Baverset oyo Eyebani Mpenza ewuti na Marcos 12

*Ndá kjuáte̱he chꞌin Jesús, ndáchro: ―Ti nkehe a̱ntsí tjetoan kꞌue̱to̱an Díos la tíhi: “Tihínra kaínra chojni Israel, Ìnchéni Díos mé nkoko̱a la kohya íjnko nkexro. Kaín a̱sánra la ko kaín kjuaxrexinkaon kuèntára la ko kaín ti fuerza kuèntára chrótjuèxínra Díos.” Tíhi ti nkehe a̱ntsí tjetoan tsíkꞌe̱to̱an Díos. *A̱ndá ti nkehe yaáxin la tóyóhe̱ tíhi mé ndáchro: “Chrotjue̱héra kichuara éxi tju̱éxinra a̱sánra”, tíhi ti tsíkꞌe̱to̱an Díos la kohya íjnko nkehe a̱ntsí tjetoan ―ichro chꞌin Jesús.

Ndá chꞌin Jesús kꞌuéye̱he̱ chꞌan ti sin kꞌuájiko chꞌan, la ndáchro chꞌan: ―Chaxín ndáxrja̱n kixin ti tjan kꞌán i, nóa tjan, kjánchó a̱ntsí itsjé chrꞌáxehen tjan ti ntacajón ke ti íso sin kixin kaín sin la tjajon sin ti chichaon tsíxéhe̱ sin ó. Ndá jehe tjan la kjónté nóa tjan, la kjuajon tjan kaín ti chichaon kꞌuéchónta tjan chrókꞌuite nkehe chrókjonie tjan.

A̱ndá tjetja̱xi̱n chꞌin Jesús nkaxehen ni̱nko chjina itjen ti ntacajón tóxroyéya chichaon. La tjetsjehe chꞌan nkexrín nchónhña chojni chrꞌáxehen sin chichaon ti ntacajón. La kja̱xin itsjé ti sin rico chrꞌáxehen sin nchónhña chichaon ti ntacajón. Ndá kja̱xin ikjui ijnko tjan kꞌán la ko nóa mé chrꞌáxehen tjan ti ntacajón yaá chichaon kanhñó sínkí.

*Noheni kixin kaín a̱séni la ko kaín kjuaxrexinkaon kuènténi la ko kaín fuerza kuènténi chrótjuèxíni Díos la ko chrótjue̱heni kíchóni éxi tju̱éxini a̱séni. Tíha mé a̱ntsí sínkí, ke ti iko chrókꞌóñáni chrókjuajoni chritaón ti altar chróchróxihini Díos.

Ndá chꞌin Jesús, ndáchro: ―Chje̱héra César ti nkehe kuènté chꞌan; a̱ndá ti nkehe kuènté Díos la chje̱héra Díos ―ichro chꞌan. Ndá chrákon sin kixin xi̱kaha kjuáte̱he chꞌan.