If you would like a copy of this version please contact info@davaraudiobibles.org

Lhomi New Testament

खीत्‍रङ् ॱयोङ्‌गी गोल थो़न्‍न च्‍यो़न्‍स्‍यो़त् ॱमत् तो़न्‍ज्‍यीत्। तो़न्‍न ॱनी, खीत्‍रङ्‌ल को़न्‍ज्‍योक्‍की ठीम् च्‍यो़क्‍केन् बेत्। ॱयोङ्‌गी गोल थो़न्‍न खीत्‍रङ्‌गी घन्‍दुक् झ्‍यीबे च्‍यो़न्‍स्‍यो़त् तो़ङ्‌गुक्‍क हुल पीबे ठीम् को़न्‍ज्‍योक्‍की खीत्‍रङ्‌ल च्‍यो़क्‍केन् बेत्। खीत्‍रङ्‌गी घन्‍दुक् झ्‍यीबे ॱस्‍योक्‍क ज्‍यप्‍न तीक्‍कुक्‍क हुगो डस्‍सी खीत्‍रङ्‌ल आक् ज्‍यप्‍न तीक्‍केन् बेत्। रङ्‌गी ॱमीक्‍ल त दुङ्‌मक् यो़क्‍केल्‍ल घन्‍दुक् झ्‍यीन पी़न्‍ज्‍या ॱयोङ्‌गी ॱमीक्‍ल यो़प्‍पे झ्‍यीत्‍तुक् थोङ् छुगेन्? रङ्‌गी ॱमीक्‍ल त दुङ्‌मक् यो़क्‍केल्‍ल घन्‍दुक् झ्‍यीन पी़न्‍ज्‍या ॱयोङ्‌ल ङे रङ्‌गी ॱमीक्‍की झ्‍यीत्‍तुक् हुगो तो़ङ्‌गी सीन्‍न सीर् छुगेन्? ॱवे छ्‌यीलेल नङ् मत् लेब, ॱअल रङ्‌गी ॱमीक्‍ल यो़प्‍पे दुङ्‌मक् दी तो़न्‍न पुर्न ॱसेबोक्‍म थोङ्‌गेल्‍ल सो़। हुनी क हस्‍सो़त् पी़न्‍ज्‍या ॱयोङ्‌गी ॱमीक्‍ल यो़प्‍पे झ्‍यीत्‍तुक् दी रङ्‌गी तो़न् छुगेन् बेत्।
को़न्‍ज्‍योक्‍ल ॱमीन स्‍यक्‍पे ढङ् कील ॱमत् टो़च्‍च्‍यीत्। टेत्‍न, हुगी रङ्‌ल घप्‍न ॱहेक्‍तु युङ्‌गेन् बेत्। मुदीक् फक्‍पल ॱमत् टो़च्‍च्‍यीत्। बीन्‍न ॱनी, हुगी कङ्‌लीप् दोलीप् झ्‍यीक्‍केन् बेत्।

