Muuduko 46
46
Jekoopeke tonumdoto Ijup'no kwolapo tovinokwono
1Toruda'ai Jekoopol gamoro yiuwi'nokai buro'nyo buro'nyo kuto ivitodeyo a'mwo abolo kwoloraiyodeyo tonyu momwora'no sumaiyokwe avlavokaikono. Toro ton plaino sumaveyokwe wagwolago Biyasiba toru ai'movopogano. Toro ki'mo'mno sumaveyokwe Jekoopol gami ganumiyago Aisakolluro Gooti toollu wiyo'moneyokwe sipsip pwollu romiyo'no kwiroudapiyokaikono. 2Toro wiroudapino sumaiyokwe surakuuto toga Gooti tool Jekoopollu wuujo'moneyokwe wojo tovi'aro kuuguudo aro kuudokaikono. “Jekoopoloo, Jekoopoloo.” Kuudokaikono. Toro kuudoka tovi Jekoopol kuudokaikono. “Anyugeyoo.” 3Toro wuujuno sumaiyokwe Gooti tool kuudokaikono. “Nuu gumi junumiyago toollu Gooti kuunodo toonyugono. Guu Ijup'no wollo'mo luko mibinono. Kevu su towai wolomwalopi moro jurogudo aikubwemi tovida'ai kwolallo bwotonyago yawosunopi kantri jurogudo puruv imo'nupinorekikono. 4Toro te nuu toonyu kevuge Ijup'no wolowanonyugono. Aki guu abolbi toga gumi muugunyo Joosepol mollusagubweyonekugono. Aki lukomgu nuvnokwe toonyu gumi jukweyago kwoloraiyo tonyu aikomgu mokamonyugono.” Gooti tool Jekoopollu toro kuudokaikono.
5Toruda'ai Jekoopeke tonumdoto wagwolago Biyasiba toru kuugollu'movoponumdotogano. Toro wuugollu'mo'mno sumaveyokwe Jekoopolluro muugunyo tooro kemi kuunumiyago tooke'aro kemi julkwolaiyo togai'aro tonyu Feroo toolluro nomokwolabiyo'mo karis toorai ilomorumwalluno sumaveyokwe Ijup'no kwolaponumdotogano. 6#Krt. 7:15Aki kemi buulmokau wuulodeyo kemi kuto ivitodeyo yiuwi'nokai Kenanda'ai amallajupo togai'aro ton momwora'no sumaveyokwe Jekoopeke tonumdoto Ijup'no amokwolaponumdotogano. 7Toro tool gami muugunyo toorogai'aro taiyo togai'aro jukweyago kwolaiyo taiyo togai'aro gamoro yiuwi'nokai sawosunopo togai'aro tonyu Ijup'no amokwolokaikono.
© 2022: Ethnos360 Sanford, Florida
