom aani ni, kụ ọngo ḍịseph nyeniin esi, pọ oomo ịpheri phọ repin aani ni bin ọḅaal ologhi phọ.
27Oomo phọ anyina kụ aloor phọ aKraist, kụ tọrobo ọnyo anyina pọ eniin esi aloor phọ ọdi ni. 28#Ẹfe 4.11Kụ Ẹnaan melhegheri ni kụ ẹde bọ we phọ eseere uwo oḍighi rꞌoḍighi sịphe ạsiosi phọ: ạbuḅel phọ abutelhedom, bụdi otum pạ ạbuo ọghaaph ghan ịpe Ẹnaan egananami bọ, bụdi omuneniom ịraar ạbutughemia kụ ogbi ọteeny ạbuo oḍighi yogh ghan ịiḍaany, kụ ọteeny ạbudi ọngo ịikpo ookonom ghan awe rꞌạbuo ọloghonaan ghan ạḍighaagh bụnon, rꞌạbuo ịtooghi, rꞌạbudi kepum ghan kụ ọḅa ọnon ọnhu dị ụ́naghan. 29Aḍita phọ kụ abutelhedom ḍụghum? Aḍita phọ kụ ạbuo ọghaaph ghan ịpe Ẹnaan egananami bọ ḍụghum? Aḍita phọ kụ ạbutughemia ḍụghum? Aḍita phọ kụ roḍighi yogh ghan ịiḍaany ḍụghum? 30Aḍita phọ kụ ụmoogh ịikpo ookonom ghan awe ḍụghum? Aḍita phọ kụ rọḅa ghan ọnon ọnhu dị ụ́naghan ḍụghum? Aḍita phọ kụ rọgba ghan ọnhu phọ ọphori phọ ạḅa bọ kọḅeni bụeri phọ ḍụghum? 31Iseere ologhi ẹwa ghan ruunmo phọ ịpe eḍighi bọ ni ephigh iboom.
Kụ nyịidipho mị kiḍeenaan inyina ịdi ẹnighe epu oomo phọ ịne.
Currently Selected:
1 Bụo ạKorint 12: ẠḌI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS