Baverset oyo Eyebani Mpenza ewuti na Matiyo 5

Ene furutẹ amịna warị ḅio tọnjọ tọnjị ḅọ ye kẹ anị jụjụ-a; anie nakara mḅọ anị kẹ tọnjọ sịẹma ye ọgọnọ gbanatẹ anị bele kẹ warị mẹ ḅio sime-ḅọ sime-ḅọ pịrị ḅa. Anị gbọrụ ḅara ḅụ yee ọmịna tọnjọ sọ ọkọ kẹ kọrị paka tomina tọrọkọ, mịẹtẹ ini ọmịna iḅi amịẹaị ẹrị tẹ ọmịna Ḍaḅọ So-ḅio simearị ḅọ ḅe tokini.”

“Ọ́ kịkarị ye anie bebe tomikiri mẹ ḅẹ bele. Tụndụ ọgọnọ simearị opu ama ḅọị ḅẹ ọkụ ofori.

“Ḅioḅẹlẹ sime gbọrụ ḅioḅẹngbọ kẹ Tamụnọ nimi ḅẹ ḍọkịarị apụ ma pịrịm; ini ma ịn Tamụnọ ẹrị ḅa!”

“Ḅioḅẹlẹ sime Tamụnọ ḅụụ-ḅẹlẹ ye mịẹ ḅụụ ḅụ ye la ḅẹẹye-ḅẹẹye nẹngị apụ ma pịrịm; Tamụnọ mịẹtẹ anị ọkọ sime ịn pịrị gbasịma ḅa!”

Kụma mịọkụ yẹrị ọ́ ḅẹẹarị: ó si kẹ ọ́ tọn apụ ḅẹlẹmaa, tẹ tẹkẹ ḅaa-ḅọkọ kẹ ọ́ ḍọkịarị apụ pịrịị

“Ḅioḅẹlẹ sime ịn tẹmẹ ḅụ igoin wararị ḅara nimi apụ ma pịrịm; ini ma ịn Tamụnọ Ama-da suku-ḅio sọ tẹẹ!”

“Ḅioḅẹlẹ sime dein mịẹarị apụ ma pịrịm; Tamụnọ ori awọmẹ kẹ ịn sịn ḅa!”

“Ḅioḅẹlẹ sime amịna asi gotẹ kururuarị apụ ma pịrịm; Tamụnọ ịna ḅiokpọma ḅa!”

“Ḅioḅẹlẹ sime ini ma tẹ Tamụnọ ḅụụ-ḅẹlẹ ye mịẹarị ẹrẹsị tomi kẹ tọrụsiẹrịmarị apụ ma, pịrịm; ini ma ịn Tamụnọ Ama-da suku-ḅio sọ tẹẹ!”

“Ḅioḅẹlẹ sime ọkụrụkụrụ nyana ja atomi pịrịarị apụ ma pịrịm; Tamụnọ ọkụrụkụrụ nyana ịn pịrị ḅa!”

“Ḅioḅẹlẹ sime ọmịnị ma tẹ ì ḍukamẹnjịarị ẹrẹsị tomi ịna ḅịḅị sọ asi-aị, asi-aị kẹ wori sima, tẹ kẹ tọrụsiẹrịma, tẹ pịkị mịẹ-a asi-aị kẹ sịḅị ḅụ sẹịn-arị apụ ma pịrịm.” Ó ḅioḅẹlẹ tẹ ḍerekuu, kẹ gotẹ ọkọ ḅẹẹarị, So-ḅio ḅụ opu gbẹẹ-ye Tamụnọ nwẹn kẹ ọ́ wẹrịma wararị. Mị gbọrụ ḅara mẹ mie tomi kẹ ịkịankoro apụ ma tẹ ọmịna tọrọkọ-tarịapụ ma kẹ ḅaa-ḅọkọ ḅụ suu ḅara.

“Ḅioḅẹlẹ sime ḅụụ iderimarị apụ ma pịrịm, Tamụnọ minini ori atomi pịrị aị ma ịna aḅara la ḅa!”

“Ọ́ kịkarị ye anie ó simearị tomina-ogbo mẹ ḅẹ fụn. Tẹ fụn ḅarị fụn ḅẹlẹ-a kụma ndẹẹ ịn kẹ anị mịẹ tẹ anị pịkị fụn ẹrẹ fị ḅẹ ḅara? Anị gbala ḅo kịnị kẹ mịẹ, mịẹye ofori ye sọ tẹ, tomi anị kẹ wakị nguma tẹ nanga, nanga ḅọrọ ḅẹ tẹ ḅa.”

Iḅiye mịẹ ḅụ ọ́ kara-gbasị tẹ ḅara simee, anie ọmịna Ḍaḅọ So-ḅio simearị ḅọ ḅe sọ simearị ḅara mẹ!

Ị́yẹrị paa ḅẹẹ, “Inn” anịanịa “Ẹn-ẹn”, miemẹ nẹngị tẹ í ḍuko ye, ḍuko ye Ekwesu ḅe ḅara ḅom.

Ọ́ naa tẹ mịnẹ ịn ḅẹẹm, “Tọrụngbọ na tọrụngbọ na ḅụra-a, aka na aka na ḅụra-a.” Kụma mịọkụ yẹrị ọ́ ḅẹẹarị: siye kẹ si kẹ ị́ mịẹ ḅọ mịẹ ọkị ma. Tomḅọ ḅara finji ị́ ama-ḅara ḅẹ amgba ḅọrọ ḅọrọ, ye mḅọ pịkị ere-ḅara ḅẹ amgba mẹ sọ ḅọrọ.

Ọkọ ẹrẹsị, ị́ ama-ḅara ḅẹ tọrụngbọ mịẹtẹ í si mịẹarị ḅẹḅẹ, anị sọkị sin tẹ kẹ wakị nguma! Í oju ḅẹ gbọrụ pakịrị ḅarị ofori iḅi ini í bebe oju mẹ kẹ ẹlị ḅio gbin suu nẹngị lamam. Ị́ ama-ḅara mịẹtẹ í si mịẹarị ḅẹḅẹ anị pẹlẹ-siin tẹ kẹ wakị nguma, ị́ gbọrụ ḅara, anịanịa ị́ gbọrụ ḅụọ ofori iḅi kẹ í bebe oju mẹ ẹlị ḅio sọ nẹngịm.