प्रेरित.कामी 8
8
1साऊल होः स्तेफनुस के गोगोएःग रे सहमत ताही नेनाय।
कलीसिया रे सतावन
हिना हिला जिरोसलेम रअः कलीसिया रे मुरुक बिपाईत हीःग एहेःब ना, तेकर प्रेरित के बाई केते, जामा से जामा जाहुदिया तेकर समारिया राईज रे छितीर-बितीर नाकु। 2थोड़ेक परमेसर आलकु भक्त, स्तेफनुस के दुख बिपाईत लोः तेपेःड लियाकु, आउर हुनी लःअय मुरुक ईयाम लअकु।
3 #
प्रे.कामी 22:4,5; 26:9–11 साऊल हिमीन बेरा कलीसिया के सताव कु केनाय, हुनी ओड़ाअ-ओड़ाअ सेन केते, हेरेलकु के, तेकर आउराईत बिसवासीकु के घस-घिड़रा ओर-ओर, जेहेल रे आदेर कु केनाय।
समारिया रे फिलिप्पुस आला परचार
4जे बिसवासी होड़कु छितीर-बितीर ताही नेनाकु, हुंकू बेस खभाईर के दांड़ा-दांड़ा सुनाय केनाकु 5तेकर फिलिप्पुस, समारिया रेनअः मियांड सहर रे सेन केते, होड़कु तलारे ख्रीस्त रअः बारे रे परचारे केनाय। 6जब तुन्दरा होड़ फिलिप्पुस आला कंहड़ी के आयुम लअकु, आउर हुनी आला कामी लआ चिनहा आउर छकित काम के नेल लअकु दो, मिजुट केते हुनी आला बात रे मन लगाय केनाकु 7एता लःअय ची, ढेर होड़कु तरअः असुध आतमा जोड़ से गुल केते उडुंग नाकु, तेकर ढेर लकवा उनकु बेमारिया आउर लंगड़ाकु होः बेस नेनाकु। 8आउर होना सहर रे बड़ा रिझ-खुसी हुयाव ना।
जादुवाहा सिमोन
9होना सहर रे सिमोन नुमू रिनी मियांड होड़ ताही नेनाय, हुनी थोड़ेक दिन तरअः जादु-टोना केते समारिया राईज रिनकु होड़कु के छकित गुल ताकु केनाय। तेकर आएंग के बड़े होड़ कंहड़ी केनाय, 10छोटे तरअः बड़े जगुत हुनी के मान मरजादी केनाकु, तेकर “नुई होड़ परमेसर रअः ‘होना सवांग हेके जे महान कंहड़ीयोः’” कंहड़ी केनाकु 11हुनी अपन जादु-टोना रअः काम रे ढेर दिन तरअः छकित कुकेनाय, हिना लःअय हुनी के मुरुक मनाअ केनाकु 12बकिर जब हुंकू फिलिप्पुस आला बिसवास नेल लआकु आउर परमेसर आला राईज रअः बेस खभाईर आउर ईसु ख्रीस्त आला नुमू आयुम लआकु, दो फिलिप्पुस के मुरुक मनाअ केनाकु आउर आउराईत चाहे हेरेल जामाकु बतिस्मा इदी लअकु। 13तब सिमोन होः बिसवास लःअय, आउर बतिस्मा इदी केते फिलिप्पुस लोः तहीनोः केनाय। हुनी चिनहा आउर बड़े-बड़े सवांग रअः काम हुयाअः केना के नेल केते छकित जुनोः केनाय।
समारिया रे पतरस आउर जोहन
14जे बेरा प्रेरितकु जे जिरोसलेम रे ताही नेनाकु आयुम लअकु ची समारियाकु होः परमेसर आला बचन के मनाव नाकु, दो पतरस तेकर जोहन के हुंकू दुबाःड़े कुलगोःड लिकनाकु। 15हुंकिन सेन केते, पबितर आतमा नानाम लःअय हुंकू लःअय बिनती लआकिन। 16एता लःअय ची नहाअः जगुत हुंकू मेसे रे ओके एड़े होः पबितर आतमा का अड़गु थिना, हुंकू दो परभु ईसु आला नुमू रे बतिस्मा भाईर ईदी थिलाआकु। 17तब पतरस तेकर जोहन, हुंकू तेङ रे तीः दोहो लआकिन, आउर हुंकू पबितर आतमा नाम लअकु।
18जब सिमोन नेल लःअय, ची प्रेरितकु आला होड़ तेङ रे तीः दोहोय रे, पबितर आतमा भेटाआ, दो हुंकू दुबाःड़े ढिबुवा आगु केते कंहड़ी लःअय, 19“नोःआँ हक ईङ के होः एमाईङ पे, ची जेकर तेङ रे ईङ तीः दोहोयीङ हुनी पबितर आतमा नामेआय।”
20“आम आला ढिबुवा आम लोः नास जुनोः, एता लःअय ची आम परमेसर आला बराकाईत के ढिबुवा रे किकिरिंग लःअय बिचार लअम, मेन केते पतरस जाजदुई सिमोन के बेता लियाय! 21नोःआँ बात रे, ना ची आम आला हिस्सा एदनाअ ना बाटा, एता लःअय ची आम आला मन परमेसर मड़ांग रे सोझ कनोआँ। 22हिना लःअय, अपन नोःआँ बुराई तरअः मन रूवाड़ केते, परभु तरअः बिनती में हुयाव सकाअ, आम आला मन रेनअः बिचार छमा योआ। 23एता लःअय ची ईङ आम के नेल दिमीईंग, आम ईरसा तरअः पेरेःग तनाम तेकर अधरम रे जकड़ाव तनाम।”
