ACT 24
24
फेलिक्स मुंदार पौल
1आय्यीद नाळ आयनेंका महायाजक हनन्याड, काही आब्बागार इंगा तीर्तुल्ल फेरोन यादो तरी वगा वकीलनी किंदीक यकोच्या; इंगा वार सुभेदार मुंदार पौल विरुद्ध दोष आंचीर. 2यप्पुड पौल सुभेदार मुंदार नीला फड्या आप्पुड तीर्तुल्ल वान मिंदा दोष आंची आन्या, “फेलिक्स महाराज, नी इचांग माक शेंगेम शांती शिक्कीनाद इंगा नी दुरदृष्टी इचांग इ राष्ट्रला सुधार आयतुनाद. 3दिनिचांग मिम इ माटाद कृत्यज्ञताता, आन्नी प्रकारलाता इंगा आन्नी तीकुड स्वागत शेस्ताम. 4तरी नीद जास्त वेळ तिस्कुनांदे निन निक विनंती शेस्तान की, कृपा शेशी माय वगाट रोंड माटलु इन. 5इ मनशी आंटे त्रासदायक उंडाड इल्ला माक कमशा इंगा दुन्यामलोन आंता यहुदी मंदीला इड आंदोलन शेस्का तिरगुताड इंगा इड नासोरी पंथोड पुढारी उंडाड. 6इड परमेश्वरदी भवन पण अपवित्र शेशेद प्रयत्न शेशा; वान मिम फटतीम; इंगा मा नियमशास्त्र लेका इनदी न्याय शेशेदेंक मिम सुदुम. 7पण लुसिया सरदार वच्ची शेंगेम जबरदस्तीता इन मा शेतल्योन्केल इडपीच्ची येका फोया. 8इंगा इनदी चौकशी नु शेशाव तर या माटलाद दोष मिम वान मिंदा आंचीनाम आ आन्नी माटला बद्दल निक वान तीकेले तेल्ची.” 9इ आन्नी माटलु इल्ले उंडाय, इल्ला आनीगास बाकीचे यहुदी मंदी पण वानदी साथ इच्चीर. 10मंग सुभेदार यप्पुड पौलकी माटलाडेदेंक इशारा शेशा आप्पुड पौल उत्तर इच्या, “नु शेंगेम यंडलानोट इ मंदी न्यायाधीश उंडाव इदी नाक यरका उंडाद, दिनिचांग निन आनंदता नाद प्रत्युत्तर इस्तान. 11निक यरका उंडाद की, नाक यरुशलेम शहरकी उपासना शेशेदेंक फोई इंगाना बारा दिनमुला काना जास्त दिनमुल कालेव. 12इंगा परमेश्वर भवनला, सभास्थानला लेकाते नगरला यवार जताक जगडाम शेशेताप्पुड लेकाते मंदीन भडकाय मतेताप्पुड निन वारकी कमसा लेद. 13या माटलाद दोष वार ना मिंदा इप्पुड आंचतुनार, आय माटलु वारकी नी मुंदार सिद्ध शेय्यादाद. 14तरी निन नी देगार इंता कबुल शेस्तान की, या दावान वार पाखंड आंटार आ दावालेका निन ना पुर्वजला परमेश्वरदी निन सेवा शेस्तान. इंगा आ आन्नी माटला मिंदा विश्वास फेटतान याय नियमशास्त्रला इंगा संदेष्ट्याल पवित्र शास्त्रला राशीनार. 15इंगा नितीमान मंदीद इंगा अनितीमान मंदीद पुनरुत्थान आय्यी, इल्ला याद आशा इर फेटतार आद्दे आशा निन परमेश्वर तीकुड सुशी फेटतान.#दानिएल 12:2. 16दिनिचांग परमेश्वर मुंदार इंगा मंदी मुंदार नाद विवेक भाव नेहमी शुद्ध फेट्टेद निन प्रयत्न शेस्तान. 17निन शेंगेम यंडलु आयनेंका मना मंदीक दानधर्म शेशेदेंक इंगा यज्ञार्पणलु यक्पीचेदेंक वस्तीन. 18शुद्धीकरण विधीला निन व्रतस्थ इल्ला परमेश्वर भवनला कमस्तीन, ना जताक मंदीद घोळका लेकुंड्या लेकाते दंगा काकुंड्या; पण आंदु आशिया प्रांतलोन यंता तरी मंदी यहुदी उंडीर. 19वारदी ना विरुद्धला येमाना उंटे तर वार नी मुंदार वच्ची नाक दोष आंचतुनीर. 20लेकाते निन न्यायसभा मुंदार नीला फडीनेंका नाद याद अपराध इरकी कमशा आदी तरी इर शप्पाला; 21इ वगा माटान इडशी याद निन इर नडमा नीला फडी बेग्गे कीरली आनीन्टीन, सच्चीनोर पुनरुत्थान बद्दल नाद न्याय इबद मी मुंदार आयतुनाद.” 22फेलीक्सकी आ दावा बद्दल शिंगार यरका उंड्या आंका वाड वारनी इल्ला आनी थांबायमत्या की, “लुसिया सरदार वच्ची आप्पुड निन मी माटलाद निर्णय शेशान.” 23मंग वाड शताधीपतीक आज्ञा इच्या की, इनदी रखवाली शेयना; तरी इनकी मोकळीकता उंडाला इंगा वान मित्रला लोन्केल यवारनीच इनदी सेवा शेशेदेंक लेद आनाकुंडा. 24काही नाळ आयनेंका फेलिक्स वान यहुदी वडती द्रुसिल्लादान जताक आंदुक वच्या इंगा वाड पौलनी फिल्ची येशुन ख्रिस्तन मिंदुड विश्वास बद्दल वान तीकेल इनी तिस्कुन्या. 25आप्पुड नितीमत्व, इंद्रियदमन इंगा मुंदार आय्येद न्याय दीन बद्दल वाड भाषण शेशेताप्पुड, फेलिक्स यरस्कुन्या इंगा आन्या, “इप्पुड फो, संधी शिक्या आंटे निन निन्नु वापस फिलच्यान.” 26इंगा नाक पौल तीकेल दुडलु शिक्की इल्ला आशा पण वानकी उंड्या, आंका वाड वान फिल्ची-फिल्ची वान जताक माटलाडदु. 27मंग रोंड यंडलु आयनेंका फेलिक्स जागा मिंदा पुर्क्य फेस्त इड वच्या; आप्पुड यहुदी मंदीन खुश शेशे इच्छाता फेलिक्स पौलनी कैदलाने फेट्टी फोया.
