Sáni Mateo 5
5
III. JUÁTARHU ANAPU ARHITS'ÏKPERAKUA
(5.1—7.29)
Jesusi juátarhu arhits'ïkpesti
(5.1—7.29)
1Xáni uáni exep'etini, Jesusi juátarhu ma karhamaspti ka jima uaxakaspti, jimak'anksï jurhenkorheri jémpecha antarheraspti, 2ka ima uénaspti uantani ka jurhentaasïrempti arhiaparini:
Ampe enka Diósïni jimpo jukaparhakueka
(Lk 6.20-23)
3“Tsípeksï ima enkaksï nómpe ma jimpo
k'éramakorhek'a,
jimpoka auantarhu anapu irechekua imecheriska”
4“Tsípeksï ima enkaksï uerani jaka,
jimpokaksï sési arhinhantaaka.”
5“Tsípeksï kaxumpiticha,
jimpokaksï echeri aiakatani ima intsïnhaaka”.
6“Tsípeksï ima enkaksï uékani jaka
eska úkorheaka eska Diósï na uék'a,
jimpokaksï úmenhaaka ampe enkaksï uékani jaka.”
7“Tsípeksï p'amop'iticha,
jimpokaksï p'amok'unhantaaka.”
8“Tsípeksï ampakiti mintsita jataricha,
jimpokaksï Diósïni exeaka.”
9“Tsípeksï ima enkaksï sési páp'erakua ampe úni jámka,
jimpokaksï Diósï uáp'a arhiauaka.”
10“Tsípeksï ima enkaksï sési ampe úrini,
útasï atanhani kánhka,
jimpoka auantarhu anapu irechekua imecheriska.”
11“Tsípe je cha enkaksïni jínteni jimpo útacheaka
ka atakuekanksïni ka mámaru ampeksïni
nósesi jásï ampe chkuántiraparini arhiparhatani.”
12Kánekua tsípe je, ka sési p'ikuarhera je,
jimpoka auantarhu chári antakua káneska;
nóchkaksï Diósïri uantari tua anapuechani
mák'ueni ataaspi anti.
Etukua ka ampakiti t'íntskua
(Mk 9.50; Lk 14.34-35)
13“Cháts'ï parhakpeni anapu etukueska, ka enka etukua nóteru etumarhaaka, ¿Ampeteru úni marhuasïnki? Nóteru marhuapirinti, xanharuterku k'uanitamanhasïnti ka jima t'auach'akunhasïnti.”
14“Cháts'ï íni parhakpeni anapu erak'utakueska; k'éri ireta ma enka juátarhu karhakua jarhak'a no úsïnti no xarharani. 15Ka erak'utakua mát'u no étskunhasïnti ka purhechirhu ma kápchakuranhani, erak'utakua ch'urhinkuarhusï péranhat'i eska erak'utauaka iámentuechani enkaksï k'umanchekuarhu jarhak'a. 16Mák'ueni t'íntskare chári t'íntskua uánekuechani japarini, eskaksïni chánksïni sési ampe úni exerini, chári Táteni enka auantarhu jaka k'éri ampe arhiaka.”
Juramukueri ampe jurhentperakua
17“Ásï ísï eratse je eskani ji jurhaska Diósïri uantarichani ka Diósïri juramukuechani k'amak'uani, no k'amak'uanisïni juka, marhuataanisï juka. 18Jimpokaksïni sési jimpo arhixaka eskaksï parhakpeni ka auanta nótki k'amakurhini jauaka, ka iámentu ampe kurhadiranhaati eskamentu juramukuarhu na karakata jaka, ka iámu ampe ísï úkorheati. 19Ísï jimpo nákinterku nema enka juramukuechani no kurhach'auaka náuek'i sánteru sapichu méni, ka ísï jurhentpeni, auantarhu anapu irechekuarhu kánekua sapichu arhinhaati; k'óru ima enka ísï úaka ka ísï jurhentpeni, auantarhu anapu irechekuarhu k'éri arhinhaati.”
Jesusi jurhentpesti ampe enka Diósï sánteru uék'a
20“Ísï jimpoksïnisï arhini jaka, ekats'ï cha no sánteru sési jámaska eskaksï fariseuecha ka eskaksï juramukua jurhentpiricha, eska Diósï na uék'a, nóts'ï inchaaka Diósïri irechekuarhu.”
Jesusi uantikperakueri ampe arhip'esti
(Lk 12.57-59)
21“Cháts'ï kurhaskia ampe enkaksï tua anapuecha arhinhaka: ‘Ásï uántikpe, ka nákinterku nema enka uántikpeska, k'amanharhiranhant'aati.’ 22K'óruksïni ji arhixaka: Ima enka erachi jémpani ikiakuaka, inteni jimpo k'amanharhiranhant'aati, ka ima enka erachi jémpani útakuaka, k'éri tánkorhekuarhu k'amanharhiranhant'aati, ka ima enka kánekuamentu nósesi útakuaka erachi jémpani, chpírirhu k'uanip'anhaati.”
23“Ísï jimpo, ekari kéts'ïtani jámani jima míantaska eskats'ï erachi jinkuni arhirperatixaka, 24parhantikuani kéts'ïtakuarhu urhepani jurak'u, ka ni urheta chéti erachi jinkuni sési arhip'erantani ka xásïri k'uanhatsentaaka parhantikua kéts'ïtani.”