24“आम ईङ लःअय परभु तरअः बिनती में, ची जे बात आम कंहड़ी लआम, होना मेसे मियांड-मिन होः ईङ तेङ रे आलु हीःग कोओ” मेन केते, सिमोन कंहड़ी रूवाड़ लःअय।
25तेकर हुंकू गोवाही एम केते, आउर परभु आला बचन सुनाव केते, तेकर समारिया रेनअः ढेर डिही रे बेस खभाईर के सुनाव यअते, जिरोसलेम रूवाड़ नाकु।
फिलिपुस आउर कूस राईज रिनी हाकिम
26फिन परभु आली मियांड सिरमादूत फिलिप्पुस के “बिरिःड में तेकर दखिन पखा होना होरा रे जु, जे जिरोसलेम तरअः गाजा सेना” जे बितिल होरा हेके मेन केते बेता लियाय। 27हुनी बिरिःड केते सेनोः नाय, तेकर नेलीपे कूस राईज रिनी मियांड होड़ हिजोअ केनाय, जे आउराईत थिनाय ना हेरेल, आउर कुसी रिनी रानी कन्दाके आली मंतरी आउर मुध खजांची ताही नेनाय, हुनी आराधना लःअय जिरोसलेम हीःग ताही नेनाय। 28हुनी अपन रथ रे दुड़ूः ताही नेनाय, तेकर इसायस आगमजानी आला पुथी के पढ़ाव-यअते रूवाड़ोः केनाय। 29हिमीन रे पबितर आतमा फिलिप्पुस के बेता लियाय, “हेनाःड सेन केते नोःआँ रथ साँघे जुनोः मे।” 30फिलिप्पुस हुनी पखा नीर सेन नेनाय, तेकर हुनी के इसायस आगमजानी आला पुथी पढ़ाअ आयुम लियाय। आउर “आम जे पढ़ाअ तनाम होना के समझाअ तनाम होः” मेन केते कुली लियाय।
31हुनी “जदि जाहें ईङ के काकु समझाईंग दो ईङ एता लकान समझाव कोईङ?” तेकर फिलिप्पुस के, हीःग केते दुड़ूः मे बेता लियाय। 32#जसा 53:7,8धरम पुथी हुनी जे पढ़ाअ केनाय,
“होना नोःआँ पद ताही नेना, हुनी के भेंड़ा लकान गोगोएःग लःअय इदी लियाकु,
तेकर जे लकान भेंड़ा छउना ऊन खुराव कु दुबाःड़े सिड़िग्या ताही नोआकु,
हिना लकान गी हुनी होः आहा ताय के काय उघड़ाव लआ।
33हुनी के अपमान सासहाव पड़ाव नेना, हुनी लोः नेयाय का हुयाव नेना।
हुनी आला बंसवाईर रआ बखनाव ओके दाड़ी केआय?
हुनी आला जिनगी के धरती तरअः बिरिःड केदाकु।”
34ईङ आम तरअः गोहरअ तानिङ, “आम नोःआँ उदूः गेमे, ची आगमजानी नोःआँ ओके आला बारे कंहड़ीः दाय? अपन बारे रे चाहे जाहें एटाअ रअः बारे रे” मेन केते, मंत्री फिलिप्पुस के कुली लियाय। 35हिमीन रे फिलिप्पुस अपन आहा के खोलाव लःअय, तेकर धरम पुथी रेनअः निआँ हिसा तरअः एहेःब केते, हुनी के ईसु आला बेस खभाईर सुनाव लःअय। 36होरा रे सेनोः-सेनोः, हुंकिन जहान दाअः दुबाःड़े सोदोर नेनाकिन, तब मंत्री कंहड़ी लःअय, “नेलेमे नोआँड़े दाअः एदनाआ। नहाअः दो ईङ के बतिस्मा ईदी रे एतान रोक एदनाअ?” 37#8:37 (ढेर जामा तरअः मारी धरम पुथी रे नोःआँ पद कनोआँ।) फिलिपुस कंहड़ी लःअय जदि आम गोटे मन तरअः विसवासेआम दो हुयाव सकाआ, हुनी उतारा एम लःअय ईङ बिसवासे ईङ ची, ईसु ख्रीस्त परमेसर आली होपोन हेके।
38तब हुनी रथ तितिंगु लःअय हुकूम एमा लियाय, तेकर फिलिप्पुस तेकर मंत्री बनाहोड़ दाअः रे अड़गु नेनाकिन, तेकर हुनी मंत्री के बतिस्मा एमा लियाय। 39जब हुंकिन दाअः तरअः उडुंग केते तेंग हीःग नेनाकिन, दो परभु आला आतमा फिलिप्पुस के आलगाव ईदी लियाय। तेकर मंत्री हुनी के दोबारा काय नेल दाड़ी लिया, तेकर खुसी मनाव यअते अपन होरा रे सेनोः नाय। 40फिलिप्पुस असदोद सहर#8:40 असदोद सहर नोःआँ सहर गाजा सहर तरअः बत्तीस किलोमीटर आउर जिरोसालेम सहर तरअः छप्पन किलोमीटर रे एदनाअ। रे हीःग उडुंगनाय। तब होनाःड़े तरअः कैसरिया रे सहर-सहर बेस खभाईर के सुनाव ईदी केनाय।
© 2023 NLCI CC BY-NC-ND 4.0
