ROM 9
9
इस्राएल इचांग परमेश्वरदी योजना — 9:1—11:36
इस्राएल मंदी अविश्वास बद्दल पौलदी दुख
1निन ख्रिस्तला खरेम शपतान, निन खोटा माटलाडान इंगा नाद विवेक पवित्र आत्माला, साक्ष इस्ताद 2की, ना मंदी इचांग नाक शेंगेम दु:ख आयतुनाद इंगा ना मनला नेहमी निलचेद त्रास उंडाद. 3येनटीक की शारीरिक रुपता यवार ना गोनगोत लोन्टोर उंडार आ ना यहुदी आक्का तम्मुळ्ळा इचांग निन स्वता ख्रिस्त तीकेल शापित कावाला इल्ला निन इच्छा शेस्तान. 4वार इस्राएल मंदी उंडार; वार इचांग दत्तकपणदी हक्क, आदर, करार, नियमशास्त्र, उपासना इंगा अभिवचनलु उंडाय. 5पुर्वजलु पण वारके उंडार; इंगा वार दिंटल्योन्केले ख्रिस्त वच्या; इंगा आंदार काना फैना उंडेतोड परमेश्वर उंडाड, यवाड युगानयुग धन्य उंडाड; आमेन.
परमेश्वरदी योजना
6पण परमेश्वरदी वचन व्यर्थ आय्या इल्ला लेद; येनटीक की यवार इस्राएलटोर उंडार वार आंदार इस्राएल मंदी लेर, 7इंगा वार अब्राहाम वंशला फुट्टीर आंका आंदार वान बिळ्ळु उंडार इल्ला लेद; पण परमेश्वर अब्राहामनी आनीन्या की, “यवार इसहाक वंशला फुट्ट्यार वारने नी बिळ्ळु आन्यार.”#इब्री 11:18. 8आंटे शरीरता आय्यीने बिळ्ळु इर परमेश्वर बिळ्ळु लेर, पण परमेश्वर अभिवचन इच्चीने बिळ्ळान अब्राहामदी वंश आंका कोल्चेदेंक वस्ताद. 9येनटीक की अभिवचनदी वचन इल्ला उंडाद की, “मुंदार याडाद निन इद्दे वेळला वच्यान इंगा आप्पुड सारा दानकी वगा मोगाबिडा फुट्टी.” 10इंगा इंते लेद; इंगा यवान वगान तीकेल, आंटे मना पुर्वज इसहाक तीकेल रिबकाद रंजलमनशी उंडीनाप्पुड, 11-12इंगा इयाड नंताक इंगा बिळ्ळु फुट्टा लेकुंडीर इंगा वार येमीच शिंगार लेकाते वाईट शेया लेकुंडीर, पण “परमेश्वर पहिलाने रिबका दानकी शप्पीन्या की फेद्दा कोडकु शिन्ना कोडकुद सेवा शेशी,” दिनिचांग की परमेश्वरदी निवड वान इच्छा मिंदा आधारित उंडाद, मंदी शिंगार फनुला मिंदा लेद. 13येनटीक की पवित्र शास्त्रला इल्ला राशीनेद उंडाद की, “याकोब मिंदा निन प्रेम शेस्तीन पण एसावदी कोफाम शेस्तीन.”#मलाखी 1:2-3.
परमेश्वर अन्यायी लेड
14मंग मनाम येम आनाला? परमेश्वर अन्यायी उंडाड येम? अजिबात लेद. 15येनटीक की परमेश्वर मोशेन आंटाड, “निन यवार मिंदा दया शेस्तान वान मिंदा दया शेशान इंगा यवान मिंदा उपकार शेस्तान वान मिंदा उपकार शेशान.”#निर्गम 33:19. 16तर परमेश्वर आ मनशीन निवडास्ताड यवार मिंदा वानकी दया शेशेद उंटाद, वानदी पसंद मंदी इच्छा लेकाते प्रयत्नला मिंदा टीकाशी लेद. 17आंका पवित्र शास्त्रला परमेश्वर फारोन आन्या, “निन निन्नु दिनिचांग राजा शेस्तीन की, नी तीकेल निन नाद सामर्थ्य प्रकट शेयाला इंगा आंता पृथ्वी मिंदुड मंदीला ना फेरदी घोषणा शेशेदेंक दावाला.”#निर्गम 9:16. 18तर मंग परमेश्वरकी यवार मिंदा वानकी वाटास्ताद वान मिंदा वाड दया शेस्ताड इंगा वानकी वाटास्ताद वान वाड कठोर शेस्ताड.
