ROM 5
5
परमेश्वर जताक समेट
1इप्पुड मनाम विश्वासता नितीमान ठराशीनाम आंका मना प्रभु येशु ख्रिस्तन तीकेल मनाद परमेश्वर जताक समेट आयनाद. 2मनाम नीला फडीनाम आ कृपाला पण ख्रिस्त तीकेल मनाक विश्वासता प्रवेश शिक्कीनाद इंगा मनाम परमेश्वर तीकेल आदर शिक्के आशाला आनंद शेस्ताम.
3इंगा इंते लेद तर मनाम संकटला पण आनंद शेस्ताम; येनटीक की मनाक यरका उंडाद की संकट धीर्याम उत्पन्न शेस्ताद, 4इंगा धीर्याम चरित्र इंगा चरित्रता आशा उत्पन्न आयताद. 5इंगा आशाता शिग्गु काद; येनटीक की मना मनला मनाक इच्चीने पवित्र आत्मा तीकेल परमेश्वरदी प्रेम येशीनेद उंडाद.
परमेश्वरदी प्रेम
6येनटीक की यप्पुड मनाम स्वताद तारण शेशी शकायाक उंटीम आप्पुड परमेश्वर निवडाशीने वेळला ख्रिस्त मनालेका पापी मंदी इचांग सच्ची फोया. 7येनटीक की यादाना नितीमान मनशी इचांग कदाचित यवाडाना स्वताद जेम इच्ची, येनटीक की वगा शिंगार मनशी इचांग कदाचित यवाडाना सच्चेद हिंमत शेशी, 8परमेश्वर मना मिंदुडदी वानदी प्रेम इल्ला सुपीच्या की, मनाम यप्पुड पापी उंटीम आप्पुड ख्रिस्त मना इचांग सच्ची फोया.#योहान 15:13; १योहान 4:10; गलती 2:20. 9मंग मनाम इप्पुड ख्रिस्त रक्तामता नितीमान ठराय मतेदेंक वच्चीनाम, तर दान काना जास्त इदी उंडाद की वान तीकेल मनाम परमेश्वर कोफामकेल नक्की बतक्याम. 10येनटीक की यप्पुड मनाम परमेश्वर शत्रुल उंटीम, आप्पुड जर मनाद परमेश्वर जताक, वान कोडकु सावता समेट आय्या, तर दान काना जास्त इदी उंडाद की, मनाद समेट आयने इचांग वान जीवनता मनाक नक्की तारण शिक्की. 11इंते लेद, पण इप्पुड यवान तीकेल मनाद समेट आयनाद आ मना प्रभु येशु ख्रिस्तन तीकेल मनाम परमेश्वरला आनंद शेस्ताम.
आदामला साव, ख्रिस्तला जीवन
12दिनिचांग वगा मनशी आदाम तीकेल दुन्यामलोंग पाप वच्या इंगा पापता साव वच्या इंगा इल्ले आंता मंदी पाप शेशीर आंका आंदार सच्ची फोईर. 13नियमशास्त्र दावा काना मुंची दुन्यामला पाप उंड्या, पण यंदु नियमशास्त्र लेद आंदु पाप कोल्चे दिंटल्या दाद. 14तरी आदाम केल तर मोशेन नंताक यवारुच आ आदाम लेका पाप शेयालेद यवाड वच्चेतोन चिन्ह उंड्या, तरी वार आंदार सच्ची फोईर. 15पण आदामदी पाप आ वरदान लेका लेद याद परमेश्वर मनाक वान कृपाता इस्ताड; येनटीक की वगान पाप इचांग जर आंता मंदी सच्ची फोईर, तर दान काना जास्त इदी उंडाद की, परमेश्वरदी कृपा इंगा वगा मनशीद कृपा आंटे येशु ख्रिस्तद कृपा शेंगेम मंदी इचांग शेंगेम आय्या. 16इंगा पाप शेशेतोन वगान इचांग यल्ला परिणाम आय्या, आल्ला कृपादानदी परिणाम लेद; येनटीक की वगा पाप इचांग दंडद आज्ञा आय्या, पण शेंगेम पापला इचांग इल्ला वरदान शिक्या की आंदार निर्दोष ठराशीर. 17येनटीक की यप्पुड वगा मनशी पाप इचांग, आंदार पाप शेशीर इंगा सच्ची फोईर, तर दान काना जास्त इदी उंडाद की, या मंदीक कृपा इंगा नितीमत्वय वरदानलु शेंगेम शिक्ताय, वारकी वगा मनशी, आंटे येशु ख्रिस्तन तीकेल सार्वकालिक जीवन शिक्की. 18दिनिचांग यल्ला वगा पाप इचांग आंता मंदीक दंडाज्ञा उंड्या, आल्ले वगा निर्दोष मनशी इचांग आंता मंदीक जीवन इचांग नितीमान ठराय मतेदेंक कारण आय्या. 19येनटीक की यल्ला वगा मनशी आज्ञा तेंप्या आंका शेंगेम मंदी पापी ठराशीर, आल्ले वगान आज्ञापालन इचांग शेंगेम मंदीन नितीमान ठराय मतेदेंक वच्ची. 20परमेश्वर नियमशास्त्र दिनिचांग इच्चीन्या की आंदारकी कमसाला की वार यंता पापी उंडार, पण यल्ला-यल्ला मंदीद पाप वाढाशा, परमेश्वरदी कृपादान काना जास्त आय्या. 21यल्ला आंदार पाप शेशीर इंगा सच्ची फोईर आल्ले मना प्रभु येशु ख्रिस्तन तीकेल परमेश्वरदी कृपा मनालनी नितीमान ठरायमती सार्वकालिक जीवन इस्ताद.