ॱनङ्‌रो झ्‍यी सीन्‍न स्‍यी़। हुनी ॱनङ्‌गेन् बेत्। ॱयेङ्‌न तो़। हुनी ॱङीक्‍केन् बेत्। गोच्‍च टु। हुनी पीक्‍केन् बेत्। घन्‍ड हीन् सीन्‍न ॱसी़ स्‍युगुक्‍क हुल थोप्‍केन् बेत्। ॱसी़ ॱयेङ्‌गुक्‍क हुल ॱङीक्‍केन् बेत्। ॱसी़ गोच्‍च टुक्‍कुक्‍क हुल पीक्‍न युङ्‌गेन् बेत्। खीत्‍रङ्‌गी छीक्‍नी ॱसी़ भीजे रोरङ्‌गी पबल ढोप्‍ची ॱनङ् सीन्‍न लीङ्‌गुक्‍क ॱनी हुल खीक्‍की ढोप्‍ची मेम्‍ब, दोलोक्‍प तीक्‍को़प्‍प बेक्‍कक् ॱनी? ॱनी यङ् ने ॱस्‍य ॱनङ् सीन्‍न लीन्‍न ॱनी, हुल खीक्‍की डी़ तीक्‍को़प्‍प बेक्‍कक् ॱनी? खीत्‍रङ् मी ङेम्‍बे त रोरङ्‌गी भीजल गागी ढङ् तीत् ॱस्‍यीगेल्‍ल तेङ् यी़न स्‍युगेन् खीत्‍रङ्‌गी यप्‍ल स्‍युगेल्‍ल ॱसुम्‍ब खोङ्‌गी ॱलो यङ्‌सी झ्‍यीन गागी ढङ् ॱनङ्‌गेन् बेत्।
ॱनी खीत्‍रङ्‌गी ॱसीम्‍बे ॱयोङ् च्‍यानी घन्‍दुक् झ्‍यीबे रीगो झ्‍यीक्‍को़दङ् हुगो डस्‍सी ॱयोङ्‌मल आक् खीत्‍रङ्‌गी झ्‍यीत् गोगेन् बेत्। छ्‌यो़डीम्‍ल धङ् कलुङ् ॱस्‍यो़क्‍केन् घयेक्‍की ढीबे ॱसुङ्‌रप्‍ल ओ़ब डीक्‍पे क दी हीगो बेत्।

गोच्‍च धोक्‍पोक्‍मनी यल्‍ल स्‍यु। गोच्‍च छ्‌यीम्‍मुनी झ्‍यीन स्‍युन डोगेङ्‌गी लम् हुगो गर्चम यो़क्‍केन् बेत्। हुगी लम्‍ल मी गज्‍येन् डोगेन् बेत्। हुगी स्‍युक् थदु खरप्‍ल च्‍यो़गेन् बेत्। गोच्‍च धोक्‍पोक्‍मनी झ्‍यीन स्‍युन डोगेङ्‌गी लम् हुगो च्‍य ॱसीङ्‌बोक्‍म यो़क्‍केन् बेत्। मी यरी यरीलरङ् हीगी लम् हीगो ॱङीक्‍केन् बेत्। हीगी फु तक्‍पे छी थोप्‍सल च्‍यो़गेन् बेत्।

