Sáni Markusï 12
12
Uantantskua tarhericheri enkaksï nósesi jásï mintsita jatapka
(Mt 21.33-46; Lk 20.9-19)
1Jesusi uénaspti terukutantskuechani jimpo arhits'ïkuani, ka arhiaspti: “Acheti ma úba ikaraspti, ka uatsotaspti; ka kuákua ma úspti jima enka úba tsitaranhapirinka, ka iótati ma kuaritarakua úspti enka úempka iápuru isï erap'atarani, tátsekua tarherichani máru kuánetaaspti echerini enka úba ikarakata jápka, ka uéakuspti. 2Ka enka na niárapka jurhiata, imeri jántspirini ma axaspti tarherichani antakua kurhakuantaani. 3Ka imaksï jupikaspti, ka atasptiksï, ka ískuksï axantaspti. 4Ka acheti úba ikarati máteru jántspirini axaspti, ka inteniksï arhats'ïkuspti, ka nósesi arhisptiksï. 5Máteru axaspti, ka inteniksï ataspti uántikuni. Tátsekua Uánekuateru axaaspti; máruksï ísku ataaspti, ka máruksï ataaspti uántikuani.”
6“Máterkuni nótki axaxapti: Uáp'ani, enka ima xáni xénhchempka. Ka k'amarani jámani imani axaspti, ísï eratseparini: ‘Jucheti uátsïni k'óruksï janhanharhiati.’ 7Ka tarherichaksï arhip'eraspti: ‘Iámentu ampe i jurak'umenhaati; ju je uántikuni ka iámu ampechi jucha mínkorheaka.’ 8Ka ísï jámani, jupikasptiksï, ka uántikusptiksï, ka k'uanitamantasptiksï.”
9“¿Cha néna arhik'i eska jámaaka ima acheti enka úba ikaratika? Niántatini tarherichani atauati uántikuani, ka echerini enka úba ikarakata jaka máteruechani íntsauati.”
10“¿Anti nóts'ï méni arhitaski karakatani? Jima enka arhik'a:
‘Ima tsakapu enkaksï k'umanchekua úricha no jaiapanhentaka,
iásï tsumpintikua kasïperakuarhu jatsikunhastia.
11Ka íni ampe Diósï ísï ústi,
ka ísku pakareratixakachi.’ ”
12Jimak'aniksï Jesusini jupikani uékaspti, jimpokaksï p'íkukorhetaspka eska imechanisï arhiani jápka. Ka nóksï tekaaspti jimpokaksï chérhpespka, ískuksï jarharent'asptiksï ka níntaniksï.
Tumina Roma axakueri kurhamarhperakua
(Mt 22.15-22; Lk 20.20-26)
13Tátsekuaksï Jesusini máru fariseuechani axakuaspti ka erodesiri eratsekua chúnkumatichani, uantakua p'itachakuniksï uékani enkaksï jimpo úpirinka k'amanharhirantani. 14Ka niáratinksï arhispti:
–Jurhentpiri, míteskachi eskari imani ampe uantasïnka enka ísïka, náuek'iri ménterueni uantamenhantani, jimpokari t'u nónemani sési pakarakuxamka. T'úri sési jimpo jurhentpesïnka Diósïri xanhari. Ka arhits'ïni sáni: ¿Sési jarhaski eskani jucha maiampeaka enkats'ïni Roma anapu juramuticha kurhachek'a? ¿Íntspeachi ochi ua no íntspeni?
15Jesusi p'ikuarhetsespti imecheri uantakuechani eskaksï ískusï ísï arhini jápka, eskaksï ts'ék'unisï uékempka, ka arhiaspti:
–¿Antits'ïnisï ts'ék'uni uék'i? Exerats'ïni je ma taiakata.
16Íntskusptiksï ma, ka Jesusi kurhamarheaspti:
–¿Nésï ixu jukanhari ka nériski i karakata enka ixu jukanharhika?
Ka arhisptiksï:
–Sésariri.
17Ka Jesusi arhiaspti:
–Sésarini íntsku je, ampe enka Sésaririka; ka Diósïni íntsku je, ampe enka Diósïrika.
Imaksï ísku pakareraspti enkaksï ísï arhinhapka.
Tsíntskueri kurhamarhperakua
(Mt 22.23-33; Lk 20.27-40)
18Tátsekuaksï Jesusini saduseuecha máru antarheraspti, enkaksï ima enkaksï uantak'a eskaksï uarhiricha no tsíntasïnka ka arhisptiksï:
19–Jurhentpiri, Moisesits'ïni karakata jimpo jurhenkaua jurak'uchcesti, enka arhik'a eska enka acheti ma uarhiaka ka témpani nóma uáp'ani jurak'ukuni, eska erachi jémpa jatsiaka uarhiti tsîntini tempuntani, ka erachi jémpani sïrukua jurak'ukuni. 20Ka jarhasptiksï ma xanhari, iúmu tsimani erachicha, ka ima enka urhetipka tempuchaspti, ka uarhispti ka nóma uáp'ani jurak'uni. 21Ka uarhiriri erachi enka chúxapempka tempuntaspti uarhiti tsîntini ka imat'u uarhispti ka no ma uáp'ani jurak'ukuni. Ka méntkueni jámaspti tanimu úni jámani, 22ka méntkueniksï k'amantespti iúmu tsimani erachicha; ka nónema sapini jurak'uspti. Ísï tátsekua uarhitit'u uarhispti. 23Ka néna jámaia tsíntskuarhu, ¿Anti ima uarhiti néri tempentaia enkaksï iúmu tsimani erachicha tempupka?
