Sáni Markusï 15
15
Jesusi Pilatuni japarini
(Mt 27.1-2,11-14; Lk 23.1-5; Jn 18.28-38)
1Ka táta k'ératichaksï xarhentku tánperantaspti achamasïcheri urhets'ïkuricha ka juramukua jurhentpiricheri urhets'ïkuricha jinkuni, ka iámentu k'éri tánkorhentskuarhu anapuecha. Ka Jesusiniksï jók'utini Pilatuni pérakuspti. 2Ka Pilatu kurhamarhespti:
–¿Jeteru t'u judiouecheri irecheski?
Ka Jesusi arhispti:
–T'úri ísï uantaska.
3Ka tátecheri juramutichaksï uánekua ampe arhiparhataspti, 4Ka Pilatu ménteru kurhamarhespti:
–¿Kurhaxakiri enkaksïni xáni ampe arhinharhiparhatani jaka? ¿Nóri ampema uantakorhea?
5Ka Pilatu ísku pakareraspti enka Jesusi nómpema mókukorhempka,.
Jesusiri uarhikua kurhak'orhekua
(Mt 27.15-31; Lk 23.13-25; Jn 18.38—19.16)
6K'uínchekuarhu p'intekua jarhaspti eska Pilatu k'atakatani ma petant'a'pirinka, imani enka k'uíripu kurak'orhentapirinka. 7Ka Barrabasi máteru uántikpiticha jinkuni jupikata jarhaspti, imecha jinkuni enkaksï márku jámempka uarhipeni. 8Uáni niáranhaspti jima enka Barrabasi jápka ka arhisptiksï eska jurak'upirinka ma, eska p'intekuani no jurak'upirinka. 9Ka Pilatu kurhamarhpespti:
–¿Uéksïntsï eskaksïni judiouecheri irechani jurak'ucheaka?
10Jimpoka mítespka eskaksï táteri juramuticha ipuperakua jimpok'usï pérakupka. 11Ka tátecheri juramutichaksï sóntku manatpespti eskaksï Barrabasini kurhak'orhentapirinka. 12Ka Pilatu ménteru kurhamarhpespti:
–¿Ka ampe úkua inteni, enkats'ï arhik'a judiouecheri irecha?
13Ka uinhachapariniksï arhispti:
–¡Krúsirhu cháparhata! ¡Krúsirhu cháparhata!
14Ka Pilatu kurhamarheaspti:
–¿Anti ampechka nósesi úski?
Ka imaksï sánteru uinhachaspti uantani:
–¡Krúsirhu cháparhata! Arhani.
15Ka Pilatu sési pakaratspeni uékani, Barrabasini intsantaaspti, ka Jesusini urheta k'uikirhetarkorhespti, ka tátsekua jurak'ukuaspti eskaksï pápirinkia krúsirhu cháparhatani.
16Ka p'urhek'utichaksï Jesusini imecheri ekuarhu péraspti, ka iámentuksï p'urhek'uticha jima tánkorhent'aspti. 17Ka irecherini jásïksï xukuparhatant'a'spti, ka kanakuaksï tsurhumueri úkata ma inchats'ïtaspti. 18Ka teresmarhunksï ka uinhachakunksï uénaspti, arhiparini:
–¡K'éri ampe arhinhe judiouecheri irecha!
19Ka p'atamu jimpoksï uáts'ïskasïrempti atani, ka t'uánharikuniksï ka tinkuixurhikusïremptiksï. 20Enkaksï na k'ámarapkia teresmarhuni, irecheri xukuparhakuaksï p'ikuntaspti, ka ménteruksï imeri takusïni jatsikuntaspti, ka pásptiksïa krúsirhu cháparhatani.
Jesusi néna enka cháparhatanhapka
(Mt 27.32-44; Lk 23.26-43; Jn 19.17-27)
21Ka juátarhu junkuani jámani jimesï nitamantaxapti Simoni, Sirene anapu, enka Alejandrueri ka Rúfueri tátjempepka, ka p'urhek'utichaksï uinhapetarhu páraspti Jesusiri krúsini.
22Ka Jesusiniksï Gólgota arhikatarhu péraspti (enka: “Uarhiriri únicha” arhikuekak'a). 23Ka kauikuaksï uékaspti íntskuni, kauikua mirra jinkuni jeuetakata, k'óru Jesusi no arhaspti. 24Enkaksï na krúsirhu cháparhatapkia, p'urhek'utichaksï arhunkurhispti, ch'anakua jimpo, Jesusiri xukuparhakuani.