कलुङ् जी़म ॱस्‍यो़क्‍केन् घयेत्‍नी धोजीम् झ्‍यीन दो़च्‍च्‍यीत्। घन्‍ड हीन् सीन्‍न हुब लुक्‍की सोप्‍ताल लुक्‍पक् घो़न्‍न, छ्‌यी दी लुक् डस्‍सी झ्‍यीन खीत्‍रङ् च्‍याल युङ्‌गेन् बेत्। ॱनी नङ् दी च्‍यङ्‌गु ॱमङ्‌ङम् लङ्‌नर डस्‍सी यो़क्‍केन् बेत्। हुब लुक् हीन् धङ् मेन् हुबे मीजीगी डेबु दील नम् च्‍येत्‍न तेन, हुनी खीत्‍रङ्‌गी ङु ॱस्‍यीगेन् बेत्। घन्‍ड हीन् सीन्‍न चीन्‍देरेक्‍पे दोङ्‌बुल घन्‍दुक् झ्‍यीन गोङ्‌गोङ् धङ् अप्‍ले डलु छ्‌यागेन्? ॱस्‍यीङ्‌दोक्‍की दोङ्‌बु गाल डेबु दी इक् गारङ् छ्‌यागेन् बेत्। दोङ्‌बु आक्‍पाल डेबु दी इक् आक्‍पारङ् छ्‌यागेन् बेत्। दोङ्‌बु ॱस्‍यीङ्‌दोक् गङ्‌ज्‍येल्‍ल डेबु आक्‍पा छ्‌यागो़प्‍प बेक्‍कक् ॱनी? दोङ्‌बु आक्‍पाल यङ् डेबु गङ्‌ज्‍येन् छ्‌यागो़प्‍प बेक्‍कक् ॱनी? ॱनी डेबु गङ्‌ज्‍येन् ॱमीत् छ्‌यागेङ्‌गी दोङ्‌बु घन यो़त्‍न अक्, हुगो ॱहेङ्‌न मील पुर्न ॱहे तोङ्‌गेन् बेत्। हुन्‍दुक् झ्‍यीन हुबे मीजीगी डेबु दील नम् च्‍येत्‍न तेन हुनी खीत्‍रङ्‌गी ॱह घोगेन् बेत्।
ङल चोव ज्‍यीन्‍दक् चोव ज्‍यीन्‍दक् सीक्‍केन् कुरीक् तेङ् यी़गी ज्‍यागक्‍ल स्‍युक् ॱमीत् छुगेन् बेत्। तेङ् यी़न स्‍युगेन् ङे यप्‍की थुल यो़प्‍प घयेत्‍ल नेन्‍न झ्‍यीक्‍केन् दीबरङ् स्‍युक् छुगेन् बेत्। स्‍युक् थमे हुगी ङीङ्‌गी यङ्‌ल मी गज्‍येन् युङ्‌न हुबे ङल चोव ज्‍यीन्‍दक् चोव ज्‍यीन्‍दक् नीज्‍यरङ्‌गी छेन्‍नी ङीक्‍की ॱङो़स्‍स्‍यी गज्‍येन् ॱस्‍येप्‍पेन् न ॱनी। ॱनो़प्‍प अयेक्‍प घयेत् तो़न्‍न दीप्‍पेन् न ॱनी। ॱस्‍यीक् छ्‌यीम्‍मी़ ले गज्‍येन् झ्‍यीबेन् न ॱनी सीक्‍केन् बेत्। ॱनी ङे हुबल खीत्‍रङ् गोमनीरङ् म दीरङ् ङे ॱस्‍युली ङु ॱमीत् ॱस्‍यीबेत्।
खीत्‍रङ् ङेम्‍ब झ्‍यीक्‍केन् घयेत् ङ च्‍यानी ज्‍युक् सीन्‍न सीक्‍केन् बेत्।

मी ॱसी़ ङे केच्‍च्‍य हीगो घोनी हीगो डमु झ्‍यीक्‍केन् दी मी झ्‍यी़रीक् च्‍येम्‍मे मी डस्‍सी बेत्। हुगी रोरङ्‌गी खीम्‍गी ॱसप्‍तेन् दी दो तीङ्‌दो़ खल ज्‍यप्‍न सोगेन् बेत्। ॱनी हुगो दो तीङ्‌दो़ खल सो़ब झ्‍यीनी, छ्‌येप्‍प ज्‍यप्‍न छ्‌युरोक् यङ्‌रोक् धङ् भुयुक् युङ्‌न अक्, हुगी खीम् हुगो मीत् रुम्‍गेन् बेत्। ॱनी यङ् मी ॱसी़ ङे केच्‍च्‍य हीगो घोनी इक्, हीगो डमु मीत् झ्‍यीक्‍केन् दी यङ् मी घुव डस्‍सी युङ्‌गेन् बेत्। हुगी रोरङ्‌गी खीम् दी झ्‍यीमे थोक्‍ल सोगेन् बेत्। छ्‌येप्‍प ज्‍यप्‍न छ्‌युरोक् यङ्‌रोक् धङ् भुयुक् युङ्‌न ॱनी, हुगी खीम् हुगो वयङ् रुम् डोगेन् बेत् सीन्‍न ॱस्‍येप्‍प बेत्।
येशुगी हीगो ॱस्‍येत् छर्नी, उन नेङ्‌गेन् घयेत् दीब खोङ्‌गी ॱलोप्‍स ज्‍यक्‍लुल ॱह लेब बेत्। घन्‍ड हीन् सीन्‍न खोङ्‌गी ॱलोप्‍स ज्‍यक्‍लु दी छ्‌यो़डीम्‍गी चयेलम घयेक्‍की लेमु डस्‍सी मेम्‍ब, कवङ् छ्‌यीम्‍मु यो़प्‍प डस्‍सी ॱह घोव बेत्।

Yoka मत्‍ती 7