24Ka Jesusi arhiaspti:
–Támisïts'ï uantant'a'xaka, nóts'ï sési arhitaska ka Diósïri juramukuantuts'ï nósesi míteska. 25Enkaksï uarhiricha tsíntaaka, nóteru tempuchanhaatia, jimpoka Diósïri ánjelini járhanhantaaka, enkaksï auantarhu jaka. 26Ka inte uarhiricheri tsíntskueri ampe, ¿Anti nóts'ï méni arhintaski Moisesiri karakatarhu? Enka tsïtunirhu Diósï arhipka: Ji Abraaniri, ka Isaakiri, ka Jakobueri Diósïska. 27Ima tsípiticheri Diósïsti, no uarhiricheri. Cháts'ï kánekua támu ísï jámaxaka.
Juramukua enka sánteru jukaparhaka
(Mt 22.34-40)
28Ka juramukua jurhentpiri ma jima antarheraspti enka kurhach'aapka ka kurhankuntani eska Jesusi sési arhiaspka, ka Jesusini kurhamarhespti:
–Iámentu juramukuecha jinkuni ¿Náki sánteru k'ériski?
29Ka Jesusi arhispti:
–Aristi sánteru k'éri: Kurha Israeli: Juchari Acha Diósï, mák'u Achesti; 30chéti Acha Diósïni mintsita jinkuni xénhcha, jánkua jinkuni, eratsekua jinkuni ka iámentu chéti uinhapekua jinkuni xénhcha. 31Ka máteru jarhasti enka arhik'a: Máteruni ísï xénhcha eskari t'u na xénhchakorhek'a. Ka nóteru ma juramukua jarhasti enka sánteru k'érika.
32Ka ima juramukua jurhentpiri arhispti:
–Sésiri uantaska jurhentpiri, ísïsti eskari na uantak'a: Eska mák'ueska Diósï, ka eska nóteru ma jarhaska. 33Ka eska uétarhesïnka Diósïni mintsita jinkuni xénhchani ka eratsekua jinkuni ka iámentu uinhapekua jinkuni xénhchani; ka eskari máteru nemani ísï xénhchaaka eskari na xénhchakorhek'a, inte ampe sánteru jukaparhakuesti eska kéts'ïtakua ampe ka eska ima ampe enka Diósïni aiakuparini kurhiranhak'a.
34Enka Jesusi exepka eska juramukua jurhentpiri sési eratsentaparini mókukuspka, arhispti:
–Antarheraxakari Diósïri juramukuani.
Ka nóteru nema tekaaspti sánteru ampe kurhamarheni.
¿Néri sïrukueski Krístu?
(Mt 22.41-46; Lk 20.41-44)
35Enka Jesusi tiósïo jurhentpeni jápka, arisï kurhamarhpespti:
–¿Antiksïsï juramukua jurhentpiricha uantak'i eska Krístu Dabidiri sïrukueska? 36Ka Dabidintu Espiritu Sántu ísï uantaraspti:
Acha arhispti jucheti Tatani:
Axu t'irerkantani uaxaka,
enkakini jamperi chéti ikiatspirichani
jatantutarantauaka.
37¿Nénat'u Dabidi uáp'eua? ¿Nák'i Dabidit'u Táte erataparini uantap'ak'i anti?
Jesusi juramukua jurhentpirichani uantakuantasti
(Mt 23.1-36; Lk 11.37-54; 20.45-47)
Uánekuaksï tsípekua jinkuni kurhach'axapti Jesusini. 38Ka Jesusi jurhentpeparini uantasïrempti: “Xéparini je juramukua jurhentpirichani jinkuni, jimpokaksï takusï iórhati ampe xukuparhanchasïnka, ka uéksïntiksï eskaksï kópekuarhu isï sési uantap'anhaaka. 39Tánkorhekuecharhu ka jimesï enka t'irekua ampe jauaka, jánkorhesïntiksï k'érikuarhu uaxakani; 40ka uarhiti tsîntichanksï iámentu ampe euakorheasïnti, ka nónentanksï uékantku ióni uantatsekorhesïnti. Imaksï sánteru maiampetaranhantaati.”
Uarhiti tsîntiri tumina jatsirakata
(Lk 21.1-4)
41Tátsekua Jesusi jima erankurhini uaxakaspti enka tumina jatsirakua jápka, ka jima uératini exexapti na enka xáni tumina jatsiranhempka, ka jatsikorherichaksï uánhachani jatsirsïrempti. 42Ka uarhiti tsînti nómpe jatsikorheri ma niáraspti, ka tsimani sapirhati taiakatak'u jatsiraspti, enka no káni jukaparhakuepka. 43Jesusi ióarhiaspti imeri jurhenkorherichani, ka arhiaspti:
–Sési jimpoksïni arhixaka eska inte uarhiti tsînti, nánti no jatsikorhe, eska inte sánteru kánekua tumina jatsiraska eska iámentu imecha enkaksï uánhachani jatsiraka; 44jimpokaksï iámentuecha pakak'ukatak'usï jatsiraka, ka inte uarhiti no jatsikorheri iámu jatsirasti enka nitamakorhetarapirinka.
Biblia en P´urhépecha, Michoacán, México © Sociedad Bíblica de México, A.C.
