Filipenses 4

Nkochríxín chrókócháhara kixin tinkachónkira Ìnchéni

1Jahara kíchóni imá tjua̱hára, la ko imá tjínka̱oan tsjasántsjahára kixin xi̱kaha imá tso̱chéhe̱ a̱sená. Méxra̱ jahara mé éxi ijnko nkehe jína ó kjuácha. Méxra̱ kíchóni, jína chrókꞌuejora, chrókuinkachónkira Ìnchéni.

2Xrja̱noáha jaha Evodia la ko jaha Síntique kixin nkoko̱a chrókjuénka̱yáxian kixin éxi nkoko̱a kichuara kixin tinkachónkira Ìnchéni. 3A̱ndá jaha kíchóni, mé jína kꞌuéjoni kjuíchꞌeni ixra̱; méxra̱ xrja̱noáhá kixin tsjinki̱tsa ti sin kíchóni ichjin, kixin kja̱xin sin kjuínki̱tsa sin kjuíchꞌe sin ixra̱ ti ó níxja janhan ti itan jína tsaáxini. La ko ti kíchóni Clemente la ko íso sin kjuínki̱tsa kjuíchꞌeni ixra̱. Ti ihni̱é sin la mé ó sínixín ti xroon chónta ti ihni̱é chojni tsaá.

4Chrókócháhara nkochríxín kixin tinkachónkira Ìnchéni, na̱xa̱ xrja̱nká ínaá kixin chrókócháhara. 5Mé xi̱kaha kaín chojni chrókjuatso̱an sin kixin jahara tjáko̱xinra jína. Kixin Ìnchéni la ó chjina itsi.

6Méxra̱ chrókóxakuanhñara ninkehó. Ícha jína chróchenkara Díos kaín nkehe ticháxi̱hanra, la ko chrókjuanchehéra chꞌan, la kja̱xin nkoya̱xón chróchje̱héra chꞌan kjuasáya. 7La jehe chꞌan mé tso̱tjáhara chꞌan ijnko kjuaxróxin imá ijié, la nijnko chojni tsjachahya tienxín tíha. Ti kjuaxróxin mé tsꞌayakohen a̱sánra la ko tsꞌayakohen ti kjuaxrexinkaon kuèntára kixin nkoko̱a tinkachónkira Cristo Jesús.

Tíhi tjénka̱yáxinra

8Méxra̱ kíchóni, tíhi tétua̱hanra. Chrokjuénka̱yáxinra kaín ti nkehe chaxín, la kaín ti nkehe chonta kjuasàya, la kaín ti nkehe ndoá, kaín ti nkehe jína, la ti nkehe náxrjón la ko ti nkehe tóxríhi̱n Díos.

9Méxra̱ chrókꞌuitjáñahñara kaín ti nkehe kjuákohára la ti nkehe kuihínra ti xrja̱nká la ti nkehe kuétua̱hanra la ko ti ixra̱ kꞌuíkonra kjui̱tꞌa. Mé xi̱kaha jína chrókjuáko̱xinra, a̱ndá ti Díos tjajon kjuaxróxin mé chrókꞌuejoko̱ara.

Ti chichaon kjuajon ti sin filipenses

10Imá chàna kixin Ìnchéni kjuínki̱tsa ti jahara la ó xráxinkaonra ínaá ti janhan. Ndáxrja̱nhña kixin tsíkꞌitjáñahanra ti janhan. Náhí. Jehí xrokuahya chrókjuínki̱tsara ti janhan. 11La ko ndáxrja̱nhña kixin nóaxi̱n itjén la ko ticháxi̱na nkehe, náhí. Janhan la ó kuàna itjén kjuaxróxin, kjónté ti nkehe chonta ó. 12Janhan la ó kꞌuíko̱nxian ti chontahya nkehe la ko kja̱xin ti ó chonta nchónhña nkehe. Kjónté ichrén nkehe chrókꞌuatsínka la ó tsjácha, kjónté á kjonié jína o̱ kjoniehña, á siín nkehe o̱ kohya ninkehó. 13Kaín nkehe tjácha itꞌa̱ kixin Cristo mé tsjinki̱tsana ti janhan. 14Méxra̱ jahara jína kjuáko̱xinra kixin kjuínki̱tsara ti janhan la kjuájonra nkehe ticháxi̱na.

15Jahara chojni chjasin Filipos, ó nohara jína kixin ti kjuankíxian kjuàkua ti itan ni̱xin tsjajon kjuachón ti sákjui̱xi̱a̱n Macedonia, la jahóra ti ni̱nko Filipos ichrꞌanra chichaon kꞌuayáha̱ kixin cháhara kjuákohára itén Díos. 16#Hch. 17:1.#2Co. 11:9.*Méxra̱ ti na̱xa̱ kjuakꞌé Tesalónica, la jahara ichrꞌanra iso chichaon kuènté ni̱nko iso vece kixin kjuínki̱tsara kꞌuíná ti nkehe kuékꞌichánxi̱na ntiha. 17La jehya kixin tjínka̱oan kixin jehó chrókꞌuayáha̱ nkehe. Náhí. Tjínka̱oan kixin a̱ntsí chrókꞌuánkí ti nkehe chróchontara nkaya nka̱jní ti itjen Díos. 18#Ex. 29:18.*A̱ndá janhan ó kꞌuayáha̱ kaín ti nkehe ichrꞌanra la a̱ntsí itsjé chonta. La ko kja̱xin kꞌuayáha̱ ti nkehe tsíchrꞌánra kjui̱ka̱o Epafrodito, la ó tsjacha tíha. Tíhi la éxi ijnko nkehe xraxé náxrjón chróchje̱héra Díos chrókóxríhi̱n chꞌan. 19La Díos kuénta̱na mé tso̱tjáhara kaín ti nkehe na̱xa̱ ticháxi̱nhara, kixin chónta chꞌan kaín nkehe imá náxrjón tjete tsꞌáyéhe̱ ti sin tinkáchónki Ìnchéni Cristo Jesús. 20Mé Itꞌéni Díos mé tsꞌáyéhe̱ chꞌan kjuasàya nkochríxín. Mé xi̱kaha tso̱hen.

Kjuixixín nixja Pablo

21Nixjehéra kaín ti sin tinkáchónki Jesucristo tjejó ntiha. Ti sin kíchóni tjejókoni ntihi mé nixjahára sin. 22Kaín ti sin tjejó ntihi tinkáchónki Díos mé nixjahára sin, la ko kja̱xin ti sin kíchóni chꞌehe ixra̱ ti nkexro tꞌe̱to̱an romano mé xráxinkaon sin ti jahara. 23Ìnchéni Jesucristo mé chrókjuintañaora kaínra. Ó tjen.