Zaburi Sya Daud 59
59
Eripe me de inimicis.
1Unifuwule pa wakuwipila wangu, Mlungu wangu.
Kuhuma pa wala waniyimila uniwike pa kikweso.
2Unifuwale pa wala wakiteye fya waka:
Na pa wandu wa kyasi uniyokole.
3Ndawa lola, waguyuwalila umi wangu; wala wa mbafu wikokanisa kunikanila.
Si ndawa ya kuhoka kwangu, haka kya zambi yangu, Bambo.
4Pangali upulupulu wangu wakimbila na wiwikila ngani:
Uwuke kunipokola, ukawone.
5Ena wenga Bambo, Mlungu wa mabanja, Mlungu wa Israel, wiika kuyilolela mihuku yoha:
Usiwaganila wala wawakongesa fya waka.
6Wakiliukeye kimihi, wawuwuteye ngati libwa:
Na walisyungutileye likaya.
7Mulolaye, wamanya kuwukula pandomo; maupanga pa milomo yawe:
Ndawa wakita, Nna ayufwana?
8Nu wenga Bambo, yauwaheke:
Yauyiheke luheko mihuku yoha.
9Uwe mbafu syangu, yamkulindilili:
Ndawa Mlungu pakukwelela pangu.
10Mlungu wa lukolo lwangu yaanilongolele
Mlungu yanipele kuwona fila nilonda pa wamitumba wangu.
11Usiwasyangalila, gusiyiwa nnsafi wangu:
Uwayeguse yeguse pa lipuga lyako lya ngondo, ukawaselese, Bambo kikopa kitu.
12Kwa zambi yapa ndomo pawe, nu kwa malowe ga pa milomo yawe, wakole pa kwikwisa:
Ni ndawa ya kulapalila nu kwikangalakisa kula wawalangeye.
13Uwamalakise, pa kufyoma mwoyo, uwamalakise, wasitama kawili baho:
Wakamanye kukita Mlungu alinganisa pa Yakobo; na mpaka songo sya ndima.
14Na wakakilauke kimihi, wakawuwute ngati libwa:
Na wakalisyungutili likaya.
15Yawayeguke uku na uku kwa chakulya:
Na yawawele nikilo ngati nakutupila.
16Koma nenga yaniyimbile mbafu syako; ena yanululubitile lukolo lwako lukela kela:
Ndawa wayile pa kukwelela pangu, na pa kukimbilila pa ligono lya fya kufinyikisila fyangu.
17Kwa wenga, mbafu syangu, yaniyimbi zaburi;
Ndawa Mlungu pakukwelela pangu, Mlungu wa lukolo lwangu.
First published in 1913, by the Universities' Mission to Central Africa Mission Press