मत्ती 28
28
यीशु को मौत से ज्यून्दु होण
(मर 16:1-10; लूका 24:1-12; यूहन्ना 20:1-10)
1अर जब सब्त को दिन बीती गै, त हप्ता का पैला दिन याने कि इतवार रात खुलण से पैलि ही मगदला गौं की मरियम अर दुसरि मरियम कबर पर दिखणु कू ऐनी। 2अर सुणा, अचानक एक बड़ु भ्वींचळु ऐ, किलैकि प्रभु को एक दूत स्वर्ग बटि ऐ, अर वेन ऐके कबर का मुख पर रख्यां बड़ा डांग तैं हटै दिनी, अर वेमा पर बैठि गै। 3अर वेको रुप आसमान मा चमकण वळी बिजली का जन, अर वेका कपड़ा बरफ की तरौं सफेद छा। 4अर जु पैरेदार यीशु की कबर पर पैरा देणा छा, वेतैं देखि के वु लोग डौऽरळ कौंपण लगि गैनी, अर इन ह्वे गैनी जन की मुरयां हो।
5तब स्वर्गदूत न ऊं जनानियों कू बोलि, “डौऽरा ना, मि जणदु छौं कि तुम यीशु तैं खुज्याणा छाँ, जैतैं क्रूस पर चड़ये गै छौ। 6उ इख नि च, किलैकि उ अपणा बुलयां वचन का मुताबिक मुरदो मा बटि ज्यून्दु ह्वे गै। आ, अर ईं जगा तैं देखा, जख वेतैं रख्युं छौ। 7अर तुरन्त इख बटि जा, अर वेका चेलों तैं बता कि उ मुरदो मा बटि ज्यून्दु ह्वे गै। अर उ तुम से पैलि गलील मुलक कू जाणु च, अर तुम लोग वेतैं उखि दिखल्या। अर सुणा, मिन या बात तुमतै बतैयालि।”
8अर यू सुणी के वु भौत डौऽरी गै छा, मगर येका दगड़ा-दगड़ि वु खुश छा। तब वु तुरन्त चेलों तैं या खबर देणु खुणि कबर बटि भागी के गैनी। 9अर जब वु जाणा छा कि सुणा, अचानक यीशु ऊंतैं दिखै अर वेन ऊंकू बोलि, “सलाम।” अर ऊ वेका पास ऐनी, अर वेका खुटों तैं पकड़ी के वेकी भक्ति करण लगि गैनी। 10तब यीशु न ऊंकू बोलि, “डौऽरा ना, अर जैके मेरा भैयों मा बोला कि गलील मुलक मा चलि जा, अर मि ऊंतैं उखि मिललु।”
झूठ्ठ बोन्नु खुणि पैरादारों तैं रिस्वत
11अर जब यू जनानियां जाणि ही छै कि इथगा मा जु पैरेदार कबर पर पैरा देणा छा ऊंमा मा बटि कुछ न नगर मा जैके पूरु हाल समाचार मुख्य पुरोहितों तैं बतै दिनी। 12तब मुख्य पुरोहितों न, अध्यक्ष लोगु का दगड़ा मा मिली के सला कैरी। अर सिपयों तैं भौत रुपया देके बोलि कि, 13“सुणा, तुम लोग इन बुलयां कि, ‘राति जब हम सियां छा, तब वेका चेला ऐनी अर वेकी लांश तैं चुरै के लि गैनी।’ 14अर अगर जु या बात गवर्नर तक पौंछी जालि, त हम ऊंतैं समझै द्यूला अर तुमतै मुसीबत से भि बचै द्यूला।” 15तब पैरादारों न रुपया लेके उन्नि कैरी जन ऊंतैं सिखै गै छौ। अर यहूदी लोगु मा आज का दिन तक या बात इन्नि फैली च कि यीशु कि लांश चुरयै गै।
यीशु को दिख्यौण अर आखिरी आज्ञा
(मर 16:14-18; लूका 24:36-49; यूहन्ना 20:19-23; खास चे 1:6-8)
16अर येका बाद ग्यारा चेला गलील मुलक का वे पाड़ पर गैनी, जैका बारा मा यीशु न ऊंतैं बतै छौ। 17अर इख ऊंन यीशु तैं देखि अर वेकी भक्ति कैरी, मगर फिर भि कै कैतैं यकीन नि ह्वे कि यू यीशु ही च। 18तब यीशु न ऊंका पास ऐके बोलि, “स्वर्ग अर ईं धरती को पूरु अधिकार मितैं दियूं च। 19इलै तुम जा, अर सब जाति का लोगु तैं चेला बणा, अर ऊंतैं पिता, पुत्र#28:19 इख मा यीशु पिता परमेस्वर का बारा मा, पुत्र याने कि अपणा बारा मा बोन्नु च। अर पवित्र आत्मा का नौ से बपतिस्मा द्या, 20अर जु आज्ञा मिन तुमतै दिनी, ऊं सब बातों को पालन करण लोगु तैं सीखा, अर याद रखा मि ईं दुनियां का अन्त तक सदनि तुमरा दगड़ा मा छौं।”
© (Active) Wycliffe Bible Translators, Inc. All rights reserved.