25“Sóntku teruatperantsï je ne enkats'ï jinkuni arhirperatini jaka, enkakini ima nótki útatsperakuarhu p'itak'orheni jauaka, ásïkini ima útatspirini intsïnharhite, ka útatspirikini ónhpirini, ka ónhpirikini k'ataperakuarhu incharani. 26Sési jimpokini arhixaka eskari no uéraaka ekari no urheta iámu maiampentaska.”
Jesusi ísku jántikueri ampe arhip'esti
27“Cháts'ï kurhaska eska uantakata jarhaska: ‘Nóri jámaaka ísku jántini.’ 28Ka jíksïni arhisïnka eska ima enka iurhitskirini ma atamarheaka, eska ima mintsitarhu ísku jánti úkorheskia, imani iurhitskirini jimpo.”
29“Ísï jimpo, ekakini éskua jurhik'antani anapu terunkutaraska, p'itanharhi ka k'uaniku, sánteru sésisti eskari ma ampe tsîtaaka ka nóri infiernurhu iámu k'uanip'anhani. 30Ka ekakini ják'i jurhik'antani terunkutaraska, kachuk'u ka k'uaniku, sánteruchka sésisti eskari ma ampek'u tsîtaaka ka nóri infiernurhu iámu k'uanip'anhani.”
Jesusi jurap'erakueri ampe arhip'esti
(Mt 19.9; Mk 10.11-12; Lk 16.18)
31“Ka ístu uantakata jarhasti: ‘Ne enka témpani nóteru xénhchaaka, úati karakata úkuni enka arhiaka eska jurak'uxaka.’ 32Ka jíksïni arhisïnka eska ne enka témpani ikimchaaka, ka no uarhitiri ísku jántikua jimpoeni, ísku jánti úxati, ka ima enka uarhiti jurak'ukatani tempuntaaka ísku jántixati.”
Diósïni aiakuni
33“Ka kurharixakat'uts'ï ampe enkaksï tua anapuecha arhinhaka: ‘Ásï jáma ísku uénani uantani ka tátsekuari no ísï úni, sési k'amata úni ampe enkari Diósïni aiakuka.’ 34Ka jíksïni arhisïnka: Ásï méni jáma je auantani jimpo ampe ma aiatspeni, jimpoka Diósïri uaxantskua jima jarhaska; 35ót'u parhakpeni jimpo, jimpoka Diósïri jatantukueska, ót'u Jerusaleni jimpo, jimpoka ima ireta k'éri irecheriska. 36Ka ástu jáma chéti ép'u jimpo ampe ts'ïrimerakuekani, jimpokari no jamperi úsïnka ma jauiri t'uputs'ïkorheni ori turhiptsïkorheni. 37Ma ampek'u uétarhesïnti eskats'ï uantaaka ‘Jo’ o ‘Nómpe’ jimpoka nóampakitiriska ekats'ï jukari uantaaka.”
Jesusi atap'erantskueri ampe arhip'esti
(Lk 6.29-30)
38“Kurhariskats'ï ampe enka uantanhaka: ‘Enkakini nema éskua atacheaka, t'út'u éskua atakuntsï ka enkakini nema sînichani etsaaskacheaska, t'út'u etsaaskakuantsï.’ 39Ka jíksïni arhisïnka: Ásï jáma je anhatsekuni imani enka nóampakeka; ekakini nema jurhik'antani páksanharhikuska, máteru akantantukini páksanharhikue. 40Ekakini nema útatsperakuarhu p'itak'orheska ka xukuparhakuakini euakorheni, chereparhakuat'u íntsku. 41Ka ekakini nema ampe sáni párakuekaska, iauani jamperi jarhuata páni. 42Íntskuakari imani enkakini ampe kurhacheaka, ka ásï jáma no jiák'utani ne enkakini ampe kuáneni uékaaka.”
Xénhchaa imechani enkaksïni kurhunhek'a
(Lk 6.27-28,32-36)
43“Ístuts'ï kurhaaska ampe enka uantanhaka: ‘Chák'u xénhchpera je ka kurhunhea je imechani enkaksï ikiach'ek'a.’ 44K'óruksïni ji arhixaka: Xénhchaa imechani enkaksïni kurhunhek'a ka kómu arhip'ekua je imechani enkaksïni k'amarhentka útacheni. 45Ísïts'ï chári Táte uáp'euaka enka auantarhu jaka, enka imeri tata jurhiata jimpo no amparhatichani ka kaxumpitichani t'íntskakuak'a ka janirakuani. 46Ekats'ï cha imechantku xénhchaaska enkaksïni chánksïni xénhchak'a, ¿Ampets'ï antaa? ¿Anti nóksï mák'ueni jámasïnki tumina tánaticha? 47Ka ekats'ï cha, chári erachichantku uantap'aska, ¿Ampets'ï jukari sési ampe úxaki? ¿Nóksï no jakak'uticha jamperi ísï jámasïnki? 48Cháchka k'amak'amasï sési ampe u je, ísï eska chári Táte enka auantarhu jaka enka k'amak'amasï sési ampe úk'a.”
Biblia en P´urhépecha, Michoacán, México © Sociedad Bíblica de México, A.C.