परमेश्वर सर्वाधीपती
19मी दिंटल्योन्केल काही मंदी नन्नु आन्यार, मंग परमेश्वर येनटीक दोष आंचताड? येनटीक की वान इच्छाक यवारुच विरोध शेशी शकायार. 20पण उलटा हे आक्का तम्मुळ्ळालाला, परमेश्वर विरुद्ध माटलाडेतोर मीर उंडार यवार? वगाट बनाशीनेद वस्तु बनाय मतेतोन यल्ला आडगी की, नु नन्नु इल्ला येनटीक बनायमत्ती? 21कुंभारोनकी वक्का मन्नु गोळाता वगा बतकु महत्वपुर्ण उद्देश इचांग तर इंगोगोट साधारण उद्देश इचांग बनाय मतेदेंक मन्नु मिंदा अधिकार लेद येम? 22मंग परमेश्वर वानदी कोफाम सुपीयाला इंगा वानदी सामर्थ्य प्रकट शेयाला इल्ला जर परमेश्वरदी इच्छा उंटे, तरी वाड नाश आय्येदेंक बनाय मतीने बतकुल सहनशीलताता सांभाळीच्ची फेट्टीनाड, 23इंगा परमेश्वर इल्ला दिनिचांग शेशा की आ बतकुला मिंदा, आंटे मंदी मिंदा दया शेशी वानदी शक्ती सुपीयाला, यवारनी वाड पहिलाने आदर इच्चेदेंक बनाय मतीन्या. 24वाड यवारनी फक्त यहुदी मंदी लोन्केले लेद, पण यहुदी लेनोर मंदी लोन्केल पण फिल्चीनाड आदी मनाम आ दया इचांग पात्र उंडाम.
25येनटीक की परमेश्वर होशेय संदेष्ट्यान पुस्तकला इल्ला आंटाड की,
“यवार ना मंदी लेकुंडीर वारनी निन ना मंदी आन्यान,
इंगा याद नाक प्रिय लेकुंड्या, दान निन ना प्रिय आन्यान.#होशेय 2:23.
26इंगा इल्ला आय्यी की वारनी या जागाला, मीर ना प्रजा लेर, इल्ला आनीन्टीर,
आंदु वारनी जित्ता परमेश्वर बिळ्ळु आन्यार.”
27यशया संदेष्ट्याड पण इस्राएल बद्दल कीरली आंटाड की, “इस्राएल कोडकुलाद संख्या जरी समुद्र रेतीलेका आयते, तरी काही मंदीने बतका मतेदेंक वच्ची.#यशया 10:22. 28येनटीक की प्रभुड वानदी वचन पृथ्वी मिंदा पुर्ण शेशी, नितीमत्वता दान लग्गान सिद्ध शेशी.” 29इंगा यशया संदेष्ट्याड पहिला शप्पीनेलेका,
सैन्यतोड प्रभुड जर मना इचांग बीज फेटा लेकुंटे तर
मनाम सदोमलेका उंटुटीम इंगा गमोरालेका आयतुंटीम.#यशया 1:9.
नितीमत्व शिक्काद दिनदी कारण
30मंग मनाम येम आनाला? इदी की यहुदी लेनोर यवार नितीमत्व फुडका कुंदुर, वारकी नितीमत्व शिक्कीनाद आंटे आदी नितीमत्व याद विश्वासता शिक्ताद. 31पण इस्राएल मंदी नितीमान ठरायदेंक नियमशास्त्र पाळाशीर, पण पुर्णपणे पाळाशी शकायाक फोईर आंका वार नितीमान ठरायाक फोईर. 32मंग निन आडगुतान येनटीक नितीमान ठरायाक फोईर? येनटीक की वार विश्वासता लेद, पण फनुलाता परमेश्वरनी फुडकुदुर; वारकी तटराय तगले रायता तटराय तगल्या. 33इंगा पवित्र शास्त्रला इल्ला राशीनेद उंडाद की,
“सुडना, निन सियोनला वगाट अडखळनदी गुंडु, इंगा वगाट तटराय तगलेद राय फेटतान.
इंगा यवाड पण वान मिंदा विश्वास फेटताड वाड शिग्गुना फडाक फोई.”#यशया 28:16.