25Ióntakuarhuesptia enkaksï krúsirhu cháparhatapka. 26Ka krúsirhuksï cháts'ïtaspti karakata ma enka arhimpka: “Judiouecheri irecha” arhini. 27Ka máteruksï tsimani kuárhukup'iticha Jesusi jinkuni cháparhatanhaspti, ma jurhik'antani ka máteru uikixkantani. 28[Ísï jámani úkorhespti eska na karakata jaka: “Ka nósesi járhaticha jinkuni miiunhantaspti.”]
29Ka k'uiripu enka jimesï nitamempka, manats'ïsïreptkiksï ka mámaruksï arhimasïrempti nitamani jámani:
–¡Exekorhea! ¡T'u enkari tiósïoni xerent'apirinka, ka enka uantempka eskari tanimu jurhia jimpori úntapirinka! 30¡Kuáp'ekorhechkia, ka kétsekorhentsïchu!
31Ka tátecheri juramutichaksï ka juramukua jurhentpirichat'uksï teresmarhusïrempti, ka arhip'erasïremptiksï:
–Máteruechani kuáp'easti, ka inte k'óru no úsïntia kuáp'ekorheni. 32¡Eka Krístueka, ka israelicheri irecheni, kétsekorhentechka, eka kétsekorhent'aska, jakak'ukuakachi!
Ka imat'uksï mák'ueni arhisïrempti enkaksï márku cháparhatakorhetini jápka.
Jesusiri uarhikua
(Mt 27.45-56; Lk 23.44-49; Jn 19.28-30)
33Tátsekua páp'akantespti, teruxutini uénani ka ték'amatiru jamperi. 34Ka ték'amatiru Jesusi uinhachaspti: “Eloi, Eloi, ¿Lama sabaktani?” (Enka arhikuekak'a: “Jucheti Diósï, jucheti Diósï, ¿Antirinisï jurak'ia?”)
35Máru enka jima janhapka, ísïksï kurhach'atini, arhip'erasïrempti:
–Kurha je, Eliasïni ióarhixati.
36Jarhaspti ma enka uiriapka takusïni binagre jimpo kuakarhutani, ka p'atamurhu ma jórhukuspti ka Jesusini íntskuspti, arhiparini:
–Eroki je, ju je exeni, nántika Eliasï juuaka késkuntani.
37Jimak'ani Jesusi mátirku uinhamu mintsiraspti, ka uarhinia. 38Ka takusï k'uék'uetsasï enka tiósïo arhunhempka, teruk'ani karupakurhispti. 39Ka p'urhek'uticheri urhets'ïkuri, Roma anapu, enka jima jápka, exespti na enka Jesusi uarhipka, ka uantaspti:
–Sési jimpo, i acheti Diósï Uáp'espti.
40Ka jima no iauanksï eraaxapti Maria Magdalena, ka Salome, ka Maria, Joseri amampa ka Santiagu sapichueri amampa, máteru uarhiticha jinkuni, 41enkaksï Galilea uératintki pámpetapuni ka jarhuatapuni jápka Jesusini. Ka ístu máteru uarhiticha enkaksï Jerusaleni kúnkorhepka.
Jesusiri jatsintskua
(Mt 27.57-61; Lk 23.50-56; Jn 19.38-42)
42Xatinisptia ka t'irekua tánakuespti jimpoka pauantekua sábadu jurhiatekuespka, enka judiouecha mintsikorhek'a, 43Jose Arimatea anapu ts'iuentaspti ka niraspti antarherani Pilatuni ka sésikua kurhakuspti késkuntani Jesusini. Joset'u k'éri tánkorhentskuarhu jámasïrempti, ka Diósïri irekuani erokorhexapti. 44Ka Pilatu, no jakak'usïrempti eska Jesusi uarhispkia, jimposï p'urhek'uti urhets'ïkurini ióarhipti ka kurhamarhespti, na jatini uarhispi. 45Enka p'urhek'uti urhets'ïkuri aiankupkia, Pilatu íntspespti sésikua eska intsïnhantapirinka Jesusini. 46Ka Jose késkuntasptia Jesusini, ka takusï pitsïpiti ma jimpo irhispti, enka piápka, ka p'orhotarhu ma jatsintaspti, jima enka jarhanharhitarkorhepka, ka tsakapu jimpo ómutaspti. 47Maria Magdalena, ka Maria Joseri amampaksï, exexapti nani enkaksï jatsintani jápka Jesusini.
Biblia en P´urhépecha, Michoacán, México © Sociedad Bíblica de México, A.C.
