Aaquqira Ufa 21
21
1Yaaweefa maqasaa karaambaiqa irirana kaikaa nammariara foora ireeda kai minni fua mai ania qifanoo miqidanoo.
2Anee aneenna marirana niranara andeeqanoo maridanoo fee qinanoo Yaaweefa ani qafamaseenoo ani amanammasee qafaannoo.
3Faiqí anaasee amiqira oosana auqaranafa tatufirana suqa amirana umaqqaranoo maridanoo.
4Manda oosana maree mariasa nári noori uqeerarafa faqa nári nimooqirafa faqa misa nifiqee fimarifaqa misa aaqaidaqa.
5Amiqimmasee oonumafi irisee ainaina auqeenana moomoo ainaina faqaafa marinnaranoo. Aaqmura aamura inana sia moomoo ainaina faqaafa marinnaranoo.
6Unnaqira aatata marasainna ainainafa sia kisaaqasaa ani faqa mariannoo. Mi ainainafa kai kaqi ani kuqiranaki quqaannoo.
7Manda oosana maree mariasa nári faiqí narirafa nári rarisameeqee nári nariranaki quqaidanoo. Misa amiqira oosana auqarara nikooqaidanoo.
8Aaqara oosana faqaa fasiqa aana eendaandiraa aana maridanoo. Aaqarana siaisa andeeqara oosana auqaidaqa.
9Tiqeera maqaki maridana amana marinnaranoo. Firaa maqa amiqira maqa tiaki rairai qimari anaaseena faqa maridana manda marira marinnaranoo.
10Manda oosana maree mariasa aaqara oosana auqarara naararee rafoora idanoo. Akaqausara faqa niqoonausara faqa sia nimudaoo idaqa.
11Ufa rukiee mari fasiqana arifaqa irirana siaisa mina qafamasee irirana mareefaranoo. Aamuaqira ufa irirana faqaana qimaminanoo irirana moo faqa moo faqa maraannoo.
12Andeeqara Anutufa manda oosana maree mariasa nári maaqaki auqee maria ainainara iridanoo. Mifa manda oosana maree mariasa kuridiranaki quqannisaannoo.
13Kudi fasiqa fannoo dadaaqiaqeera nammeera qinana anee sia irinana kasooaqee anee faqa nammeera qinaqa sia moo fannoo iriannoo.
14Faiqí moo fannoo ani faqa aanoo qimarinana anee kukeeqasee ainaina amisainanoo mina aanoo qirafa taikaannoo.
15Amiqira ainaina kambiqaifaqa andeeqara fasiqa anaasee asasidaqa. Manda fasiqa anaasee mina qafamasee ummaara maraidaqa.
16Amiqira irirana minnisee auianoo nifa kuqirafa mina afeesidanoo.
17Faiqí moo fannoo amiqira ainaina faqa amiqira mariranara faqa rimarifa sia ainaina marifa mariannoo.
18Andeeqara fasiqauqa ummaaraki aqufirara iafaqa manda oosana maree maria fasiqausa misa nimaaqa maqaidaqa.
19Aadana maqa maaqaki aneennaraa maridana amana marinnaranoo. Aanoo qida rairai qimari anaaseena faqa maridana mandaika minnaranoo.
20Irirana faqaasa maaqaki moomoo amiqira ainaina faqa fadameena faqa maridanoo. Irirana siaisa nárindi aaqee nama taikasee kaqi maridaqa.
21Kuqaa qira oosana faqa amuqusira oosana faqa auqeenana maa maqanasaa kisaaqasaa marinnaranoo. Akaqausa aniara andeeqara fee qimasee uriqarara auqu amifaranoo.
22Irirana faqaa karaambaiqa fannoo nimudaanai qimariasa faandaamura narisaa ititaqaana ooruree rapeepammasee narunifaqaaqa iannoo.
23Anee sia ummaaraki aqufiraree qimasee aneenna afaurusaa amiqimmasee rakisia.
24Aanoo qimarifa faqa ufa itairi marifa faqa faiqí moora uteeti qidaqa. Mifa narí amooqiranara kai afeekaiki marifa maridanoo.
25Aininirara raindaani marifa ainainirara akooqaidanoo. Narí mi oosanafa narí kuqaa aridanoo.
26Miqira fasiqauqa ainaina qimiaqee kai qimasaida iridaqa. Andeeqarausa sia miqidaqa afaarida kaqi nimidaqa.
27Manda oosana maree mariasa tatufirana suqaranara Yaweefa fidiaqaa midanoo. Manda iriranannai tatufirana suqaa fanoo Yaaweefa fidiaqaa idanoo.
28Kootaki unnufa qimarifa narí kuridiannoo. Anoona ufa kai andeeqasee qimarina ufa asasammasee iridaqa.
29Manda oosana maree mariasa fifau andeeqarausa naanna raqa nidaqa. Andeeqarausa nári marirana niranara oonumafi irisee nidaqa.
30Faiqí faiqi irirana faqa amiqira irirafa faqa sia ani dadaaqiannoo. Anee Yaaweena namuqaakiannanara sia dadaaqiannoo.
31Misa fifau rakiranaki firara qoosauqa deedaqidaqa. Yasaweefa narí kai rakirana uri qararana nimidanoo.
© 2017 Wycliffe Bible Translators, Inc. All rights reserved.